Məşhur “Gullup International Аssociation” mərkəzinin İrəvan ofsi Ermənistanda sorğu keçirib. Soğrunun nəticələrində bir sıra məqamlar diqqəti cəlb edir.
Məsələ ondadır ki, Ermənistanın 44 günlük müharibədə məğlub olmasına baxmayaraq, sorğuya qatılanların 30 faizi erkən parlament seçkisində yenə də Nikol Paşinyanın “Mənim addımım” partiyasına səs verməyə hazır olduğunu bildirib. Ancaq bu o demək deyil ki, sorguda iştirak edənlərin böyük hissəsi müxalifəti dəstəkləyib. Çünki sorğu nəticəsinə görə, digər partiyalar “Mənim addımım”dan sonra gəlir. “Hansı siyasətçiyə üstünlük verirsiniz” sualına cavabda da ilk sırada Paşinyan gəlir.
Sorğuda diqqəti çəkən başqa bir məqam ondan ibarətdir ki, “müharibədə məğlubiyyətə görə kim məsuliyyət daşıyır” sualına qatılanların 32 faizi məğlubiyyətdə keçmiş hakimiyyətləri günahlandırıb və onların məsuliyyət daşıdığını vurğulayıb. Söhbət Robert Köçəryan və Serj Sarkisyandan gedir. Sorğu iştirakçılarının 28 faizi Paşinyanın günahlar olduğunu deyib. Bu o deməkdir ki, ermənilərin əksəriyyəti məğlubiyyətə görə hazırki hakimiyyəti günahkar saymır.
O da məlumdur ki, məğlubiyyət amilini əlində bayraq edən Ermənistandaki revanşist mövqedən çıxış edən müxalifət hakimiyyətə gəlməyə çalışır. Ancaq etiraz aksiyalarına qatılanların az olması göstərdi ki, erməni cəmiyyəti onlara stavka etmir.
Keçirilən sorğunun nəticələrinə baxsaq, bütün bunlar bir daha Ermənistanda revanşistlərin şansının olmadığını sübut edirmi?
“Revanşistlər hakimiyyətə gəlsə, müharibə yenidən təkrarlana bilər və o zaman itkilər fəlakətli dərəcədə böyük olacaq”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, sorğunun nəticələri onu göstərir ki, erməni cəmiyyəti əvvəl hakimiyyətdə olan qüvvələrin yenidən iqtidara gəlməsini istəmir: “Yəni normal, sağlam düşüncəli seçici Paşinyanı qəhrəman hesab etməsə də anlayır ki, o getsə, onun yerinə gələnlər ölkəyə fəlakət gətirəcək. Çünki hazırkı situasiyada seçim imkanı məhduddur. Revanşistlərin hakimiyyətə gəlməsi isə Ermənistana yaxşı heç nə vəd etmir. Rəsmi məlumata görə, 44 günlük müharibədə Ermənistanın 4000 min nəfərdən çox əsgər və zabiti məhv edilib. Bu, Ermənistan kimi əhalisi az, demoqrafik durumu bərbad olan ölkə üçün kiçik rəqəm deyil. Hələ bunun fəsadları illər sonra özünü göstərəcək. Erməni cəmiyyəti başa düşür ki, revanşistlər hakimiyyətə gəlsə, müharibə yenidən təkrarlana bilər. O zaman itkilər fəlakətli dərəcədə böyük olacaq. Belə olan halda Ermənistan bunun altından çıxa bilməyəcək. Bu səbəbdən həm Paşinyan əleyhinə aksiyalara qatılanların sayı elə də çox olmur, həm də keçirilən sorğularda müxalifətə səs verən az olur. Ən başlıcası, Ermənistan əhalisi anlayır ki, bütün bəlaların başlıca baiskarı “Qarabağ klanı”dır. Məhz həmin qüvvələrin fəaliyyəti üzündən həm münaqişə uzun illər həll olunmadı, həm də Ermənistan iqtisadi səfalətə düçar oldu. Çünki Qarabağ dalğası üstündə illər öncə hakimiyyətə gələn bu qüvvələr fantastik vədlər verdilər. Ancaq onların heç biri reallaşmadı. Onların “uğuru” yalnız Azərbaycan ərazilərini işğal etmək idi. Bu da Ermənistana xoşbəxtlik yox, bədbəxtlik gətirdi. Üstəlik, 44 günlük müharibədə ərazilərimiz də azad edildi”.
Politoloq hesab edir ki, Ermənistanda hansısa fors-major vəziyyətdə revanşistlər hakimiyyətə gəlsələr belə, nəyisə dəyişə bilməyəcəklər.
Vidadi ORDAHALLI
