26/10/2020 01:33
728 x 90

Ermənistan Gəncəni kütləvi qırğın silahına növbəti dəfə hədəf etdi - ölü və yaralıların sayı sürətlə artır

Faiq Ələkbərli: “Vaxtilə Hitler Almaniyası bunu etmişdi, indi isə işğalçı Ermənistan faşistlərin yolu ilə gedərək, gecənin yarısı yatmış şəhərə ballistik raket atıb, faşistcəsinə mülki əhalini qətlə yetirib, yaralayıb, evləri dağıdıb”

img

Azərbaycanın ikinci böyük şəhəri, Azərbaycan Xalq mhuriyyətinin ilk paytaxtı olan Gəncə şəhəri son bir neçə həftədə üçüncü dəfədir terrorçu Ermənistanın hücumuna məruz qalır.  Məlum olduğu kimi, işğalçı Ermənistanın silahlı qüvvələri növbəti dəfə Azərbaycanın ikinci böyük şəhəri Gəncəni və iri sənaye şəhəri Mingəçeviri raket atəşinə tutub.

Baki-xeber.com xəbər verir ki, Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev rəsmi “Tvitter” hesabında Azərbaycanın Gəncə və Mingəçevir şəhərlərinin raket hücumlarına məruz qaldığını bildirib: "Humanitar atəşkəsin arxasında gizlənən Ermənistan silahlı qüvvələri terror və hərbi cinayətlərini davam etdirir. Azərbaycanın Gəncə və Mingəçevir şəhərləri raket hücumlarına məruz qalıb. Dağıntı və tələfat dəqiqləşdirilir".

İlkin məlumata görə, ermənilərin hücumu nəticəsində Gəncədə 20-dən çox ev dağılıb. H.Hacıyev Gəncədə mülki şəxslər arasında itkilərin olduğunu açıqlayıb. Hazırda dağıntılar altında qalanların axtarışı davam edir.

"Ermənistana yeni raket sistemləri gətirildi. Bundan dərhal sonra onlar Azərbaycan şəhərlərindəki mülki insanlara xain və qəddarcasına hücum etməyə başladılar" - deyən H.Hacıyev bunu Ermənistanın dövlət terror siyasətinin təzahürü adlandırıb.

Baş Prokurorluq düşmənin Gəncənin mərkəzi hissəsində yaşayan dinc sakinləri raket atəşinə tutması nəticəsində 12 nəfərin həlak olduğunu, 40-dan çox şəxsin yaralandığını, çoxsaylı mülki infrastruktur obyektinə, nəqliyyat vasitələrinə külli miqdarda ziyan dəydiyini açıqlayıb.

Ölənlər arasında uşaqların da olduğu bildirilir. 

H.Hacıyev “Tvitter”də Gəncəyə atılan raketlərin SKAD/Elbrus əməliyyat-taktiki ballistik raketi olduğunu açıqlayıb.

Prezidentin köməkçisi bildirib ki, Gəncəyə qarşı ballistik raketlər Ermənistan ərazisindən atılıb: "Döyüş bölgəsindən çox uzaqdır. Orada hərbi zərurət yoxdur. Ermənistanın Xarici İşlər Nazirliyi bu mənfur müharibə cinayətlərinə görə dövlət məsuliyyətindən boyun qaçırmağa çalışır”.

  • “Mayası nasizmlə, faşizmlə tutulan Ermənistan Azərbaycanın mülki əhalisinə qarşı təşkil etdiyi bütün hücumlarla bəşəriyyət əleyhinə cinayət törədib”

Terror dövləti Ermənistanın Gəncəni növbəti dəfə atəşə tutmasının bəşəriyyət əleyhinə qanlı müharibə cinayəti olduğunu deyən Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli baki-xeber.com-a bildirdi ki, düşmən ordumuz qarşısında zəifliyini, gücsüzlüyünü gizlətmək üçün mülki əhaliyə və obyektlərə, yaşayış binalarına qarşı terror törədir. “İşğalçı Ermənistan dövlətinin növbəti dəfə Gəncə şəhərini, Azərbaycanın mülki əhalisini hədəfə alması və Gəncəyə bu dəfə də ballistik raket atması birbaşa faşizm əlamətidir, nümunəsidir. Yalnız həddən artıq irqçi, şovinist, faşist bir ölkə başqa bir dövlətin ərazisinə ballistik raket ata bilər. Bu gün bu faşizmi, vandalizmi Ermənistan Gəncəyə qarşı edib. Vaxtilə Hitler Almaniyası bunu etmişdi, indi isə işğalçı Ermənistan faşistlərin yolu ilə gedərək, gecənin yarısı yatmış şəhərə ballistik raket atıb, faşistcəsinə mülki əhalini qətlə yetirib, yaralayıb, evləri dağıdıb. Ermənistan açıq şəkildə göstərir ki, o, öz qəddarlığı, terroru ilə heç də faşist Almaniyasından geri qalmır, hətta bəzi məsələlərdə onu ötür də. Ermənistanın həyata keçirdiyi terrorun hədəfi dinc Azərbaycan insanı, körpələr, qadınlar və yaşlılardır. İşğalçı Ermənistanın siyasəti faşizm, njdeizm, nasizmdir. Mayası nasizmlə, faşizmlə tutulan Ermənistan Azərbaycanın mülki əhalisinə qarşı təşkil etdiyi bütün hücumlarla bəşəriyyət əleyhinə cinayət törədib”.

Ermənistanın Azərbaycanın mülki əhalisinə qarşı uzaqmənzilli, xüsusən də ballistik raketlərdən  istifadə etməsinin əsas məqsədinin əhalimiz arasında çaşqınlıq, xof, qorxu, əndişə yaratmaq olduğunu deyən F.Ələkbərli hesab edir ki, düşmən nə qədər terror, təxribat törətsə də, xalqımızın əzmini qıra bilməz, insanlarımızı qorxu və təlaşa sala bilməz. “Ermənistanın bu təxribatı heç insanlarımızı təşvişə, qorxuya sala bilməz. Xalqımız həmişə dövlətinin, ordusunun yanındadır. Bu gün irqçi, faşist Ermənistanın atdığı ballistik raketlər 20-dən çox evi dağıdıb, ölənlərin və yaralananların sayı artır, çünki insanların çoxunu dağıntılar altından axtarıb tapırlar və çıxarırlar. Gəncəyə ballistik raket atmaqla faşist Ermənistan və onun yandaşları heç bir nəticə əldə etməyəcəklər, xalqımızın əzmini qıra bilməyəcəklər. Digər tərəfdən, Paşinyan dünənki açıqlamalarında hələ də ümid edir ki, KTMT-ni, yaxud Rusiyanı Azərbaycanın haqlı savaşına qarşı dayanmaq üçün cəlb edə bilər. Paşinyan Azərbaycan Ordusunun zəfərli yürüşünü dayandırmaq üçün ümidini hələ də Rusiyaya, yaxud KTMT-yə bağlayır. Çünki Azərbaycan Ordusu qarşısında Ermənistanın dayanacaq bir gücü qalmayıb.

Ermənistanın növbəti dəfə Gəncəyə hücum etməsinin, dünən isə Naxçıvana raket atmasının əsas məqsədi Rusiyanı, KTMT-ni, qardaş Türkiyəni və digər ölkələri bu məsələyə cəlb etmək, müharibənin coğrafiyasını daha da böyütməkdir. Məğlub ölkə olan Ermənistan daha çox vəhşiliklər edir, insanlığa sığmayan addımlar atır, bəşəri cinayətlər törədir və bununla da müharibəni genişləndirmək istəyir. Ölkə başçısı İlham Əliyev də dəfələrlə antiterror əməliyyatından əvvəl deyib ki, Ermənistanın Azərbaycanla təkbətək duracaq gücü yoxdur, əgər varsa, buyursun meydana. Əslində, işğal altında olan ərazilərimizdə həyata keçirilən antiterror əməliyyatları da sübut etdi ki, bəli, dövlət başçısı haqlıdır, Ermənistan təklikdə Azərbaycanın qarşısında dura bilməz. Yəni, bütün hallarda, Azərbaycan xalqının milli ruhu 27 sentyabrla bir daha oyanıb, istər 10, istərsə də 50 milyonluq Azərbaycan xalqı olsun, bu, artıq yeni bir mərhələnin başlanğıcıdır. 2020-ci ilin 27 sentyabr tarixi Azərbaycan xalqının tarixi bir dönüş, birlik, dünyada özünü təsdiq etmək mərhələsidir” - deyən müsahibimiz bildirdi ki, ona görə terrorçu, irqçi, şovinist, düşmən Ermənistanın mülki əhalimizə qarşı atdığı bu addımlara Azərbaycan dövləti işğalçı dövlətin hərbçilərini və hərbi obyektlərini vurmaqla cavab verir, torpaqlarını işğaldan azad etməyə davam edir. 

F.Ələkbərli qeyd etdi ki, Ermənistanın heç bir terroru xalqımızın oyanmış ruhunu sarsıda bilməz, əksinə, düşmənə qarşı mübarizədə bizi daha da gücləndirir, həmrəy edir.

İradə SARIYEVA

Son xəbərlər