İşğalçı Ermənistanın Baş naziri Nikol Paşinyanın sonu yaxınlaşır. Artıq erməni ictimaiyyəti Paşinyanın mühakimə olunmasını tələb edir və müxtəlif mətbuat orqanlarında bununla bağlı fikirlər, çağırışlar yer alır.
Erməni mətbuatı yazır ki, Paşinyan öz siyasi komandası ilə hər şeyə görə cavab verəcək. Düşmən mətbuatında Paşinyana qarşı “İstefa ilə canını qurtara bilməz”, “İndi məğlubiyyəti necə izah edəcəksən?” kimi ittihamlar, fikirlər yer alır. Paşinyanı “ağ yuyub, qara sərən” mətbuat orqanlarının önündə “ArmenianReport” gedir. Bu mətbu orqanın əməkdaşı Nils Arutyunyants bununla bağlı geniş bir yazı yazıb və Paşinyanın hərəkətlərini, bacarıqsızlığını ciddi şəkildə tənqid edib.
Onu da yadınıza salaq ki, bir müddət əvvəl Ermənistanın Vatikandakı keçmiş səfiri Mikael Minasyan da Paşinyanın erməni xalqı tərəfindən mühakimə ediləcəyini demişdi. “Xalqın özü sizi mühakimə edəcək”.
Bildirək ki, Prezident İlham Əliyev oktyabrın 5-də Türkiyənin “TRT Haber” televiziya kanalına müsahibədə “Erməni xalqı öz hökumətini məsuliyyətə cəlb etməlidir. Öz hökumətinin yarıtmaz, çirkin siyasətinin nəticəsində bu döyüşlər baş verdi” - deyə bildirib.
Prezident İlham Əliyevin səsləndirdiyi fikir artıq özünü təsdiqləyir, erməni xalqı mətbuatın əli ilə Paşinyanı ittiham edir və mühakimə etməyə başlayıb.
“Prezidentimizin dediklərinin hamısı baş verir”
“Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, Paşinyanın istefaya getməsi, onun xalq tərəfindən ittiham edilməsi, mühakiməyə cəlb edilməsi nəinki mətbuat vasitəsilə baş verir, hətta artıq bu, real şəkildə özünü göstərir. “Bu qaçılmazdır ki, yaxın müddətdə erməni xalqı ayağa qalxıb Paşinyanın istefasını tələb edəcək. Onun istefasına nail olub mühakimə edilməyə cəlb edəcək. Paşinyan Ermənistanın ən pis rəhbər kimi tarixin zibil yeşiyinə atılacaq. Çünki buna səbəblər çoxdur. Paşinyan hakimiyyətdə olduğu iki il müddətində gəlməmişdən əvvəl verdiyi vədlərin heç birini yerinə yetirmədi. Paşinyan hakimiyyətə Soros Fondunun dəstəyilə gəlib və ətrafına da Soros Fondunun müxtəlif təşkilatlarına çalışan adamları yığıb. Təbii ki, bu, xüsusi bir proqram idi. Paşinyan hakimiyyətə gəlməmişdən əvvəl onsuz da pis vəziyyətdə olan erməni xalqına ölkənin iqtisadiyyatı, sosial təminatı, xarici siyasəti və s. böyük yalan, populist vədlər verib. Öz ağalarına arxalanan Paşinyan bu vədlərlə öz hakimiyyətini möhkəmlətmək istəyirdi. Amma keçən dövr sübut etdi ki, bunlar hamısı populist vədlər olub və o, Ermənistanda sadaladığımız heç bir sahədə iş görmədi. Əksinə, onun fəaliyyəti dövründə Ermənistan iqtisadiyyatı daha da böhrana düşdü, insanların sosial problemləri daha da dərinləşdi. Onun Ermənistan-Azərbaycan Dağlıq Qarabağ münaqişəsilə bağlı verdiyi populist vədlər də sonradan onu gülünc vəziyyətə saldı. Bu gün üçün də onun populist çıxışları hesabına artıq cəbhədə döyüşlər gedir və Paşinyan tərəfindən erməni xalqı zorla müharibəyə sürüklənib. Paşinyan yaxşı bilir ki, Dağlıq Qarabağ heç vaxt Ermənistanın olmayacaq və bu mümkün olan iş deyil. Dağlıq Qarabağ Azərbaycanın ərazisidir və Azərbaycanın ərazi bütövlüyü çərçivəsində bütün dünya tərəfindən tanınıb. Azərbaycan sülh danışıqlarına gedirdi, amma Paşinyanın “Qarabağ Ermənisandır”, qondarma rejim danışıqlar prosesində iştirak etməlidir kimi populist şüarını səsləndirməsi, eyni zamanda, başqa ölkələrə ərazi iddiaları ilə bağlı qəbul etdiyi doktrina, Rusiya ilə münasibətlərin kəskin pisləşməsi və başqa amillər onun xarici siyasətdəki naşılığının nəticəsidir. Sonda Paşinyan Azərbaycanın səbr kasasını daşdırdı və Azərbaycan da haqlı olaraq danışıqlardan imtina edərək əks-hücum əməliyyatları ilə tarixi ərazilərinin bərpasını həyata keçirir. Bütün cəbhələrdə Paşinyanın, Ermənistanın ağır məğlubiyyəti, təbii ki, onun istefasını reallaşdıracaq və xalq onu açıq şəkildə mühakimə edəcək. Cənab Prezident İlham Əliyevin haqlı olaraq dediyi “Erməni xalqı öz hökumətini məsuliyyətə cəlb etməlidir. Öz hökumətinin yarıtmaz, çirkin siyasətinin nəticəsində bu döyüşlər baş verdi” fikirləri özünü çox keçmədi ki, doğrultdu. Prezidentimizin dediklərinin hamısı baş verir, Paşinyan erməni xalqı tərəfindən ittiham edilir, xalq onun cəzalandırılmasını tələb edir. Bu gün Pasinyan bütün cəbhələrdə məğlub olub, bu da onun sonunu gətirir” - deyə Ş.Ağayev bildirdi.
İradə SARIYEVA
