Qondarma "Artsax"ın "ərazilər və idarəetmə nazirliyi" 28 ildə guya bu ərazilərə yatırdıqları investisiyalar barədə hesabat yayıb. Diqqət çəkən faktlar var. Bildirilir ki, 92-ci ildə dünya ermənilərindən Qarabağa vəsait yığmaq üçün “Hayastan” fondu yaradılıb və həmin vəsait hesabına, guya 7 rayonda böyük infrastrukturlar yaradılıb.
Təəssüf edirlər ki, həmin infrastrukturlar “düşmənə”, yəni Azərbaycana qaldı. Azərbaycan ordusunun işğaldan azad etdiyi ərazilərdəki vəziyyətlə hər gün yayılan reportajlar vasitəsilə tanış oluruq. Ermənilərin həmin əraziləri çox acınacaqlı vəziyyətə salqığı mənzərəsi canlanır. Belə olan halda, ermənilərin güya “Artsax”a yatırdıqları sərmayənin bizə qaldığı ilə bağlı apardığı təbliğatda hansı məqsəd güdülə bilər?
Aydın Quliyev: “110 milyon dolların qoyulduğu iddia edilən rayonlarda, əslində, daş daşın üstündə qalmayıb”
“Bakı-Xəbər” qəzetinin baş redaktoru Aydın Quliyev öz sosial şəbəkə hesabında bu mövzuya toxunub. Baş redaktor bildirir ki, hesabatda göstərilən rəqəmlər cəm halda dünya ermənilərindən toplanaraq təxminən 110 milyon dollar vəsaitin gətirildiyini təsdiqləyir: “Göründüyü kimi, ermənilər məlum 7 rayondan söhbət edirlər və bu rayonların əslində nə günə qoyulduğunu müharibədən sonra hamı gördü. Bu ərazilərə 110 milyon dollar pul qoyulubsa, ermənilər nədən "it damlarındakı" kimi miskin durumda yaşayıblar?! 110 milyon dolların qoyulduğu iddia edilən rayonlarda əslində daş daşın üstündə qalmayıb. Demək, qondarma "Artsax"ın qondarma "nazirinin " hesabatı yeyilən pulların izini itirmək cəhdidir. "Nazir" dünya ermənilərinə mesaj verir ki, sizlərin 92 -ci ildən bəri yığdığınız pulları bu ərazilərə yatıraraq "cənnətməkan" yaratdıq, o da düşmənlərimizə qaldı. Qondarma "Artsax" rəhbərləri dünya ermənilərinin və “Hayastan” fondunun mənimsənilmiş 110 milyon dollar pulunun hesabatını bu şəkildə verir...”
Rəşad Bayramov: “Guya onlara da ziyan vurulduğu ilə bağlı saxta rəy formalaşdırmağa can atırlar”
Politoloq Rəşad Bayramov da qəzetimizə açıqlamasında səslənən rəqəmlərin reallığı əks etdirmədiyini bildirdi. Onun sözlərinə görə, ermənilərin nə qoyub getdikləri hamıya bəllidir: “Həmin ərazilərdən reportaj edən xarici jurnalistlər oraları Hirosimaya, Naqasakiyə bənzədiblər. Mən istinadı xarici jurnalistlərə ona görə edirəm ki, burada qərəz amili axtarılmasın. Əksinə, ermənilər həmin əraziləri talan edib, bizə milyardlarla ziyan vurublar. Bütöv şəhərləri yer üzündən siliblərsə, hansı investisiyadan söhbət gedə bilər? Orada onların gördüyü işlərdən gözə dəyəni çəkdikləri yol ola bilər. Bunu də məcburiyyətdən, özlərinə gərək olduğu üçün ediblər ki, Qarabağın işğalını rəsmiləşdirə bilsinlər. Mən təqdim olunan saxta hesabatla bağlı iki detalı fiksə etdim. Əvvəla, həmin vəsaitlərlə bağlı hesabatı bu üsulla ört-basdır edirlər. Yəni bundan sonra kimsə onlardan pulun hara xərcləndiyini soruşmasın. İkincisi isə, Azərbaycanın təzminat davası ilə bağlı qabaqdangəlmişlik edirlər. Bilirlər ki, Azərbaycan onlara qarşı beynəlxalq səviyyədə məhkəmə iddiası qaldıracaq. İşğal altındakı ərazilərə vurulan ziyanın həcminin milyardlarla ölçüləcəyinə qəti şübhə yoxdur. Bu səbəbdən də, güya onlara da ziyan vurulduğu ilə bağlı saxta rəy formalaşdırmağa can atırlar. Hətta belə fakt olsa belə, təqsirkar yenə də ermənilərdi. Çünki heç kim onlardan xahiş etməmişdi ki, gətirib Azərbaycan ərazisinə bizim icazəmiz olmadan sərmayə qoysunlar”.
Məhəmmədəli QƏRİBLİ
