Yunanıstan Azərbaycana yeni təyin olunmuş səfirini geri çağırıb. Yunanıstan səfirliyindən də təsdiqlənən informasiya Yunanıstan Respublikasının Xarici İşlər Nazirliyinin Tvitter səhifəsində paylaşılıb. Paylaşımda deyilir: “Azərbaycan hökumətinin əsassız iddialarına görə Yunanıstanın Azərbaycandakı səfiri Piperigos Xarici işlər naziri Nikos Dendiasın qərarı ilə Afinaya məsləhətləşməyə çağırıldı”.
Bununla əlaqədar Azərbaycan Xarici İşlər Nazirliyi də məlumat yayıb. Açıqlamada deyilir:
“Ermənistan silahlı qüvvələrinin bu ilin 27 sentyabr tarixində Azərbaycan Respublikasına qarşı başlatdığı yeni təcavüz aktı çərçivəsində xarici ölkələrdən, o cümlədən Yunanıstandan erməni əsilli vətəndaşların döyüşlərdə iştirak etmək məqsədilə Azərbaycanın işğal olunmuş ərazilərinə gəlməsi ilə bağlı açıq mənbələrdə yer alan məlumatlar tərəfimizdən Yunanıstan XİN-in diqqətinə çatdırılıb və bu xüsusda qarşı tərəfə müvafiq araşdırmaların aparılaraq məlumatın verilməsi müraciəti edilib.
Bunun ardınca, Yunanıstan tərəfinin öz səfirini məsləhətləşmələr üçün geri çağırmaq qərarı ilə əlaqədar, Azərbaycan Respublikasının Yunanıstan Respublikasındakı səfiri məsləhətləşmələr üçün Bakıya çağırılıb”.
Qeyd edək ki, Yunanıstanın ölkəmizə yeni təyin olunan səfirinin etimadnaməsini qəbul edərkən ölkə başçısı həmin ölkəyə olan iradlarını sərt formada səfirin diqqətinə çatdırmışdı. Hər halda, Yunanıstanın incikliyinin əsası məhz həmin andan qoyula bilər, sadəcə, dostları Ermənistana qarşı başlanan hərbi təzyiqlərin fonunda bu addımları ilə onlara dəstək ifadə etdiklərini düşünürlər. Yunanıstanın bizə yönəlik bu uğursuz təzyiq taktikası hansı nəticələri doğura bilər?
Politoloq Əhəd Məmmədli “Bakı-Xəbər”ə bildirdi ki, Yunanıstanın bu addımı təsadüfən atılmayıb: “Çox doğru deyiblər ki, dost və düşmən dar gündə tanınır. Biz də indiki çətin məqamda münasibətlərdən bunu görürük. Məsələn, Fransanın Ermənistanı haqsız olduğu halda açıq dəstəkləməsi bizdə ciddi təəccüb yaratmadı. Çünki əvvəldən də bildirdik ki, həmin ölkə ermənipərəstdir. Yunanıstan da Ermənistanın yaxın dostları sırasında yer alır. Onları bir cəbhədə belə sıx birləşdirən amil Türkiyədir. Hər iki ölkənin Türkiyə ilə problemləri var. Aralıq dənizi ətrafında baş verən məsələdə Ermənistan orada formalaşan antitürk blokalarının hamısında yer alırdı. İndi də, güya Yunanıstan dar günlərini yaşayan Ermənistana bu üsulla dəstəyini ifadə etmək istəyir. Bunun doğura biləcəyi nəticə artıq görünür. Azərbaycan çox operativ şəkildə Yunanıstana adekvat cavab verdi və öz səfirini həmin ölkədən geri çağırdı. Yadınızdadırsa, bir müddət əvvəl İlham Əliyev yunan səfirə çox açıq şəkildə fikirlərini ifadə etdi. Azərbaycan hər zaman Türkiyəyə öz dəstəyini ifadə edib. Eyni prosesi biz Türkiyədən də özümüzə qarşı görmüşük. Qarşılıqlı dəstəklərdə hər hansı korporativ maraq güdülməyib. Bu bir qardaşlıq münasibətinin təzahürüdür. Yunanıstanın bizimlə münasibətlərinin soyutmasının ölkəmizə heç bir təsiri ola bilməz. Biz eyni çoğrafiyada yerləşmirik, yaxın qonşu deyilik. Həmin ölkənin özü Avropa İttifaqı üçün yük sayılır. Bundan əlavə, Azərbaycan tərəfi Yunanıstanın diqqətinə çatdırmışdı ki, hazırda Ermənistan ordusunda həmin ölkənin vətəndaşları olan erməni əsilli şəxslər vuruşur. Bununla bağlı tədbir görmək əvəzinə, Yunanıstan səfirini geri çağırır. Deməli, iradla razılaşır. Bizə belə ölkə ilə münasibət qurmaq heç lazım deyil”.
Belə məqamda biz kimin Ermənistanın havadarı olduğunu aydın görürük. Yunanıstan da açıq ermənipərəstliyini ortaya qoydu.
Məhəmmədəli QƏRİBLİ
