“Türkdilli dövlətlərlə dostluq və qardaşlıq münasibətlərinin qurulması Azərbaycanın beynəlxalq siyasətində ən önəmli siyasi kurslardan biridir”. Bunu mətbuata açıqlamasında Azərbaycan Sosial Rifah Partiyasının sədri Əsli Kazımova deyib.
Onun sözlərinə görə, Azərbaycanla Türkmənistan arasında Anlaşma Memorandumunun imzalanması iki ölkə arasındakı dostluq və qardaşlıq münasibətlərinin rəsmiləşməsinin qarantı kimi dəyərləndirilməlidir: “Xəzər dənizində “Dostluq” yatağının Türkmənistanla birgə kəşfiyyatı, işlənilməsi və mənimsənilməsi haqqında anlaşma memorandumu bir daha göstərir ki, Azərbaycan Xəzərin karbohidrogen yataqlarının bölgüsü ilə bağlı zamanında yaranmış ixtilafları geridə bıraxıb. Cənab Prezident İlham Əliyevin Türkdilli dövlətlərlə etibarlı münasibətlərə əsaslanan siyasi xətti birmənalı olaraq, davamlı əməkdaşlığın təminatı deməkdir. Gəlin razılaşaq ki, Xəzər dənizi Azərbaycan üçün strateji əhəmiyyətə malik bir mövqe kəsb edir. Bu baxımdan Xəzər mövzusunda qarşılıqlı fəaliyyətin Azərbaycan-Türkmənistan əməkdaşlığının "ən mühüm istiqaməti” kimi qiymətləndirmək gərəkir. Cənab Prezident İlham Əliyevin də, qeyd etdiyi kimi, Azərbaycan və Türkmənistan ilk dəfə olaraq Xəzər dənizindəki yatağın mənimsənilməsi üzrə birgə işə başlayır və bu yataq ölkələrimizi və xalqlarımızı daha da yaxınlaşdıracaq. Qeyd etmək lazımdır ki, "Dostluq" yatağı onillərdir ki, Azərbaycan-Türkmənistan arasında mübahisəyə səbəb olub. Azərbaycan Türkmənistana yatağın birgə işlənməsini təklif etsə də, Türkmənistan bunu qəbul etməmişdi. Bu gün isə Azərbaycan Respublikasının Prezidenti Cənab İlham Əliyevin düşünülmüş və mehriban qonşuluq siyasi xətti sayəsində, bu maneə aşıldı. Məhz buna görə də, Azərbaycan-Türkmənistan arasında bağlanmış bu sazişi iki ölkənin birgə əməkdaşlığı baxımından hər iki ölkə üçün yeni və prespektivli imkanlara yol açacağının proqnozunu vermək mümkündür. Bu nöqteyi nəzərdən, Azərbaycan-Türkmənistan arasında bağlanmış bu sənədi tarixi sənəd adlandırmaq olar. Bu anlaşma birmənalı olaraq Türkdilli dövlətlərlə qarşılıqlı anlaşma və birgə əməkdaşlıq prinsiplərinə dayansa da, digər tərəfdən ölkələrimizi və xalqlarımızı daha da yaxınlaşdırmağa, həm Türkmənistan, həm də Azərbaycan xalqlarına öz xeyrini verməyə müvəffəq olacaqdır. Düşünün ki, bu günə kimi Türkmənistan təbii qaz ehtiyatlarına görə, dünyada Rusiya, İran və Qətərdən sonra dördüncü yeri tutur. Amma bu günə kimi Türkmən qazının yeganə istehlak bazarı Rusiya olub. Hətta onun istehlak qiymətini bu günə kimi rəsmi Moskva müəyyən edirdi. Rəsmi Aşqabad bu asılılıqdan qurtulmaq üçün Çin və İran bazarına çıxmağa müvəffəq olmuşdu. İndi isə Azərbaycanla bağlanmış saziş sayəsində Türkmənistan təbii qazı Avropa bazarına çıxış imkanı qazanır. Belə olan halda, Azərbaycan birmənalı olaraq, beynəlxalq maraqların kəsişdiyi tranzit ölkə əhəmiyyətinə malik bir dövlətə çevrilir. Ona görə də, hesab edirəm ki, Azərbaycanla Türkmənistan arasında əldə olunmuş bu anlaşmanı, Cənab İlham Əliyevin ölkəmiz adına strateji əhəmiyyətli növbəti zəfəri adlandırmaq mümkündür”.
