“Ötən il yükdaşımaların həcmi, demək olar, 20 faiz artıb”. Bunu Prezident İlham Əliyev İran İslam Respublikasının xarici işlər naziri Məhəmməd Cavad Zərifi qəbul edərkən deyib.
Ölkə başçısının szlərinə görə, bu çox müsbət nailiyyətdir: “Biz planlaşdırdığımız bütün işləri həyata keçirmişik. Biz son bir neçə ildə iki qardaş ölkənin çox yaxın olduğu siyasi sahədə, iqtisadi sahədə, nəqliyyat, enerji sahələrində çox yaxşı nəticələr görürük. Bizim bu gün diqqətimizdə olan Şimal-Cənub nəqliyyat dəhlizi kimi bütün layihələr, enerji infrastrukturu ilə bağlı layihələr uğurla inkişaf edir. Şimal-Cənub nəqliyyat dəhlizi işləyir. Mənə indicə məlumat verilib ki, ötən il yükdaşımaların həcmi, demək olar, 20 faiz artıb. Bu, çox müsbət nailiyyətdir. Baxmayaraq ki, onu tam şəkildə başa çatdırmamışıq, biz bu istiqamətdə hərəkət edirik”.
Prezident onu da qeyd edib ki, regionda yeni vəziyyətlə əlaqədar yeni imkanlar, sözsüz ki, özəl investorlar, həmçinin, dövlət qurumları üçün əməkdaşlığa geniş qapılar açır: “Hazırda yeni nəqliyyat əlaqələri müzakirə mərhələsindədir və sözsüz ki, bizim Xudafərin su anbarı ilə bağlı əməkdaşlığımız və elektrik stansiyasının tikintisi ilə əlaqədar gələcək planlar artıq çox aktiv fazadadır. Ümidvaram ki, qarşıdakı bir neçə ildə bu layihəni tamamlaya və hər iki tərəfi yeni elektrik enerjisi istehsalı ilə təmin edə biləcəyik”.
Göründüyü kimi, Azərbaycanla İran arasında nəqliyyat layihələrinin iqtisadi səmərəliliyi artır. Bu isə yeni nəqliyyat əlaqələrinin qurulmasına perspektivlər açır.
“Şimal-Cənub nəqliyyat dəhlizi tam hazır olandan sonra daşımaların həcmi əhəmiyyətli dərəcədə artacaq”
Məsələyə münasibət bildirən ekspert Azər Allahverənovun sözlərinə görə, Azərbaycanın əlverişli mövqedə yerləşməsi ölkəmiz üzərindən həyata keçirilən nəqliyyat layihələrinin iqtisadi səmərəliliyini artırır: “Məsələ ondadır ki, Fars körfəzinə çıxış baxımından ən qısa yol Azərbaycandan keçir. Eyni zamanda, əks istiqamətdə daşımaların Azərbaycan üzərindən aparılması daha sərfəlidir. Azərbaycan Qərblə Şərqi, Şimalla Cənubu əlaqələndirən dəhlizlərin tam üzərində yerləşir. Bu, Azərbaycanın ötürücülük qabiliyyətini artırır. Həm də tranzit ölkə olaraq daha çox gəlir əldə etməsi deməkdir. Mövcud nəqliyyat infrastrukturundan istifadə etməklə, yeni layihələrin həyata keçirilməsi bölgə dövlətlərinin iqtisadi maraqlarına cavab verir. Yeni nəqliyyat dəhlizləri iqtisadi inkişafa stimul verəcək. Belə layihələr, ümumilikdə, Azərbaycanın milli maraqlarına cavab verir. Bu, eyni zamanda, region ölkələrinin maraqlarına uyğundur. Çünki, istənilən halda, nəqliyyat dəhlizlərinin tam işə salınması əlavə gəlir, dividend və kapital axını deməkdir. Dəhlizlər üzərindən daha çox yük və sərnişin daşınmasına şərait yaradır. Ona görə də bütün region ölkələri bu layihələrin həyata keçirilməsində maraqlıdırlar və yeni-yeni variantlar axtarılır, danışıqlar aparılır. Şimal-Cənub nəqliyyat dəhlizi tam hazır olandan sonra daşımaların həcmi əhəmiyyətli dərəcədə artacaq”.
Ekspert onu da qeyd etdi ki, nəqliyyat layihələrinin tam işə düşməsi həm də yeni iqtisadi perspektivlər vəd edir.
Vidadi ORDAHALLI
