Daşdəmir Əliyev: “Ermənistanın bundan yayınmasının səbəbi xalqdan olan qorxusu ilə bağlıdır”
Tanınmış erməni rejissor Ruben Ovannisyan erməni KİV-nə açıqlamasında hakimiyyəti döyüş itkilərinin sayını gizlətməkdə ittiham edib.
Onun sözlərinə görə, cəmiyyət bu məsələyə ciddi reaksiya verməlidir: “Hakimiyyət 44 günlük müharibədə ölən erməni hərbçilərin sayını dəqiq açıqlamır. Onlar bildirirlər ki, bu dövlət sirridir. Belədirsə, onda niyə Tiqran Avinyan ölənlərlə bağlı təqribi rəqəm səsləndirdi? Bir daha bəyan edirəm ki, hakimiyyət itkilərin sayını bizə dəqiq şəkildə açıqlamağa borcludur. Hakimiyyət itki sayını gizlətmək üçün hələ də bir çox hərbçilərin meyitini “morq”larda saxlayır. Bu kateqoriyadan olan hərbçilərin valideynlərini tək buraxmaq olmaz. Hətta belə məlumatlar var ki, övladları itkin düşən valideynlər gedib türklərlə danışırlar ki, onlara övladlarının meyitini tapmağa icazə versinlər”.
Tanınmış rejissorun aıqlamasında iki məqam xüsusilə diqqət çəkir. Ermənistan hakimiyyətinin döyüş itkilərini dövlət sirri hesab etməsi və valideynlərin, güya türklərlə razılaşaraq, öz övladlarının meyitini axtarmağa icazə alması məsələsi. Bu iddiaları nə dərəcədə əsaslı saymaq olar?
Hərbi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, müharibənin gedişi və ondan sonrakı dönəmdə Azərbaycan daha bir istiqamət üzrə Ermənistandan tam fərqli və şəffaf siyasət apardığını ortaya qoydu: ”Bəllidir ki, Ermənistan müharibənin gedişi boyu və ondan sonrakı dönəmdə öz cəmiyyətini aldadan informasiyalar təqdim edirdi. Hətta güya müharibədə ölən hərbçilərinin sayını açıqlayan yalan məlumatlar belə verirdi. Onların təbliğat maşını Azərbaycanı itki saylarını açıqlamaqla bağlı tənqid edirdi. Azərbaycan tərəfi yalnız sadə sayı göstərən deyil, həm də bütün şəhidlərin adı və fotosunun əlavə olunduğu tam siyahını cəmiyyətə təqdim edib. Dəfn edilmiş şəhidlərimizin foto şəkilləri, adları, soyadları, hərbi rütbəsi və doğum tarixi haqqında məlumat təqdim olunur. İtkin düşmüş hesab olunan hərbi qulluqçuların tapılması və şəxsiyyəti müəyyən olunmayan şəxslərin identifikasiyası üzrə işlərin davam etdirildiyi barədə də məlumat verilir. Rejissorun dediklərində müəyyən mənada həqiqət payı var. Ermənistan öz itkilərinə, döyüş meydanında qalmış meyitlərinə sahib çıxmaq istəmir. Paşinyan iqtidarı döyüş itkilərini gizlətməkdən başqa çarə görmür. Onlar yaxşı bilirlər ki, cəbhədəki real itkilər barəsində cəmiyyətə dəqiq məlumat versələr, ölkənin daxilində xaos daha da dərinləşər. Bu baxımdan da itkin düşənlərin axtarılmasına ciddi maraq göstərilmir. Həlak olan hərbçilərin dəqiq sayının açıqlanması indiki məqamda dövlət sirri təşkil edə bilməz. Müharibənin gedişində bu barədə məlumatın gizli saxlanması mümkün idi. Ancaq döyşlərdən sonra bu məlumatlar mütləq mənada cəmiyyətə təqdim edilməlidir. Ermənistanın bundan yayınmasının səbəbi xalqdan olan qorxusu ilə bağlıdır”.
Hərbi ekspertin sözlərinə görə, güya bu istiqamətdə türklərdən hansısa icazənin alınması ilə bağlı səslənən fikirlər isə reallığı əks etdirmir: “Çünki əldə olunmuş üçtərəfli razılaşmada humatiar addımların atılması ilə bağlı qərar qəbul edilib. Bura hərbi əsirlərin dəyişdirilməsi, meyitlərin döyüş bölgəsindən çıxarılması məsələsi də aiddir. Belə olan halda, niyə türklərlə danışıq aparılmalıdır? Bu tamamilə əsası olmayan bir məlumatdır”.
Məhəmmədəli QƏRİBLİ
