“Biz, Bakı Dövlət Universitetinin bir qrup ağsaqqal professor-müəllim heyəti Sizə müraciət edərək bildiririk ki, xalqımız Sizin qətiyyətinizdən və iradənizdən ruhlanır, möhtəşəm fəaliyyətinizi daim yüksək qiymətləndirir, bütün sahələrdə yürütdüyünüz məqsədyönlü və müdrik siyasətinizi ürəkdən dəstəkləyir. Əsası müstəqil Azərbaycan Respublikasının memarı və qurucusu, Azərbaycan xalqının Ümummilli lideri Heydər Əliyev tərəfindən qoyulan siyasi kursun layiqli davamçısı kimi Sizin son 17 ildə apardığınız uğurlu daxili və xarici siyasət, təşəbbüsünüz və rəhbərliyinizlə həyata keçirilən çoxsaylı dövlət proqramları, sosial layihələr nəticəsində Azərbaycan xalqı, Azərbaycan Respublikası əsas məqamları aşağıdakı tezislər formasında ifadə olunan bir sıra nailiyyətlər əldə edib:
- Azərbaycan iqtisadi cəhətdən inkişaf etmiş qüdrətli bir dövlətə çevrilib. Bu gün Azərbaycan artıq dünyanın inkişaf etməkdə olan dövlətləri sırasından inkişaf etmiş dövlətlər sırasına adlamaq ərəfəsindədir;
- Azərbaycanın beynəlxalq nüfuzu əhəmiyyətli dərəcədə yüksəlib. Azərbaycan bu gün dünyada irimiqyaslı layihələrin təşəbbüskarı və uğurlu icraçısına, çoxsaylı beynəlxalq tədbirin keçirildiyi mərkəzə çevrilib;
- Azərbaycan bir sıra beynəlxalq təşkilatlara, o cümlədən, 155 dövlətin dəstəyilə BMT Təhlükəsizlik Şurasına qeyri-daimi üzv seçilib, 2019-2022-ci illər üçün 120 dövlətin təmsil olunduğu Qoşulmama Hərəkatına sədrlik etməyə başlayıb;
- Azərbaycan Ordusunun döyüş qabiliyyətinin artırılması, Silahlı Qüvvələrin maddi-texniki bazasının möhkəmləndirilməsi sahəsində həyata keçirilən ardıcıl tədbirlər nəticəsində Azərbaycan Ordusu ölkəmizin müdafiəsini və təhlükəsizliyini təmin etmək qabiliyyətinə malik olan qüvvəyə çevrilib, dünyanın ən güclü 50 ordusu sırasında yer alıb;
- Azərbaycan artıq dünyada sayı məhdud olan kosmik ölkələr sırasına daxil edilib;
- ölkədə sabitlik, sağlam ictimai-siyasi mühit, ən yüksək səviyyəli xalq-iqtidar birliyi yaranıb;
- Azərbaycan müstəqil daxili və xarici siyasət yürüdən, müstəqil mövqeyi ilə seçilən dövlət kimi tanınıb;
- nüfuzlu beynəlxalq təşkilatlar tərəfindən Azərbaycan həqiqətlərinin etiraf edilməsinə, Dağlıq Qarabağ münaqişəsinə dair milli maraqlarımızı əks etdirən mühüm qərarların qəbul edilməsinə nail olunub;
- milli-mənəvi dəyərlərin, dini etiqad azadlığının, konfessional və etnik müxtəlifliyin, multikulturalizm və tolerantlıq ənənələrinin qorunub saxlanması və inkişafı təmin edilib;
- əhalinin sosial müdafiəsi əhəmiyyətli dərəcədə gücləndirilib, regionların hərtərəfli inkişafı təmin edilib, ölkənin sosial-mədəni və təsərrüfat infrastrukturu tamamilə yenilənib;
- qeyri-neft sənayesi ardıcıl şəkildə inkişaf etdirilib, ölkə iqtisadiyyatı üçün mühüm əhəmiyyət kəsb edən və müasir texnologiyalara əsaslanan minlərlə yeni müəssisə fəaliyyətə başlayıb;
- Azərbaycanda demokratik təsisatlar möhkəmləndirilib, siyasi plüralizm, söz azadlığı, mətbuat azadlığı, sərbəst toplaşma azadlığı, siyasi fəaliyyət azadlığı, insan hüquq və azadlıqları təmin edilib, vətəndaş cəmiyyəti institutları gücləndirilib;
- Azərbaycan Avrasiyada mühüm tranzit və logistika mərkəzlərindən birinə, Cənubi Qafqazda ən böyük istehsal və intellektual potensiala malik ölkəyə, regionun enerji, nəqliyyat, logistika, humanitar dialoq mərkəzinə çevrilib;
- vətənə, dövlətə, dövlətçiliyə, milli-mənəvi dəyərlərə bağlı olan Azərbaycan gəncliyi formalaşıb;
- ölkədə səmərəli və çevik dövlət idarəçiliyi mexanizmi formalaşdırılıb.
…Bütün bunlar və burada sadalanmayan bir sıra digər nailiyyətlər son günlər təcavüzkar Ermənistanın ölkəmizə qarşı törətdiyi növbəti təxribatlarının, xain hücumlarının qarşısını almaq, əhalimizin təhlükəsizliyinin və beynəlxalq təşkilatlar və dünya dövlətləri tərəfindən tanınan və qəbul edilən ərazi bütövlüyümüzün təmin edilməsi məqsədilə Sizin rəhbərliyinizlə müzəffər Azərbaycan Ordusu tərəfindən aparılan əks-hücum əməliyyatlarında hər gün, hər saat əldə edilən qələbə və zəfərlərin əsas rəhnidir, sabaha daha böyük ümidlərlə baxmağa zəmin yaradır. Qısa müddətdə əldə edilən və Böyük Qələbəmiz üçün mühüm əhəmiyyətə malik olan bu uğurların qarşısında xüsusilə son illər öz rəhbərlərinin yarıtmaz fəaliyyəti nəticəsində fəlakətə sürüklənən Ermənistan xeyli cılız və miskin görünür”.
Bu fikirlər AMEA-nın müxbir üzvləri Aydın Kazımzadə, Məsumə Məlikova, Vasif Babazadə, Elşad Qurbanov, Təhsin Mütəllimov, AMEA-nın həqiqi üzvləri Məhəmməd Mehdiyev, Yusif Məmmədov, professorlar İzzət Rüstəmov, Cahangir Məmmədli, Həmid Vəliyev, Qüdrət İsmayılzadə, Tapdıq Həsənov, Firuzə Abbasova, Ağalar Abbasbəyli, Musa Bayramov, Məmməd Yaqubov, Ralfrid Həsənov, Yalçın Əlizadə, Məmməd Fətəliyev, Şövqisəfa Göyçaylı tərəfindən Prezident İlham Əliyevə ünvanlanan müraciətdə bildirilir.
Elm xadimləri, həmçinin, qeyd edirlər ki, Prezidentin 27 sentyabr və 4 oktyabr tarixlərində xalqımıza etdiyi müraciətlərində, “Rossiya-1”, “Əl-Cəzirə”, “Əl-Ərəbiyyə”, “TRT Haber” televiziya kanallarına verdiyi müsahibələrində, son günlər keçirdiyi müxtəlif səviyyəli görüşlərdə dəfələrlə qeyd etdiyi kimi, biz haqq-ədalət tərəfindəyik. “Biz bu gün tarixi ədaləti bərpa edirik, ərazi bütövlüyümüzü bərpa edirik. Xalqımızın və dövlətimizin yeni tarixini yazırıq, şanlı tarixini yazırıq. Biz tarixin ən şərəfli anlarını yaşayırıq. Çünki öz doğma dədə-baba torpaqlarımızı işğalçılardan azad edirik.
Eyni zamanda, Siz hələ də xalqımıza xas olan humanizm prinsiplərini əsas tutaraq milli maraqlarımızı əks etdirən yeganə bir şərt irəli sürməklə qarşı tərəfə atəşkəs rejiminin bərpa edilməsi üçün sonuncu bir şans verilməsinin də mümkünlüyünü bəyan edirsiniz. Bunun üçün Ermənistan rəhbərliyi Azərbaycan xalqından üzr istəyərək Azərbaycanın ərazi bütövlüyünü tanıdığını etiraf etməli, qoşunların işğal edilmiş ərazilərimizdən çıxarılmasını əks etdirən vaxt cədvəli təqdim etməli və deməlidir ki: “Qarabağ Ermənistan deyil”.
İnanırıq ki, qarşı tərəf xislətinə uyğun işğalçılıq siyasətini davam etdirərək bu şansdan da istifadə etmək iqtidarında olmadıqda, Sizin rəhbərliyinizlə rəşadətli ordumuz tərəfindən işğal altında olan bütün torpaqlarımız tezliklə azad olunacaq, xalqımızın 30 illik intizarına birdəfəlik son qoyulacaq.
Biz o günü səbrsizliklə gözləyirik. Əminik ki, o gün mütləq gələcək və o gün bizimlə birlikdə bütün şəhidlərimizin də ruhu şad olacaq.
Biz haqlıyıq, biz zəfər çalacağıq! Qarabağ bizimdir, Qarabağ Azərbaycandır!” - deyə elm xadimləri vurğulayırlar.
Baki-xeber.com
