Qarabağ cəbhəsində düşmənin törətdiyi saysız terror və təxribatlara qarşı Azərbaycan Ordusunun əks-hücum əməliyyatları davam edir. Azərbaycanın ərazi bütövlüyünün təmin edilməsi, işğalçı ordunun torpaqlarımızdan çıxarılması uğrunda şanlı ordumuzun düşmən üzərində qazandığı böyük üstünlüklər düşməni çaş-baş salıb.
Paşinyan və onun hakimiyyətində təmsil olunanlar aldığı zərbələrdən o qədər sarsılıblar ki, artıq sayıqlamağa başlayıblar. Deyə bilərsiniz ki, Ermənistanın sayıqlaması adi haldır və burada təəccüblü heç nə yoxdur. Razıyam. Amma budəfəki sayıqlamaları daha çox təxribatla yüklənib.
Hər şeydən əli üzülən Ermənistan işğalçı ordusunu torpaqlarımızdan çıxarmaq əvəzinə, yenidən “münəccimlik” etməyə başlayıb. Ermənistan indi də iddia edir ki, guya Qafqazda Azərbaycan və Türkiyə tərəfindən ermənilərə “ikinci genosid hazırlanır”. Ermənistan bu yolla dünyanı aldatmaq, beynəlxalq aləmin diqqətini yayındırmaq, çaşdırmaq niyyəti güdür. Burada, təbii ki, söhbət Dağlıq Qarabağ problemini həll etməkdən getmir, Ermənistanın yeni çürük və həqiqəti əks etdirməyən “ikinci genosid” söhbətini ortaya atmasından gedir. Hətta bu həqiqətdən uzaq, sırf erməni hiyləsinə, məkrinə söykənən bu məsələ Paşinyanın əhaliyə müraciətində də əks olunub.
“...dünya dövlətləri Paşinyanın və digərlərinin bu cəfəng iddiasını qəbul etməyəcəklər”.
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, Ermənistanın bu cəfəng iddiası diqqəti Dağlıq Qarabağ probleminin həllindən uzaqlaşdırmağa və torpaqlarımızı işğalda saxlamağa yönəlib, işğalçı ölkənin bu iddiasına beynəlxalq ictimaiyyət inanmamalıdır. “Ermənistanın hərbi-siyasi rəhbərliyinin hər cür oyunlara, yalanlara əl atması, ilk növbədə, Azərbaycanın hərbi əməliyyatları dayandırmasına hesablanıb. Məğlub durumda olan başda Baş nazir Paşinyan olmaqla Ermənistan rəhbərliyi hər cür vasitələrə əl atır ki, Azərbaycan Ordusunun uğurlu hərbi əməliyyatlarını dayandırmasına nail olsun, eyni zamanda, Azərbaycan Ordusunun Dağlıq Qarabağı və digər ərazilərimizi işğaldan azad etməsinin qarşısını alsın. Bilirik ki, Ermənistanın Azərbaycanın cəbhəyanı və cəbhədən çox-çox uzaqda yerləşən ərazilərini, yaşayış məntəqələrini uzaqmənzilli raketlərlə və digər qurğulardan atəşə tutması birbaşa Azərbaycan əhalisinin məhvinə yönəlib. Hətta “Rosiya-24” kanalına müsahibəsində Paşinyanın sözçüsü bildirdi ki, Ermənistanın məqsədi Azərbaycan əhalisində qorxu, təşviş yaratmaqdır. Buna görə də onlar uzaqmənzilli raketlərdən istifadə etməklə Azərbaycanın iri şəhərlərini, xüsusən də Gəncə, Mingəçevir kimi şəhərləri vurur və hətta Xızıya, Abşerona da raketlər atırlar. Ermənistanın bizim yaşayış məntəqələrimizi uzaqmənzilli raketlər vasitəsilə vurması təsadüfi deyil, bu, əhalimiz arasında panika yaratmağa hesablanıb. Bunu Paşinyanın sözçüsü də açıq şəkildə bildirib. Ermənistanın bu təxribatı baş tutmadı, əhalimiz qorxuya, təşvişə düşmədi, əksinə, daha da əzm, qorxmazlıq nümayiş etdirdi. Bundan sarsılan düşmən başqa oyunlara əl atır, onlardan biri də “genosid” oyunudur. Artıq Ermənistan 27 sentyabrdan başlayaraq öz aləmində dünya ictimaiyyətinə çatdırmaq istəyir ki, guya Azərbaycanla Türkiyə bir yerdə “ermənilərə qarşı soyqırım həyata keçirmək aktına başlayıblar”. Şübhəsiz ki, bu, cəfəngiyyatdır və kökündən yanlış bir iddiadır. Bütün dünya ictimaiyyəti, istər Ermənistanı müdafiə edən, istərsə də etməyən ölkələr olsun, fərq etməz, böyük əksəriyyət Ermənistanın iç üzünü çox yaxşı tanıyır. Yeri gəlmişkən, beynəlxalq ictimaiyyətin ermənilərin hər yalanına inandığını deyə bilmərik. Çünki beynəlxalq ictimaiyyətin xeyli hissəsi ermənilərin yalan danışdığını yaxşı bilir. Türkiyə başda olmaqla, Pakistan, Ukrayna, İsrail, Əfqanıstan, Gürcüstan, Latviya və digər başqa bir çox ölkə artıq Ermənistanın hansı məkrli siyasət yürütdüyünü, necə oyunlar oynadığını yaxşı bilir. Ancaq ermənilər bu gün üçün bütün məsələlərdən maksimum yararlanmağa çalışırlar. Bildiyimiz kimi, istər Paşinyanın, istərsə də Ermənistanın formal prezidenti Armen Sarkisyanın dilindən “türklər birləşib bizi qıracaqlar, bizi soyqırım edəcəklər” kimi əsassız iddialar səsləndirməklə özlərini beynəlxalq ictimaiyyət qarşısında gülünc vəziyyətə salırlar. Bir tərəfdən bu iddianı irəli sürürlər, digər tərəfdən isə Sarkisyan son müsahibəsində deyir ki, biz Çingiz xanlarla, Teymurilərlə savaşırıq. Bilirsiniz ki, orta əsrlərdə türklər böyük uğurlar əldə ediblər, türk dövlətləri Avropanın əsas hakim dövlətləri olublar. İstər Atillanın, istər Sultan Süleyman Qanuninin, istər Teymurilərin dövründə 3-4 əsrə qədər türk dövlətləri Avropada hökmranlıq ediblər. Başda fransızlar olmaqla, bir çoxunun içində hələ də bir türk qorxusu, türkə qarşı nifrət var. Bu, xalq arasında olmasa da, rəhbərliklərində var. Ermənistan da indi bundan istifadə etməyə çalışır ki, “baxın, türklər yendən birləşiblər, bizə qarşı genosid edirlər” - deyirlər. Terrorçu Ermənistan hökuməti “Azərbaycan və Türkiyə birləşib bizə qarşı genosid aktı törədəcəklər” kimi əsassız iddianı səsləndirməklə əslində, atəşkəsə nail olmaq istəyir, vaxt qazanıb bundan sonra yenidən öz çirkin cinayətlərini həyata keçirməkdə davam etsinlər”.
Ermənistanın hazırda “genosid” iddiasından yararlanmaq istədiyini deyən F.Ələkbərli bildirdi ki, işğalçı ölkə “biz soyqırıma məruz qala bilərik, bizi qorumaq lazımdır” deməklə münaqişəyə daha çox tərəfi cəlb etməklə müdafiə olunmaq istəyir. “Burada üçüncü tərəf də var. Mümkün qədər Rusiyanı və KTMT-ni bu oyuna cəlb etmək istəyir. Rusiya isə hələlik yaxın durmur. Bildiyimiz kimi, yaşayış məntəqələrimizə uzaqmənzilli raketlər atmaq vasitəsilə əhalimiz arasında qorxu, təşviş yaratmaq, eyni zamanda, nəinki yerli və regional, eləcə də beynəlxalq əhəmiyyətli obyektləri, strateji yerləri, Bakı-Ceyhan neft kəmərini, Mingəçevir elektrik stansiyasını vurmaqla təşviş yaratmağa cəhd edirlər. İkincisi, burada əsas məsələlərdən biri “genosid”, üçüncüsü isə Rusiyanı prosesə cəlb etmək məsələsidir ki, bunların heç birində də heç nəyə nail ola bilməyiblər. Əksinə, bu onların bir daha iç üzünün beynəlxalq ictimaiyyətə bəlli olmasına səbəb olub. Sadəcə, indi Ermənistan “genosid” məsələsindən daha çox yapışıb Qərb dövlətlərinin köməyilə Azərbaycan Ordusunu işğal altında olan torpaqlarımızın işğaldan azad edilməsi işindən uzaqlaşdırmaq istəyir. Ortada Azərbaycan Ordusunun apardığı uğurlu əməliyyatlar var. Bu da Ermənistanı əməlli-başlı sarsıdıb. Onlar bütün saxtakarlqılardan, “göz yaşın”dan istifadə etməklə hərbi əməliyyatları dayandırmaq istəyirlər. Əlbəttə, Ermənistanın hərbi-siyasi rəhbərliyinin ortaya yeni atdığı “genosid” iddiası özünü doğrultmayacaq, obyektiv olan dünya dövlətləri Paşinyanın və digərilərinin bu cəfəng iddiasını qəbul etməyəcəklər”.
Bu gün dünyanın bir çox ölkəsinin Azərbaycana dəstək verməsindən, onların Azərbaycanın ədalətli mübarizəsinin yanında olmasını bəyan etməsindən çox ciddi narahatlıq keçirən Ermənistan yeni iddialar ortaya atır. F.Ələkbərli qeyd etdi ki, burada ermənilərin genosidindən söhbət gedə bilməz, biz öz haqlı davamızı aparırıq və torpaqlarımızdan terrorçuları, işğalçı ordunu təmizləyirik.
İradə SARIYEVA
