Ermənistanın ərazilərin inkişafı və infrastruktur naziri Qnel Sanosyan “Sputnik Armeniya”ya Zəngəzur dəhlizinin əhəmiyyətindən danışarkən bir sıra məqamlara toxunub: “Naxçıvana gedən dəmiryolu xəttinin açılışından yalnız biz deyil, bütün qonşu dövlətlər faydalanacaq. Nəqliyyatın açılması nəticəsində nəinki biz, həm də bölgədəki qonşu ölkələr qazanacaq. Əgər dəmir yolu haqqında danışsaq, infrastruktur qurulmadan bərpa işlərinə nail olmaq mümkün deyil. Elə ərazilər var ki, orada yol şəraiti yoxdur. Həmin yerdə yeni yollar qurulmasına ehtiyac var”.
Nazir dəmiryolu xəttinin açılışı ilə yanaşı, infrastrukturun tikintisindən də bəhs edib. O, xəttin keçmiş SSRİ zamanındakı xətt istiqamətində Azərbaycanın Naxçıvan və Ermənistanın Mehri bölgəsindən keçəcəyini vurğulayıb: “Sovet dövründə İcevandan da bir dəmir yolu keçirdi. Bölgədə sülh hökm sürsə və biz kommunikasiyaları tamamilə bərpa edə bilsək, bu istiqamətdə işləmək iqtisadi cəhətdən sərfəli olacaq”.
Burada diqqəti çəkən məqam odur ki, Ermənistan rəsmisi ancaq dəmir yolundan danışıb. Halbuki, 10 noyabr razılaşmasında digər kommunikasiya xəttlərinin də açılması öz əksini tapıb. Ancaq görünən odur ki, Ermənistan tərəfi müxtəlif vasitələrlə bundan yayınmaq istəyir.
“Görünən odur ki, Ermənistan cığallıq edərək bu fürsəti bizə vermək istəmir”
Məsələyə münasibət bildirən şərqşünas Seyid Camal Əzimbəyli erməni tərəfinin bu hiyləgər gedişinin müəyyən məqsədlərə hesablandığını qeyd etdi: “Həmişə olduğu kimi, burda da mənfur erməni bicliyi özünü göstərir. Məsələ ondadır ki, 90-cı illərdə Mehridən keçən dəmir yolu ermənilər tərəfindən sökülərək tamamilə yararsız hala salınıb. Bu dəmir yolunun bərpası müəyyən vaxt tələb edir. Ermənilər də bunu yaxşı bilir. Ancaq oradan avtomobil yolu da keçir axı. Hansı ki, bunun sayəsində tez bir zamanda Naxçıvanla rahat əlaqə qurmaq olar. Görünən odur ki, Ermənistan cığallıq edərək bu fürsəti bizə vermək istəmir. Bax bu səbəbdən kommunikasiyaların açılması deyilərkən Ermənistan hər vasitə ilə yalnız dəmir yolundan danışır. Onlar yaxşı bilir ki, avtomobil yolu vasitəsilə nəqliyyat əlaqəsini yubatmaq üçün əllərində bəhanə yoxdur. Bu bir daha Ermənistanın sözügedən məsələlərdə səmimi olmamasından xəbər verir. Ancaq hesab edirəm ki, Azərbaycan qalib tərəf olaraq heç vaxt kommunikasiya xətlərinin yarımçıq açılışına razı olmayacaq. Prezident İlham Əliyev də dəfələrlə bəyan edib ki, bütün kommunikasiya xətləri açılmalıdır”.
Bu baxımdan şərqşünas hesab edir ki, Ermənistan vaxt uzatmaqla öz qeyri-sağlam məqsədlərinə çata bilməyəcək.
Vidadi ORDAHALLI
