“...Beləliklə, bizim müasir türk avadanlığını, o cümlədən döyüş dronlarını almağımız faktı heç kim üçün problem olmamalıdır. Çünki Ermənistan silahları pulsuz əldə edir. Biz onlara görə pul ödəyirik, Ermənistan pulsuz alır...” Bu fikirləri Prezident İlham Əliyev oktyabrın 7-də “Euronews” televiziyasına müsahibəsində bildirib.
Dünya təcavüzkar Ermənistanın pulsuz silahla təmin edilməsinə niyə dözür, niyə bu fakta reaksiya vermir?
Siyasi şərhçilər bildirirlər ki, bununla Prezident İlham Əliyev təcavüzkar, işğalçı dövlətin pulsuz silahlandırılması, təcavüzə məruz qalan Azərbaycanın isə öz vəsaiti hesabına özünü müdafiə etmək üçün silah alması məsələsini beynəlxalq aləmin diqqətinə çatdırmaqla terrorçu ölkəyə bu və digər şəkildə dəstək göstərən ölkələrin olduğunu bəyan edib.
Ekspertlər hesab edirlər ki, beynəlxalq təşkilatlar Ermənistanın hansı dövlətlər tərəfindən silahlandırıldığını yaxşı bilir, lakin müxtəlif səbəblərdən buna reaksiya vermək istəmirlər.
Arzu Nağıyev: “...bu, beynəlxalq təşkilatlara bir mesaj idi ki...”
Millət vəkili, siyasi icmalçı Arzu Nağıyev bizimlə söhbətində bildirdi ki, Ermənistan silahları guya kreditlə aldığını deyir. “Cənab Prezident də öz çıxışlarında bu məsələyə toxunub. Ümumiyyətlə, Azərbaycan və dünya ictimaiyyəti də bilir ki, guya onlar silahları kreditlə alırdılar. Bu kreditləri ödəyə bilməyəndə isə öz təşkilatlarını, cəmiyyətlərini kredit əvəzinə ödəyirdilər. Təbii ki, vaxtilə bu silahlar verilməsəydi, bunlar bu silahları belə yolla əldə etməsəydilər, bu gün gəlib bu cür vəziyyət alınmazdı. Şübhəsiz ki, bunu dünya ictimaiyyəti də bilir. İstər Minsk Qrupunun həmsədrliyində təmsil olunanlar, istərsə də digər beynəlxalq təşkilatlar indi hansısa sülhə çağırış addımları atmamışdan əvvəl bunun qarşısını almalı idilər. Çox təəssüflər olsun ki, deklorativ bəyanatlar verməklə onlar öz missiyalarını bitmiş hesab edirdilər. Buna görə də belə bir vəziyyət alındı. Cənab Prezidentin də “Euronews”a verdiyi müsahibə çox mühüm məsələ idi, bu, beynəlxalq təşkilatlara bir mesaj idi ki, heç kim öz boynuna düşən məsuliyyəti, günahı, səhvləri kiminsə üzərinə qoymağa çalışmasın” - deyə A.Nağıyev qeyd etdi.
Məhərrəm Zülfüqarlı: “Dünya birliyi Ermənistanın pulsuz silahlandırılması məsələsinə ona görə reaksiya vermir, dözüm göstərir ki...”
AVCİA-nın vitse prezidenti, tarixçi və siyasi icmalçı Məhərrəm Zülfüqarlı “Bakı-Xəbər”ə bildirdi ki, Ermənistan Azərbaycan torpaqlarını təkbaşına, öz gücünə işğal etməyib, bu mənfur əməli həyata keçirməkdə onu pulsuz silahlandıran, ona dəstək olan ölkələr olub. “Birincisi, dünya birliyi Ermənistanın pulsuz silahlandırılması məsələsinə ona görə reaksiya vermir, dözüm göstərir ki, onlar yalnız özlərinə sərf edən, özlərinin eşitmək, görmək istədikləri məsələlərə reaksiya verirlər. Görmək və eşitmək istəmədikləri baş verəndə isə bunu eşitməzliyə, görməzliyə vururlar. Ermənistanın, bütövlükdə, erməni xalqının bədbəxtliyi ondadır ki, daim başqa dövlətlərin əlində oyuncaq olublar. Əsrlər boyu ermənilərdən bir alət kimi fransızlar da, ruslar da, almanlar da, başqa xalqlar və dövlətlər də istifadə ediblər. Biz müasir dövrdə də bunun şahidiyik. Nə üçün Ermənistana pulsuz silah verilir, yaxud onlar niyə kreditlə silah ala bilirlər? Prezident İlham Əliyev demişkən, o kredit də kağız üzərində qalır, heç onu ödəyə bilmirlər də. Çünki Ermənistanda marionet rejim hökm sürür və işğalçı ölkəni silahlandıranlar da bu ölkə vasitəsilə öz istədiklərini həyata keçirirlər. Ermənistana ianə olaraq pulsuz verilən silahlar da köhnə, istifadə müddəti çoxdan başa çatmış silahlardır, həmin silah da işə yaramır. Ermənistana “yardım” adı ilə verilən silahların çoxu işləmir, raketlər partlamır. Mənə elə gəlir ki, bu məsələni bizdən çox ermənilər təhlil etməlidirlər ki, bu gülünc vəziyyətdən özlərini çıxarsınlar. Nə qədər onun-bunun qapısında süfrəsinin tör-töküntüsünü yeməklə məşğul olacaqlar? Ermənistan heç vaxt özünün taleyini həll etmək gücündə olmayıb, bu marionet dövlətin taleyini həmişə Rusiya, Fransa, Almaniya, İngiltərə, ABŞ və başqa dövlətlər həll ediblər”.
M.Zülfüqarlı hesab edir ki, bu cür mənfur toplumun bizimlə qonşu olması bölgəyə çox böyük problemlər gətirib. “Birinci və İkinci Rusiya-İran müharibəsindən sonra ermənilərin bizim ərazilərimizə, Cənubi Qafqaza köçürülməsi özü yanlış addım olub” - deyə M.Zülfüqarlı qeyd etdi.
İradə SARIYEVA
