Rusiya Federasiyasının Daxili İşlər Nazirliyi ruslar haqqında fikirdən sonra Azərbaycanın Belarus, Moldova və Pakistandakı sabiq səfiri İsfəndiyar Vahabzadənin bu ölkənin ərazisinə 50 illik müddətə girişinə qadağa qoyulması barədə qərar qəbul edib.
Bu barədə Rusiyanın Daxili İşlər Nazirliyinin mətbuat mərkəzindən bildirilib:
"Bu gün Qazaxıstan Respublikasının vətəndaşı Kuat Əhmədova və Azərbaycan Respublikasının vətəndaşı İsfəndiyar Vahabzadəyə internet şəbəkəsində millətlərarası ədavəti qızışdıran fikirlər səsləndirdiklərinə görə Rusiya Federasiyasına 50 il müddətinə girişlərinə icazə verilməməsi haqqında qərarlar qəbul edilib".
Sabiq səfirə belə sərt mövqeyi bildirən Rusiya rəsmi dairələri, yaxşı olardı, Jirinovskinin də hərəkətlərinə obyektiv qiymət verəydi. Çünki Vahabzadədən əvvəl belə bir mövqeyi ondan daha üstün siyasi statusa malik olan Jirinovski ortaya qoyub və bütün Azərbaycan xalqını qoyun adlandırıb.
Biz necə, Jirinovskinin Azərbaycana girişinə qadağa qoymalıyıqmı?
Fəzail Ağamalı: “Mən təklif vermişdim ki, Jirinovskinin Azərbaycana gəlişinə qadağa qoyulsun”
Milli Məclisin deputatı Fəzail Ağamalının sözlərinə görə, Jirinovskinin müxtəlif tərəflərə görə Azərbaycanı aşağılaması və təhqiramiz fikirlər səsləndirməsi tamamilə yolverilməzdir:
“Jirinovskinin son açıqlamalarına münasibət bildirərkən də kəskin mövqe tutdum. Onun xəstə təxəyyülə, psixi pozğunluğa söykənən bu cür açıqlamalarının davamlı xarakterli olmasını təsadüfi hesab etmədim. Bunu əslində Rusiyada fəaliyyət göstərən millətçi və digər xalqlara, millətlərə qarşı aşağılayıcı ultra-imperialist mövqe tutan baxışların ifadəsi kimi qiymətləndirdim və bu gün də o fikirdəyəm. Bu cür insanın müxtəlif tərəflərə görə Azərbaycanı aşağılaması və təhqiramiz fikirlər səsləndirməsi tamamilə yolverilməzdir.
Təsadüfi deyil ki, Xarici İşlər Nazirliyi də haqlı olaraq məsələyə kəskin mövqe nümayiş etdirdi. Doğrudur, sonradan Jirinovski guya peşmanlığını ifadə edən açıqlama verdi. Əlbəttə, bu kifayət deyil. Jirinovskiyə heç kim təminat verə bilməz ki, müəyyən zaman keçəndən sonra Rusiyadakı müəyyən siyasi dairələrin sifarişlərinə uyğun olaraq və ya ermənilərin ona vermiş olduğu pul hesabına yenə də Azərbaycanı aşağılamayacaq. Ona görə mən də təklif vermişdim ki, Jirinovskinin Azərbaycana gəlişinə qadağa qoyulsun. Yəni onun Azərbaycana girişinə imkan verilməsin. Mən də bu fikirdəyəm ki, Jirinovski kimilər Azərbaycana söyləmiş olduğu fikirlərə görə layiqli cavabını cəmiyyətimiz tərəfindən də alır”.
Əhəd Məmmədli: “Əgər Rusiya tələb edir ki, sabiq səfirə burada cinayət işi açılsın, biz də eyni addımın Rusiyada Jirinovskiyə qarşı atılmasını istəməliyik”
Politoloq Əhəd Məmmədli qəzetimizə bildirdi ki, Jirinovskinin qəbahəti Vahabzadədən daha çoxdur: “O, bütün Azərbaycan xalqını qoyun adlandırmışdı. Hətta həmin hadisədən sonra Bakıya səfər də etmişdi. Jirinovski illərdi türkləri, Azərbaycanı təhqir edir. Bu qəbildən olanlar Rusiyada çoxdur. Onların dövlət kanallarında təşkil edilən tok-şoulara baxmaq kifayətdir ki, ünvanımıza hansı təhqirlərin yağdırıldığına şahid olaq. Niyə biz onlara qarşı qadağaları tətbiq etmirik? Teleaparıcı Solovyovu da həmin siyahıya salmalıyıq. Mənim İsfəndiyar Vahabzadənin şəxsi personasına hörmətim olmayıb. Ancaq bu məsələdə obyektiv yanaşma ortaya qoymalıyıq. Əgər Rusiya tələb edir ki, sabiq səfirə burada cinayət işi açılsın, biz də eyni addımın Rusiyada Jirinovskiyə qarşı atılmasını istəməliyik. Bunu etməyəcəklərsə, biz İsfəndiyar Vahabzadəni qorumalıyıq”.
Məhəmmədəli QƏRİBLİ
