Azərbaycan humanitar dəhlizlərin açılması, beynəlxalq humanitar hüququn norma və prinsiplərinin tətbiq edilməsinə hazır olduğunu bildirib və bununla bağlı erməni əhalisinə müraciət edib.
Bunu Azərbaycan Müdafiə Nazirliyinin Mətbuat xidmətinin mətbuat katibi, polkovnik-leytenant Anar Eyvazov deyib: “Müraciət həyatını qurtarmaq məqsədilə könüllü qaydada təslim olmaq istəyən düşmənin hərbi qulluqçularına da şamil edilib”.
Ekspertlərin fikrincə, bu məsələ ilə bağlı Azərbaycanın erməni əhalisinə müraciəti dövlətimiz tərəfindən atılan humanist bir addımdır, Azərbaycan bununla bir daha bütün beynəlxalq qayda-qanunlara ciddi şəkildə riayət etdiyini göstərir.
“...humanitar dəhlizin saxlanması üçün öhdəliyini yerinə yetirir”
Qarabağ Azadlıq Təşkilatının (QAT) sədri Akif Nağı bizimlə söhbətində bildirdi ki, indiyə kimi beynəlxalq təşkilatlar Azərbaycanın haqlı mövqeyini qəbul etməyib, Azərbaycanın müraciətlərinə laqeyd yanaşıblar, Azərbaycan torpaqları işğala məruz qaldığı halda, Ermənistana qarşı tədbir görməyiblər, “balanslaşdırma” mövqeyi göstəriblər. “Haqq-ədalətsiz dünyada Azərbaycan həmişə haqlı və ədalətli mövqedən çıxış edib, beynəlxalq hüquq normalarına hörmət edib. Növbəti dəfə də Azərbaycan dövləti Prezidentin mövqeyi, atdığı addımları və qəbul etdiyi qərarla beynəlxalq hüquq normalarına sadiq olduğunu göstərdi. Azərbaycan dövləti həm dünya təcrübəsinə, həm də beynəlxalq normalara görə müharibə şəraitində dinc əhalinin çıxması üçün humanitar dəhlizin saxlanması üçün öhdəliyini yerinə yetirir və bunu rəsmi şəkildə bəyan edib. Bu, Azərbaycan dövləti tərəfindən atılan humanist bir addımdır. Azərbaycan həm dinc əhalinin, həm də işğalçı ordunun hərbçiləri olmalarına baxmayaraq, hərbçilərin də çıxması üçün humanitar dəhliz açır və bunu rəsmən bəyan edib. Əslində, işğalçı ordunun hərbçiləri ilə amansız davranılmalıdır, amma Azərbaycan yenə də humanistlik göstərir, onlara da dəhliz verir. Hesab edirəm ki, bununla Azərbaycan özünün insani, bəşəri humanist mövqeyini bir daha dünyaya nümayiş etdirir. Beynəlxalq təşkilatlar Azərbaycanın bu mövqeyinə dəyər verməlidirlər. İşğalçı Ermənistan da başa düşməlidir ki, Azərbaycan belə sivil, mədəni bir ölkədir və bu ölkəyə qarşı ərazi iddialarından əl çəkməli, işğalçı qoşunlarını torpaqlarımızdan çıxarmalıdır. Biz indiyə qədər bütün beynəlxalq hüquq normalarına, öhdəliklərə əməl etmişik, hərbə əl atmırdıq, amma Ermənistan bunu dərk etmədi və biz də məcbur olub hərbə əl atdıq. Azərbaycan yenə də müharibə şəraitində beynəlxalq birlik qarşısında öz öhdəliklərini yerinə yetirir. Amma təəssüf ki, yenə də haqsız mövqe görürük”.
Avropa İnsan Haqları Məhkəməsinin Türkiyənin Azərbaycan tərəfdə hərbi əməliyyatlarda iştirak etməsi iddiası ilə bağlı araşdırma aparmadan, faktları yoxlamadan, tələm-tələsik, ədalətsiz qərar qəbul etdiyini deyən A.Nağının sözlərinə görə, Türkiyə hərbi əməliyyatlarda iştirak etmir. “Azərbaycandan müraciət ediləndə ən tezi 5 il sonra baxılır. Amma necə olur ki, işğalçı Ermənistanın əsassız iddiasına tez baxılır və Türkiyəyə qarşı ədalətsiz qərar qəbul edilir. Bu tam haqsız bir dünyadır. Dünya bizə qarşı belədir. Amma biz yenə də öz borcumuzu, öhdəliyimizi beynəlxalq birlik qarşısında yerinə yetiririk. Yetirməliyik. Amma, ən azından, haqq nazilər, üzülməz. Hökmən üstünlük bizim olacaq. Hesab edirəm ki, burada Azərbaycan beynəlxalq hüquq normalarına əməl etməklə yanaşı, eyni zamanda, BMT nizamnaməsi ilə beynəlxalq hüquq normaları ilə ona verilən haqqını reallaşdırmalıdır və torpaqlarımız işğaldan azad edilməlidir. Bu məsələdə dayanmaq yoxdur. Bütün Azərbaycan cəmiyyətinin mövqeyi bundan ibrarətdir ki, heç bir halda dayanmaq olmaz. Bu məsələ, birmənalı şəkildə, hərbi yolla öz həllini tapmalıdır” - deyə A.Nağı vurğuladı.
İradə SARIYEVA
