Ermənistan baş naziri Nikol Paşinyan hökumətin iclasında qonşularla normal münasibətlər qurmaq niyyətində olduğunu bəyan edib. Paşinyanın sözlərinə görə, Ermənistan hansısa ərazilər uğrunda döyüşmək və ya başqa təcavüzkar hərəkətlər etmək niyyətində deyil.
O, xüsusi olaraq vurğulayıb ki, bölgədə düşmənçilik və qarşıdurmanın daha da dərinləşməsi qəbuledilməzdir. Bu təkcə regional deyil, həm də beynəlxalq təhlükəsizliyə təhdiddir: “Bu düşmənçiliyin hansı təzahürlərə səbəb ola biləcəyini Bakıda açılan "Hərbi Qənimətlər Parkı"nın timsalında gördük. Düşmənçiliyə qalib gəlmək Ermənistanın regional xarici siyasətinin ən vacib elementlərindən birinə çevrilməlidir. Ermənistan hesab edir ki, qonşularla normal münasibətlərin qurulması uzunmüddətli sülh, təhlükəsizlik, sabitlik və inkişaf üçün əsas rol oynayır. Qonşu ölkələrlə münasibətlərin tənzimlənməsi və ya inkişafı hökumətin xarici siyasətinin vacib istiqaməti olacaq. Bəzi qüvvələr qonşulara qarşı təcavüzkar hərəkətlər üçün orduda islahatlara ehtiyac olduğunu söyləyir. Bununla da onlar Ermənistanın niyyətini yanlış təqdim etməyə çalışırlar. Ermənistan, hər bir "sülhsevər" ölkə kimi, Silahlı Qüvvələrini təcavüz üçün deyil, ondan müdafiə üçün inkişaf etdirir. Bizim ərazilər işğal etmək niyyətimiz yoxdur”.
Paşinyan belə sülh tərəfdarıdırsa, regional sabitlikdə maraqlıdırsa, o zaman 10 noyabrdan 9 ay keçdiyi halda, niyə Kəlbəcər, Laçın, Qubadlı və Cəbrail rayonlarının mina xəritələrini vermir?
“Paşinyanın “sülh göyərçini” cildində verdiyi açıqlamalar sərhədlərimizdə baş verən hadisələrin mahiyyəti ilə uyğunluq təşkil etmir”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyevin fikrincə, Paşinyanın “sülh göyərçini” cildində verdiyi açıqlamalar sərhədlərimizdə baş verən hadisələrin mahiyyəti ilə uyğunluq təşkil etmir: “Anlaşılan odur ki, Paşinyan bütün vasitələrdən istifadə edərək prosesi uzatmağa çalışır. Ermənistana təsir imkanları olan dövlətlərin təzyiqləri arasında manevrlər etməklə, həm də vəziyyətdən çıxış yolları axtarır. Bunun fonunda bir-birini tamamlamayan açıqlamaları birmənalı qarşılanmır. Eyni zamanda, son 150 ildə mifoloji təsəvvürlə “xəstələnmiş” erməni cəmiyyətinin real düşüncəsində birdən-birə dəyişiklik etmək elə də asan məsələ deyil. Bunları da Paşinyan bilməmiş deyil. O, sülhdən danışarkən, erməni diasporu və lobbiləri bütün gücü ilə Paşinyan və onun komandasına qarşı hücuma keçir. Bu hadisələr onu deməyə əsas verir ki, ermənilər dünyanın yeni düzənində doğru-dürüst seçim etməlidir. Bölgədə sülhün və təhlükəsizliyin təmin olunmasından ən çox Ermənistan yararlana bilər. Artıq özləri də etiraf edirlər ki, bizi dalandan xilas edə biləcək qüvvə yoxdur. Özümüz seçim etməliyik, qonşularımızla, xüsusən Azərbaycan və Türkiyə ilə münasibətlərimizdə müsbət dəyişikliklər etməliyik. Bunu müstəqil düşüncəyə malik olan erməni bloggerlər dilə gətirir. Əlbəttə, erməni cəmiyyəti onu da yaxşı anlamalıdır ki, Azərbaycanın güzəşt limiti artıq bitib. Müharibədən sonra yeni düzən yaranıb. Artıq Ay-Ulduz İttifaqının (Türkiyə, Azərbaycan, Pakistan) bütün platformalarda birgə iştirakı bölgənin siyasi mənzərəsini əhəmiyyətli dərəcədə dəyişib. Bundan sonra hər hansı bir dövlət bizimlə güc dilində danışa bilməz. Son günlər Azərbaycan tərəfindən Rusiyaya edilən xəbərdarlıq, İrana verilən notadan Ermənistan nəticə çıxarmağı bacarmalıdır. Əgər Böyük Sülh sazişinə hazırdısa, ilk növbədə ərazilərimizə basdırılmış minaların xəritəsini qeyd-şərtsiz verməlidir. Sərhəddəki təxribatlarına son qoysunlar, 10 noyabr razılaşmasının şərtlərini yerinə yetirsinlər. Məhz ondan sonra Paşinyanın sülhdən danışarkən səmimiyyətinə inanmaq olar. Yoxsa belə fikirlərlə vaxt qazanmağı düşünürlərsə, daha çətin duruma düşəcəklərini dərk etməlidilər”.
Sədr müavini hesab edir ki, Ermənistan üçün vaxt daralır.
Vidadi ORDAHALLI
