Mayası saxtakarlıq, hiylə və məkrlə tutulan ermənilər tarix sahəsində o qədər ağılasığmaz saxtakarlıqlar ediblər ki, gərək dünyanın bir çox beyin mərkəzi, tarix tədqiqatçısı ayrıca bir “elm sahəsi” kimi bunları araşdırıb, erməni yalanlarını tarixdən birdəfəlik silib atsın.
Hələ keçən əsrin əvvəllərindən etibarən bədnam erməni tarixçiləri müxtəlif saxta xəritələrin yaradılması işinə başlayıblar. Erməni tarixçilərinin bu saxtakar əməlləri Sovet dövründə daha geniş miqyas alıb. Azərbaycanın tarixi ərazilərində özlərinə “vətən” yaradan ermənilər sonradan bu ərazilərin tarixini saxtalaşdıraraq onları “qədim erməni məskəni” olaraq bütün kitablarda, xəritələrdə əks etdiriblər. Özlərini dünyanın “ilk sakinləri” kimi təqdim etmək iddiasında bulunan ermənilər uzun illər bundan əvvəl rus dilində bir xəritə çap ediblər. Azərbaycan Ordusunun Dağlıq Qarabağda həyata keçirdiyi əks-hücum əməliyyatları zamanı işğal dövründə Azərbaycan ərazilərinə köçürülən ermənilərin evindən bir xəritə tapıblar. Sosial şəbəkələrdə yayılan bu xəritədə ermənilərin həqiqətə uyğun olmayan, reallığı əks etdirməyən həmin o saxta xəritəsi yayılıb. Üzərində “Armeniya strana boqov, strana Adama, Yevı, Noya - Armeniya veçna kak sama zemlya” sözləri yazılan bu saxta xəritə böyük təhlükə mənbəyidir. Qeyd etdiyimiz kimi, qondarma erməni tarixçilərinin hazırladığı bu cür qondarma xəritələr çoxdur.
Tarixçilər bildirirlər ki, vaxtilə erməni tarixçilərinin işlətdiyi bu cinayəti müasir erməni tarixçiləri işlədirlər. 1918-ci ilə qədər dünyanın heç bir yerində Ermənistan adlı dövlətin olmadığını deyən tarixçilər bildirirlər ki, indiki Ermənistan Respublikası əzəli Azərbaycan-türk torpaqlarında, İrəvan xanlığının ərazisində yaradılıb, İrəvan şəhəri onlara siyasi mərkəz kimi verilib. Ermənilərin-hayların, ümumiyyətlə, dünyanın hansısa bir yerində əraziyə, dövlətə sahib olması barədə heç bir tarixi fakt yoxdur, onlar həmişə qaraçı kimi köçəri həyat keçirib, o ölkədə, bu ölkədə sığınacaq alıb yaşayıblar.
“İşğalçı Ermənistan dövlətinin siyasəti budur - özlərinə aid olmayan torpaqlara iddia etmək”
Tarixçi Təranə Salahovanın “Bakı-Xəbər”ə bildirdiyinə görə, ermənilərin tarixdə özlərinə sığışdırıb yeganə “öyünməli olduqları” məkan Anahid məbədidir ki, burada da erməni qızları və oğlanları “qədim peşə” ilə məşğul olublar. “Ermənistanın rus dilində çap etdiyi qondarma xəritədə “Allahların ölkəsi, yaxud Adəmin, Həvvanın, Nuhun ölkəsi, Ermənistan yer kürəsi kimi əbədidir” şəklində bir əsassız iddia ortaya qoyması gülüncdür. Nuh Peyğəmbər Azərbaycan torpaqlarına, Naxçıvan ərazisinə, Ağrı dağına gəlib çıxıb, bu zaman isə bizim torpaqlarımızda erməni-hay adlı toplumun bir təmsilçisi belə olmayıb. Bir müddət əvvəl bəzi erməni tarixçiləri iddia edirdilər ki, guya dünyanın ilk sakini ermənilər olub, bütün xalqlara mədəniyyəti onlar bəxş edib. Bu o qədər ağ yalandır ki, sözlə ifadə etmək çox çətindir. Ermənilər son yüz ildə çoxlu sayda saxta, qondarma xəritə “icad edib” və o xəritələri müxtəlif dillərə tərcümə edərək həm çap ediblər, həm də son illər onları internet resurslarında yerləşdiriblər. Üzərində “Armeniya strana boqov, strana Adama, Yevı, Noya - Armeniya veçna kak sama zemlya” sözləri yazılan bu xəritəni də ermənilər məqsədli şəkildə hazırlayaraq çap ediblər. Erməni alimlərinin çap etdiyi bu saxta xəritələr ermənilərə ona görə paylanıb ki, onları bu istiqamətdə aparılan saxtakarlıq kampaniyasına şərik etsinlər. Əlbəttə, bu xəritələrdə əks olunan ərazilər də, yerlər də, şəhərlər də ermənilərə aid deyil. Tarixi Azərbaycan torpaqlarında özlərinə “dövlət quran” ermənilər bununla kifayətlənməyib, başqa ərazilərimizə qarşı iddia irəli sürdülər, nəticədə havadarlarının dəstəyilə Azərbaycan torpaqlarını işğal etdilər. Bu gün şanlı ordumuz Azərbaycan torpaqlarını erməni tapdağından azad edir.
Erməni separatçıları, saxtakar tarixçiləri yazdıqları kitablar, hazırladıqları xəritələr vasitəsilə Türkiyəyə, Gürcüstana, Rusiyaya qarşı ərazi iddiaları ortaya qoyurlar. İşğalçı Ermənistan dövlətinin siyasəti budur - özlərinə aid olmayan torpaqlara iddia etmək” - deyə T.Salahova qeyd etdi.
T.Salahovanın sözlərinə görə, Ermənistan tərəfindən çap edilib yayılan bu saxta xəritələrə, nəhayət ki, dünya alimləri münasibət bildirməlidirlər. Ermənilərin dünyanın ən qədim xalqların mədəniyyətinə, ədəbiyyatına, tarixinə, əlifbasına qarşı irəli sürdükləri iddialar cavabsız qalmamalıdır. T.Salahova hesab edir ki, erməni saxtakarlığı ilə mübarizə prosesinə bütün dünya alimləri qoşulmalıdır. “Bu qondarma xəritə də, başqaları da müxtəlif dillərdə çap olunub yayılır, amma hələ ki, dünya alimləri buna qarşı etirazını bildirib, bu xəritələrin yalan üzərində qurulduğunu demək istəmirlər. Ermənilər çap etdikləri saxta xəritələrə yalnız Azərbaycan ərazilərini daxil etmir, həmçinin, Gürcüstan, Rusiya və digər ölkələrə aid torpaqları da qeyd edir və bunu dünyaya yayırlar. Ermənilərin saxta xəritə təbliğatının qarşısı beynəlxalq ictimaiyyət, dünyanın böyük elm mərkəzləri tərəfindən alınmalıdır, əks halda növbəti çap ediləcək xəritələrdə Qərb dövlətlərinin də əraziləri “qədim erməni torpağı” kimi təqdim ediləcək. Ermənilərdən hər cür təxribat gözləmək olar. Çünki onlar təxribatçıdırlar. Cinayətkar cəzasız qalanda yeni-yeni cinayətlərə əl atır” - deyə müsahibimiz vurğuladı.
İradə SARIYEVA
