Erməni media araşdırmaçıları Vətən müharibəsində ağır məğlubiyyətə görə İngiltərəyə, Rusiya və ABŞ-a suallar ünvanlamağa başlayıb - niyə İngiltərə...
Ötən il 44 günlük müharibədə ağır məğlubiyyətin səbəblərini araşdıran erməni mediası bununla bağlı “baş sındırır”. Qeyd edilir ki, bir sıra suallara cavab hələ də tapılmayıb.
Politoloq Stepan Danielyan erməni mediasına açıqlamasında “Azərbaycanla təkbətək müharibədə niyə tək qaldıq” və digər bu kimi cəmiyyəti düşündürən sualları qruplaşdıraraq xalqın diqqətinə çatdırıb: “Nə baş verdiyini, nəyi səhv etdiyimizi, bundan sonra nə edəcəyimizi başa düşmək üçün cavabını tapmalı olduğumuz suallara diqqət etməliyik. Bu suallar aşağıdakılardır:
– İngiltərə niyə BMT Təhlükəsizlik Şurasında atəşkəs qətnaməsinə veto qoydu?
– Niyə Amerika atəşkəs müqabilində neytral sülhməramlıları təklif etdi və sonra kənara çəkildi, amma sonra Rusiyanın səyləri ilə müəyyən şərtlərlə atəşkəsi alqışladı?
– Niyə Putin bütün qərarların ATƏT-in Minsk Qrupu ilə razılaşdırıldığını israr etdi və bu vəziyyətdə Minsk Qrupundakı ziddiyyətlər barədə danışıqlar təkzib edildi?
– Boltonun 2018-ci ildəki təklifləri ilə sonrakı hadisələr arasında nə fərq var – Rusiya nəyi həyata keçirdi? Əslində, Boltonun bütün tələbləri yerinə yetirildi.
– Lavrov planı ilə Bolton planı arasında nə fərq var?
– Hakimiyyət dəyişikliyini bir Rusiya sui-qəsdi hesab etsək, niyə parlamentin deputatları açıqca Qərbin təsiri altında olan “Rusiya KQB-nin casusu” Nikolun bütün təşəbbüslərini dəstəkləyir?
– Niyə hakimiyyət müharibəni 19 oktyabrda və ondan əvvəl bitirmək üçün bütün təklifləri qəbul etmədi?”.
Göründüyü kimi, ermənilər bu cür zərbə alacaqlarını təsəvvür etməyiblər və o üzdən, indi də çaş-baş vəziyyətdədilər. Maraqlıdır, qeyd edilən suallar arasında hansı əlaqə var? Ekspertlər bunu necə dəyərləndirir?
- “Ermənilər elə bilirdilər ki, Böyük Britaniya ABŞ-la eyni mövqedən çıxış edəcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Ermənistanın ağır məğlubiyyəti bu ölkənin mətbuatında çoxlu suallara gətirib çıxarıb: “Onlar 30 ildir qələbə eyforyasinda olduqlarından, bu kimi acı məğlubiyyəti həzm edə bilmirlər. Ona görə də kimlərisə və yaxud da hansısa dövlətləri günahkar çıxarmağa çalışırlar. Başa düşmürlər ki, onların məğlubiyyəti məhz Azərbaycanın ərazilərini işğalda saxlamaqla başladı. Düşünürəm, Bolton və Lavrovun planlarının Ermənistan tərəfindən qəbul edilməməsi onu göstərir ki, erməni tərəfi əraziləri qaytarmaq fikrində olmayıb. Çünki hər iki planda ətraf rayonların qaytarılması nəzərdə tutulub. Ancaq ermənilər danışıqlarda bir qarış da torpaq vermək niyyətində olmayıb. Ona görə də cürbəcür arqumentlər ortaya atırlar. Böyük Britaniyanın BMT-də sərgilədiyi mövqe ermənilərə güclü zərbə oldu. Onlar elə bilirdilər ki, İngiltərə ABŞ-la eyni mövqedən çıxış edəcək. Ancaq bunun əksi olduğu üçün şokdadılar. Hesab edirəm ki, Ermənistan mətbuatında verilən şərhlər yalnız özləri üçün bir təsəllidir. Azərbaycan hərbi əməliyyatları ilə bütün planlarını həyata keçirdi. Ən böyük güc məhz Azərbaycan əsgəri idi. Ona görə də bundan sonra nə Lavrov planı, nə də Bolton planı heç bir əhəmiyyət kəsb etmir. Minsk Qrupu artıq tarixin arxivindədir. Qoy, Ermənistan nə qədər istəyir, bu kimi məsələləri müzakirə etsin. Azərbaycan üçün maraqlı deyil”.
Politoloq onu da qeyd etdi ki, Azərbaycan artıq Zəfər marşını çalıb və Ermənistan XXI əsrin məğlub ölkəsidir.
Vidadi ORDAHALLI
