“Hərəkat COVID-19-dan sonrakı dövr üçün də güclü, əlaqəli və məqsədyönlü addımlar atmalıdır. Bu mənada, pandemiyadan sonra bərpa mərhələsinə dair fikir mübadiləsinin aparılması və Hərəkatın mövqeyinin müəyyən edilməsi baxımından Qoşulmama Hərəkatına üzv dövlətlərin yüksək səviyyəli iclasının keçirilməsi faydalı ola bilər. Pandemiyadan irəli gələn çətinliklərin mürəkkəbliyini nəzərə alaraq, Qoşulmama Hərəkatı tərəfindən COVID-19-dan sonra qlobal bərpaya dair BMT-nin Yüksək Səviyyəli Panelinin yaradılması təşəbbüsü ilə çıxış edilməsi məqsədəmüvafiq olardı. Həmin panel dünyanın pandemiyadan daha yaxşı şəkildə çıxması üçün qlobal tədbirlərə dair tövsiyələr hazırlaya bilər».
Bunu iyulun 13-də Qoşulmama Hərəkatının Xarici işlər nazirlərinin onlayn formatda aralıq konfransındakı çıxışında Prezident İlham Əliyev deyib.
“Post-pandemiya dövründə dünyanın iqtisadi, sosial, siyasi və mənəvi düzəninin müəyyənləşdirilməsi və dünyada ədalətli yanaşmanın təmin olunmasına xidmət edir”
Azərbaycan Prezidentinin irəli sürdüyü təşəbbüsün əhəmiyyətini “Bakı-Xəbər”ə şərh edən millət vəkili Musa Quliyev bildirdi ki, Prezident İlham Əliyevin Qoşulmama Hərəkatına rəhbərlik etdiyi dövrdə burada olduqca ciddi və aktual məsələlərlə bağlı təkliflər səsləndirilib: “Məhz cənab Prezidentin bundan əvvəlki təklifi ilə COVID-19-la mübarizədə beynəlxalq səylərin birləşdirilməsi ilə bağlı BMT-nin xüsusi sessiyası çağırıldı və bunun da olduqca böyük səmərəsi, nəticəsi oldu. Prezident İlham Əliyevin BMT-nin Yüksək Səviyyəli Panelinin yaradılması təşəbbüsü də post-pandemiya dövründə dünyanın iqtisadi, sosial, siyasi və mənəvi düzəninin müəyyənləşdirilməsi və dünyada ədalətli yanaşmanın təmin olunmasına xidmət edir. Bu təşəbbüs, eyni zamanda, yenə də beynəlxalq səyləri birləşdirərək post-pandemiya dövründən sürətlə çıxmağa kifayət qədər hüquqi və iqtisadi əsaslar yaradılmasına çağırır. Ümimiyyətlə, cənab Prezidentin bütün çağırışları BMT və digər beynəlxalq qurumlar tərəfindən son dövrlərdə sözsüz və şərtsiz qəbul edilir, həyata keçirilir”.
M.Quliyev hesab edir ki, bu həm Azərbaycan dövlətinin imicinin yüksək olmasının göstəricisidir, həm də Prezident İlham Əliyevin artıq dünya liderlərinin sırasında sayılıb-seçilən bir siyasi, dövlət xadimi olmasının bariz örnəyidir: “Əlbəttə, bu, Qoşulmama Hərəkatına üzv olan və üzv olmayan, eləcə də o qədər də zəngin olmayan, orta və yoxsulluq səviyyəsində yaşayan ölkələrə çox ciddi bir dəstəyin başlanğıcı olacaqdı. BMT-nin Yüksək Səviyyəli Panelinin yaradılması gələcəkdə də bu kimi məsələlərin beynəlxalq səviyyədə, yeni bir müstəvidə müzakirə edilməsinə, çözülməsinə, əməldə göstərilməsinə səbəb olan bir çağırışdır”.
İradə SARIYEVA
