Azərbaycan Əlahiddə Ümumqoşun Ordusunun Qars təlimlərinə qatılması Ermənistanı silkələyir - faktı İran və Rusiyaya qarşı çevirmək cəhdi...

Məlum olduğu kimi, Azərbaycan hərbçiləri qardaş Türkiyə Respublikasının Qars şəhərində keçirilən “Qış təlimi-2021”də iştirak edib. Əlahiddə Ümumqoşun Ordunun hərbi qulluqçularının da iştirak etdiyi təlimlərin məqsədi Azərbaycan-Türkiyə hərbi-texniki əməkdaşlığını daha da dərinləşdirməyə yönəlib.

Maraqlıdır ki, Ermənistan bu təlimlərdən ciddi narahat olmağa başlayıb və Azərbaycan-Türkiyə birgə təlimlərinə etiraz edib. Erməni şərqşünas ekspert Ruben Melkonyan Türkiyə-Azərbaycan hərbi təliminə toxunarkən deyib ki, dövlətlərin hərbi təlimləri, hərbi əməliyyatlara əvvəlcədən hazırlaşma və digər addımlar potensial təhdid kimi dərk olunmalıdır: “Regionda böyük müharibə kabusu dolaşır ki, bu müharibə nə zaman başlayacaq, hədəf hansı böyük dövlətlər olacaq, İran, yoxsa Rusiya? Hadisələr göstərəcək. Lakin hər bir inkişaf halında Ermənistan hədəf olaraq qalır, Ermənistan müharibənin səhnəsi olmaq təhlükəsi altında qalır”. O, bütün bunları görməzdən gəlməyi yanlış hesab edir.

Qeyd edək ki, Ermənistan Xarici İşlər Nazirliyinin mətbuat xidmətinin rəhbəri Anna Naqdalyan da bu mövzu ilə bağlı açıqlama verib: “Bizim sərhədlərimiz yaxınlığında Azərbaycan-Türkiyə təlimlərinin keçirilməsi heç də ölkəmizə qarşı sülh niyyətindən xəbər vermir”. Naqdalyan Ermənistanın qonşuları ilə dost münasibətlər qurmaqda maraqlı olduğunu söyləyib.

Ermənistanın Azərbaycan-Türkiyə təlimlərinin, güya İran və Rusiya kimi region ölkələrinə qarşı olduğu ilə bağlı apardığı təbliğatı nə dərəcədə əsaslı saya bilərik?

Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Azərbaycan və Türkiyənin birgə hərbi təlimləri iki qardaş ölkə arasında hərbi əməkdaşlıq haqqında sazişə əsasən və illik plana uyğun olaraq keçirilir. Burada hansısa başqa məqsəd axtarmaq Ermənistanın öz məkrindən xəbər verir. Azərbaycan rəsmən bəyan edib ki, bu təlimlər iki ölkənin silahlı qüvvələri arasında əlaqələndirmənin güclənməsinə və qabaqcıl təcrübə mübadiləsinə xidmət edir. Bu tədbir region üçün təhdid deyil, əksinə, regional sülh və təhlükəsizliyin möhkəmləndirilməsinə xidmət edir. Azərbaycan və Türkiyə yaxın qonşuları ilə çox mehriban siyasət yürüdür  Bunu ölkələrarası münasibətləri təhlil edib də görmək olar. Ancaq fikir versək görərik ki, Ermənistanın, demək olar ki, bütün qonşuları ilə ciddi problemləri mövcuddur. Yəni regiondakı təhlükəsizlik üçün problem yaradan ölkə məhz Ermənistandır.  Yaxşı olardı ki, Ermənistan son müharibədən ciddi nəticə çıxarsın və özünə aid olmayan məsələlərlə bağlı qızışdırıcı mövqe tutmasın. Bizim ölkələrimizin Rusiya və İranla müharibə etmək kimi planı ola bilməz. Ermənistandan qaynaqlanan bu fikirlər Türkiyə ilə ölkəmiz arasında olan yaxınlığa xələl gətirmək və  digər region ölkələrini bizə qarşı səfərbər etməyə yönəlib”.

Ekspertin sözlərinə görə, belə ürəkbulandırıcı fikirlər heç vaxt Azərbaycan-Türkiyə hərbi əməkdaşlığına xələl gətirə bilməz.

Məhəmmədəli QƏRİBLİ