Oktyabrın 1-də səhər saatlarında Ermənistanın Gorus rayonu ərazisindən Azərbaycan ərazisi atəşə tutulub. Bu barədə Müdafiə Nazirliyi məlumat yayıb. Ermənistandan atılan raketlər Cəbrayıl-Füzuli ərazisindəki cəbhə xəttinə düşüb. Azərbaycan Müdafiə Nazirliyi Ermənistan tərəfindən tələb edib ki, Azərbaycan ərazisinin atəşə tutulmasını dərhal dayandırsın, əks təqdirdə adekvat cavab tədbirləri görüləcək.
Prezidentin köməkçisi Hikmət Hacıyev də məsələyə münasibət bildirib. Onun sözlərinə görə, Ermənistan silahlı qüvvələrinin qəsdən və hədəflənmiş şəkildə yaşayış məntəqələrini artilleriyadan atəşə tutması nəticəsində, ikisi uşaq olmaqla, 17 nəfər mülki şəxs həlak olub, 51 nəfər yaralanıb: “Dövlət və özəl mülkiyyətə zərər dəymişdir. Ermənistanın bu əməlləri ilə sivil dəyərlərdən kənar olan ölkə olduğunu və növbəti dəfə mülki insanlara və azyaşlı uşaqlara qarşı xain hücumlar törədən ölkə olduğunu göstərir. Hərbi əməliyyatlar şəraitində mülki insanların hədəfə alınması və ya qəsdən öldürülməsi hərbi cinayətdir. Ermənistan dövləti və Ermənistanın siyasi-rəhbərliyi buna görə məsuliyyət daşıyır. Ölkəmizə qarşı növbəti təcavüz aktı kimi bu gün Ermənistanın Gorus rayonu istiqamətindən Azərbaycan ərazisi raket atəşinə məruz qalmışdır. Bu artıq Ermənistan ərazisindən Azərbaycana qarşı həyata keçirilən ikinci hücum aktıdır. Birinci hücum Ermənistanın Vardenis rayonu ərazisindən həyata keçirilmişdir. Raket zərbəsi nəticəsində məcburi köçkünlər üçün yeni salınmış Cocuq Mərcanlı kəndində 20-yə yaxın evə zərər dəymişdir. Ermənistan tərəfinə xəbərdarlıq edirik ki, Ermənistan ərazisindən Azərbaycana qarşı hücumlar dayandırılmadığı halda, atəşi həyata keçirən legitim hərbi hədəflərə qarşı adekvat tədbirlər görüləcəkdir”.
Əslində Ermənistanın öz ərazisindən Azərbaycanı raket atəşinə tutmasaında güddüyü niyyət məlumdur. Düşmən hər vəchlə çalışır ki, konfliktə başqa tərəfləri cəlb etsin. Xüsusilə də üzvü olduğu KTMT-ni. Dəfələrlə belə niyyətini açıqlasa da, həmin qurum hansısa ölkənin daxili işinə qarşımadığını bildirib. Bunun üçün də Ermənistan istəyir ki, Azərbaycan cavab olaraq onun ərazisinə atəş açsın və nəticədə erməni təbliğat maşını, güya Türkiyə ilə Azərbaycanın onların ərazisinə hücum etdiyinə dair səs-küy salıb, KTMT-nin diqqətini cəlb etsin. Ermənistanın bu niyyəti həyata keçə bilərmi?
Politoloq Elşən Mustafayev “Bakı-Xəbər”ə açıqlamasında bildirdi ki, Azərbaycan Ordusunun əks-hücumu nəticəsində ciddi itkilər verən Ermənistan, nəyin bahasına olursa-olsun, Rusiyanı münaqişəyə cəlb etmək istəyir: “Paşinyan bu yöndə dəridən-qabıqdan çıxır. Rusiya telekanalına müsahibəsində hər vəchlə inandırmağa çalışırdı ki, güya Türkiyə bu müharibədə birbaşa iştirak edir. Bu yalanı işə keçməyəndən sonra başqa təxribatlara əl atdı. Əvvəl Rusiyanın liderliyi altında fəaliyyət göstərən Kollektiv Təhlükəsizlik Müqaviləsi Təşkilatını (KTMT) prosesə cəlb etmək üçün Azərbaycan Ordusunun guya Ermənistanın Vardenis şəhərinə artilleriya zərbəsi endirdiyini iddia etdi. Qarabağ dünya birliyi tərəfindən Azərbaycanın ərazisi kimi tanındığı üçün, Paşinyan hökuməti KTMT-nı münaqişəyə cəlb etmək məqsədilə Vardenislə bağlı məqsədli dezinformasiya yaydı. Beləliklə, Ermənistan ərazisinə hücum barədə məqsədli dezinformasiya yayan rəsmi İrəvan Kollektiv Təhlükəsizlik Müqaviləsinə hərbi yardım üçün zəmin yaratmağa çalışır. Amma Azərbaycan Ordusunun yalnız dünya birliyi tərəfindən tanınan öz ərazisində hərbi əməliyyat apardığını nəzərə aldıqda, KTMT-nın məsələyə neytral mövqe sərgiləməsi və yalnız atəşkəsə çağırış üçün bəyanat verməsi gözlənilir. Çünki biz analoji mövqeyi bir neçə dəfə görümüşük. Məhz bu səbəbdən də Ermənistan öz ərazisisindən yaşayış məntəqələrimizi raket atəşinə tutur ki, adekvat cavab alsın və sonrakı şüvənlik üçün zəmin yaratsın”.
Ermənistanın bu təxribatının baş tutacağı inanadırıcı deyil. Çünki KTMT formatında Azərbaycana dost bir neçə ölkə də təmsil olunur.
Məhəmmədəli QƏRİBLİ
