Azərbaycan Ordusunun ərazilərimizi işğaldan azad etmək istiqamətində başladığı əks-hücum Ermənistanı dünya qarşısında diz çöküb yalvarmağa vadar edib. Nikol Paşinyan bu 10 günlük müddət ərzində, demək olar ki, bütün beynəlxalq təşkilatlara və dünya liderlərinə zəng edərək atəşkəsin təmin edilməsini istəyib.
Azərbaycan qazandığı hərbi üstünlüyü sayəsində artıq diplomatiyada şərt diqtə edən tərəf statusundadır. Bununla bağlı son mövqeyimizi də Prezident İlham Əliyev açıq şəkildə ifadə edib. Buna baxmayaraq, beynəlxalaq qurumların vasitəçilik cəhdləri davam edir.
Azərbaycanın Xarici işlər naziri Ceyhun Bayramov Cenevrəyə işgüzar səfərlə yola düşüb. Bu barədə XİN məlumat yayıb. Səfərin məqsədi ATƏT-in Minsk Qrupunun həmsədrləri ilə görüşmək və münaqişənin həlli ilə bağlı Azərbaycanın mövqeyini qarşı tərəfin diqqətinə çatdırmaqdır. Göründüyü kimi, Ceyhun Bayramovun səfərində məqsəd nəyisə müzakirə etmək deyil, konkret olaraq mövqeyimizi bir daha həmsədrlərin diqqətinə çatdırmaqdır.
Bildirilir ki, Ermənistanın xarici işlər naziri Zöhrab Mnatsakanyan isə oktyabrın 12-də Moskvaya rəsmi səfər edəcək. Bu barədə Ermənistan XİN-in mətbuat katibi Anna Naqdalyan bildirib: “Bir müddətdir ki, Ermənistanın xarici işlər naziri Zöhrab Mnatsakanyanın Moskvaya rəsmi səfərinin təşkili üçün işlər aparılır. Səfər 12 oktyabrda baş tutacaq”.
Rusiya Prezidentinin mətbuat katibi Dmitri Peskov isə məlumat verib ki, Vladimir Putinin Moskvaya səfər edən Ermənistanın Xarici işlər naziri Zöhrab Mnatsakanyanla görüşmək planı yoxdur: “Hazırda Prezidentimizin Ermənistan XİN başçısı ilə görüş planı yoxdur. Prezidentin görüş cədvəlində dəyişiklik edilməyib. Bilirsiniz ki, Mnatsakanyan rusiyalı həmkarı Lavrovla yaxından dialoq qurur”.
Qeyd edək ki, Ermənistanın XİN rəhbəri Rusiyaya Dağlıq Qarabağdakı vəziyyətlə bağlı müzakirələr aparmaq üçün səfər edəcək. Mnatsakyanın Moskva səfəri Ermənistanın kompromis axtarışlarının növbəti mərhələsi sayıla bilərmi?
Politoloq Elşən Mustafayev “Bakı-Xəbər”ə açıqlamasında bildirdi ki, Mnatsakanyanın Moskva səfəri Ermənistanın kompromis axtarışları ilə bağlıdır: ”Bilirsiniz ki, son günlər ərzində rəsmi Bakı həm hərb meydanında, həm də diplomatik müstəvidə kifayət qədər cəsarətli addımlar atıb. Doğru deyiblər ki, diplomatların mövqeyini zəfər çalan ordular gücləndirir. Hazırda biz həmin xoşbəxtliyi yaşayırıq. Artıq Ermənistan danışıqlarda baş girələyən tərəf təsirini bağışlamır. Hər vəchlə düşdüyü vəziyyətdən çıxış yolları axtarır. Bunu Paşinyanın telefonların dəstəyini yerə qoymaması da sübut edir. Bütün kanalları işə salırlar ki, atəşkəs əldə edilsin. Ancaq indiki şəraitdə üzərinə öhdəliklərin qoyulmadığı atəşkəs bizə sərf etmir. Bununla Ermənistan vaxt udmaq istəyir. Ermənistan bu münqişə ilə bağlı şıltaqlıqda daima Rusiyaya güvənirdi. Həmin ölkəni özünün qarantoru sayırdı. Hesab edirdi ki, Rusiya heç vaxt Azərbaycanın öz ərazilərini hərbi yolla təmizləməsinə biganə qala bilməz. Ancaq biz gördük ki, Rusiya tam neytrallıq nümayiş etdirir. Son 10 gündə Paşinyan 5 dəfə Putinlə telefonla danışıb. Putinin son açıqlaması bu oldu ki, hərbi əməliyyatlar Ermənistanın daxilində getmədiyi üçün onların müdaxiləsi olmayacaq. Görünən budur ki, Ceyhun Bayramov Cenevrəyə şərt irəli sürməyə, Mnatsakanyan isə Moskvaya şərt qəbul etməyə gedib. Təbiidir ki, bu atmosferi də yaradan bizim şanlı ordumuzun son zəfərləridir. Ermənistan bizim şərtlərimizi qəbul etməyə məcburdur. Artıq Paşinyandan əhali sülh tələb edir. Ermənistan hakimiyyətində xəyanətkarların olduğu rəsmən etiraf edilir. Vəziyyət o həddə çatıb ki, belə çətin məqamda Paşinyan xüsusi xidmət orqanının rəhbərini istefaya göndərdi. Bütün bunlar onu deməyə əsas verir ki, Ermənisatnın müharibəni uzatmaq üçün resursu yoxdur. Taqətdən düşmüş ordu Paşinyana şərtlərimizi qəbul etməyi diqtə edir”.
Hər halda, Paşinyan daha ağır vəziyyətə düşməmək üçün bizim şərtləri qəbul edib, topaqları öz xoşuna azad etməlidir.
Məhəmmədəli QƏRİBLİ
