Terrorçu Ermənistan rejimi növbəti dəfə bütün beynəlxalq hüququ ayaqlar altına ataraq hərbi cinayət törətdi, Azərbaycanın mülki əhalisini gecə yarısı raket atəşinə tutdu.
Oktyabrın 17-si gecə yarısı Ermənistan Gəncədə mülki əhalini növbəti dəfə raket atəşinə tutdu. Ermənistan silahlı qüvvələrinin Gəncə şəhərini artilleriya atəşinə tutması nəticəsində onlarla həlak olan və yaralanan var. Həlak olan və yaralananlar arasında uşaqların olduğu da bildirilir.
Məlumat üçün bildirək ki, həlak olmuş şəxslərdən 3-ü azyaşlıdır, 5 azyaşlı yaralanıb. İki uşaq isə itkin düşüb.
Qeyd edək ki, təcavüzkar ölkə mülki əhalini hədəfə almaqda davam edir.
Sentyabrın 27-dən başlayaraq, işğalçı ölkənin hərbi təcavüzü nəticəsində Ağcabədi rayonunun Taynaq kənd sakini, 2006-cı il təvəllüdlü İsgəndərov Fərid Dilafət oğlu , Naftalan rayonunun Qaşaltı kənd sakinləri, 2007-ci il təvəllüdlü Şəhriyar Qurbanov və 2006-cı il təvəllüdlü Fidan Qurbanova həlak olublar.
Uşaqlara qarşı erməni vəhşiliyi bununla bitmir. 2011-ci il martın 8-də düşmən snayperi tərəfindən səkkiz yaşlı Fariz Arzu oğlu Bədəlov qətlə yetirilib. Nənəsilə birlikdə öldürülən on dörd aylıq Zəhra Quliyeva da erməni terrorunun qurbanlarındandır. 2016-cı il fevralın 13-də Füzuli rayonunun Alxanlı qəsəbəsində dünyaya gələn Zəhra 2017-ci il iyulun 4-də, saat 20:40 radələrində ermənilərin Alxanlını atəşə tutması zamanı nənəsi Sahibə Quliyeva ilə birlikdə həlak olub.
Bundan başqa, 2016-cı il Aprel döyüşlərində düşmənin Tərtərin Həsənqaya kəndini atəşə tutması nəticəsində 2000-ci il təvəllüdlü Kəlbəcər sakini Həsənli Turanə Kamandar qızı dünyasını dəyişib. Ermənistan azərbaycanlı uşaqları qətlə yetirməkdə davam edir
“Ermənistan hərbi müstəvidəki uğursuzluğunun, çarəsizliyinin əvəzini uşaqları öldürməklə çıxmağa çalışır”
Millət vəkili Məşhur Məmmədov bildirdi ki, 27 sentyabr tarixindən – Vətən müharibəsinin ilk günündən etibarən bütün cəbhə xətti boyu ardıcıl məğlubiyyətə uğrayan Ermənistan hərbi müstəvidəki uğursuzluğunun, çarəsizliyinin əvəzini dinc insanları qətlə yetirmək, uşaqları, qadınları öldürməklə çıxmağa çalışır. Ermənistan rəhbərliyi bu cür xain həmlələrlə həm də öz xalqına göstərmək istəyir ki, guya erməni ordusu hələ də ayaqdadır və mübarizə gücünü itirməyib: “Halbuki, Müdafiə Nazirliyinin təqdim etdiyi çoxsaylı faktlar, foto və videomateriallar, o cümlədən, ordumuzun sürətlə irəliləməsi düşmənin hərb maşınının acınacaqlı vəziyyətdə olmasından, böyük və bərpaedilməz itkilərə məruz qalmasından xəbər verir”.
Millət vəkili onu da əlavə etdi ki, Ermənistanın mülki insanlara qarşı həyata keçirdiyi hərbi cinayətlər onun yalnız Azərbaycan üçün deyil, bütün region üçün ciddi təhdid mənbəyi olduğunu sübut edir. Bu təhdidin ortadan qalxması və zərərsizləşdirilməsində ölkəmizlə yanaşı, qonşu dövlətlər, o cümlədən, beynəlxalq təşkilatlar da maraqlı olmalıdırlar.
Günel CƏLİLOVA
