Ermənistan Parlamentinin sədri Ararat Mirzoyan İranın bu ölkədəki səfiri Abbas Zaxuri ilə görüşdə deyib ki, İran Qarabağ məsələsində öz mövqeyini açıqlamalıdır: “İran həm hərbi əməliyyatlar dövründə, həm də sonrakı mərhələdə bölgədəki digər ölkələrin Azərbaycan tərəfinin lehinə fəal iştirakını nəzərə alaraq “Artsax” məsələsində mövqeyini bildirməkdən çəkinə bilməz”.
A.Mirzoyana iddia edib ki, Dağlıq Qarabağın status məsələsi ATƏT-in Minsk Qrupu çərçivəsində həll olunmayana qədər münaqişə həll edilmiş hesab edilə bilməz. O, Qarabağla bağlı üçtərəfli bəyanatın, xüsusən də əsirlərin dəyişdirilməsi bəndinin həyata keçirilməsinin zəruriliyini bildirib.
Ona cavabında səfir bildirib ki, İran Qarabağla bağlı əldə olunan üçtərəfli atəşkəs bəyanatını alqışlayır. Həmçinin səfir Qarabağ mövzusunda ölkəsinin Xarici İşlər Nazirliyi tərəfindən daha əvvəllər ifadə edilmiş mövqeyini də təsdiqləyib.
Məlumat üçün qeyd edək ki, rəsmi Tehran Azərbaycan Respublikasının müstəqilliyi, ərazi bütövlüyü və suverenliyini dəstəkləyən bütün fəaliyyətlərə hörmətlə yanaşdığını açıqlayıb. 44 günlük müharibədən sonra İran rəsmilərinin ən yüksək səviyyədə Azərbaycanın ərazi bütövlüyü ilə bağlı sərgilədikləri mövqe Ermənistanı narahat edir. Bunun özü Qarabağ məsələsində İranın hansı mövqe tutmasının göstəricisidir. Mirzoyan isə uğursuz formada qarşı tərəfi provokasiyaya çəkməyə cəhd edir.
“Mirzoyan ya özü axmaqdır, ya da kimisə axmaq yerinə qoymaq istəyir”
Sözügedən məsələ ilə bağlı fikirlərini “Bakı-Xəbər”lə bölüşən AVCİYA-nın vitse-przidenti, professor Məhərrəm Zülfüqarlının fikrincə, Mirzoyan ya özü axmaqdır, ya da kimisə axmaq yerinə qoymaq istəyir: “İran Azərbaycanın ərazi bütövlüyünü dəstəkləyir. Bu, Qarabağ məsələsində mövqe deyil bəs nədir? Bununla belə, İslam Əməkdaşlıq Təşkilatının bütün üzvləri, o cümlədən İran Azərbaycanın ərazi bütövlüyünü dəstəklədiyini bəyan edib. Bəyan ediblər ki, Qarabağ Azərbaycanın ayrılmaz hissəsidir. Bununla belə, 44 günlük müharibə dövründə və ondan sonra İran rəsmiləri ən yüksək səviyyədə Qarabağla bağlı mövqe ortaya qoyublar. Görünən odur ki, bütün bunlar Ermənistanı ciddi narahat edir. Çünki qonşu ölkə olan İranın məlum mövqeyi rəsmi İrəvanın ürəyincə deyil. Belə olan halda əlacsız qalan Ermənistan rəsmiləri İranı təxribata çəkməyə cəhd edirlər. Mirzoyanın səfirlə görüşdə o cür fikirlər səsləndirməsi provokasiyadır. Hesab edirlər ki, bu kimi situasiyalarda hansısa diplomat səhv buraxacaq, onlar da bundan istifadə edəcəklər. Ancaq belə təxribatlar alınmır. Bir belə məğlubiyyətdən sonra da Ermənistan rəsmiləri nəticə çıxarmaq istəmirlər. Bunların məqsədi Azərbaycanın İran və Rusiya ilə əlaqələrinə kölgə salmaqdır, amma onlar buna nail ola bilməyəcəklər. Azərbaycan hər zaman İranla mehriban qonşuluq münasibətlərinə önəm verib. ABŞ bir neçə dəfə İrana hərbi müdaxilə etməyi nəzərdən keçirib. Azərbaycan dəfələrlə bəyan edib ki, ölkə ərazisi İrana qarşı hərbi platsdarm rolunda çıxış etməyəcək”.
Pofessor hesab edir ki, İran Azərbaycanın müstəqil siyasət yeritməsinin fərqində olduğu üçün ərazi bütövlüyümüzü birmənalı dəstəkləyir.
Vidadi ORDAHALLI
