Qonşu Gürcüstan Azərbaycanla tərəfdaşlıq münasibətlərinə sadiq qalaraq, ərazisindən Ermənistana silah daşınmasına icazə vermədi. Bundan başqa, məlumata görə, Gürcüstan ərazisində olan Ermənistan vətəndaşlarının İrəvana getməsinə də icazə vermir. Gürcüstanda olan bir sıra ermənilərin əsas məqsədi isə Ermənistana keçib, buradan Dağlıq Qarabağa getməkdir. Amma Gürcüstan buna icazə vermir və belə vəziyyət ermənilərin Tiflisə qarşı radikallaşmasına səbəb olub.
Bu fonda yayılan məlumata əsasən, Ermənistan mediasında Gürcüstanı münaqişəyə cəlb etmək istəyi müşahidə olunur. Artıq Ermənistan KİV-ləri Gürcüstanı Azərbaycanın mövqeyini dəstəkləməkdə ittiham edir və gürcülərə öz gələcəklərini düşünməyi tövsiyə edirlər. Bu fonda Gürcüstanın Samtsxe-Cavaxetiya bölgəsindən olan bir qrup erməni “könüllülər taboru” yaradaraq Ermənistana getmək istəyib. Onlar özləri ilə avtomobil şinləri və ərzaqla dolu yük maşınlarını da Ermənistana aparmağa cəhd ediblər. Gürcüstan hökuməti öz ərazisindən hərbi təyinatlı yüklərin daşınmasını qadağan etdiyi üçün gürcü sərhədçilər onları buraxmayıb. Ermənilərlə gürcü sərhədçiləri və hüquq-mühafizə orqanları əməkdaşları arasında qarşıdurma yaranıb. Qarşıdurmadan sonra Ermənistan pasportuna sahib olan yüzdən çox erməni sərhəddən buraxılıb və onlar Ermənistana gedib. Digərləri isə sərhədi keçə bilməyib. Bundan sonra Ermənistan tərəfi Gürcüstan hökumətinə və gürcü xalqına qarşı ittihamlar irəli sürüb, onları Azərbaycanpərəst mövqedə günahlandırıblar.
“Armenianreport” portalı bu xüsusda yazır: “Gürcülər bilməlidirlər ki, azərbaycanlılar və türklərlə oyun yaxşı nəticə verməyəcək. Ermənilər 2021-ci ildə gözlənilmədən Cavaxetiyaya yerli sakinləri qorumaq üçün ordu göndərəndə qoy gürcülər bizdən inciməsinlər”. Gürcüstan tərəfi isə bəyan edib ki, sərhədçilər qanun çərçivəsində hərəkət ediblər. O da vurğulanır ki, koronavirus pandemiyasına görə sərhədlər hər iki tərəfin, yəni Gürcüstan və Ermənistanın razılığı əsasında bağlanıb. Sərhədçilər həm bu baxımdan, həm də hökumətin Gürcüstan ərazisindən hərbi təyinatlı və hərbi məqsədlər üçün yüklərin daşınmasına qoyduğu qadağanın icrası baxımından öz vəzifələrini dəqiq yerinə yetiriblər. Amma indi Ermənistan bunu qəbul etmir. Digər tərəfdən Gürcüstan hökuməti ölkə ərazisindən dövlət tərəfindən hərbi məqsədlərlə istənilən yüklərin tranziti üçün istifadəsini qadağan edib. Gürcüstan parlamentinin Müdafiə və təhlükəsizlik məsələləri üzrə komitəsinin sədri İrakli Sesiaşvili bildirib ki, Gürcüstanın qonşuları bunu bilir və bu yanaşmaya anlayışla yanaşırlar. Komitə sədrinin sözlərinə görə, Gürcüstan münaqişə ilə bağlı məlum səbəblərə görə, bir növ, bitərəf mövqe tutur: “Çünki həm Azərbaycan, həm də Ermənistanla olduqca yaxşı qonşuluq münasibətlərimiz var. Biz hazırkı vəziyyəti təhlil edirik və bütün ssenarilərə hazırıq”.
Erməniləri narazı salan digər məqam Gürcüstanın sabiq prezidenti, hazırda Ukrayna Milli İslahatlar Şurasının İcraiyyə Komitəsinin rəhbəri Mixeil Saakaşvilinin mövqeyidir. Çünki o, birmənalı şəkildə Azərbaycanı dəstəkləyir: “Mənim mövqeyim ərazi bütövlüyü prinsipinə əsaslanır, yəni Dağlıq Qarabağ Azərbaycan Respublikasının suveren ərazisidir və heç bir şey onu dəyişdirməyəcək. “Əlbəttə, bölgədən didərgin salınan əhalinin öz yurdlarına qayıtmaq haqqı var. Onların sülh şəraitində yaşamaq hüququ var və bu hüquq qorunmalıdır”. Ermənistan parlamentinin keçmiş üzvü Artur Bağdasaryan Saakşavilinin mövqeyini təbii sayır: “Saakaşvilinin hakimiyyət illəri Ermənistanla münasibətlərdə müsbətdən çox mənfilər gətirdi. Çünki o, əsas xarici siyasət kursunu Azərbaycan və Türkiyə ilə əlaqələr qurmaqda gördü. Əslində, o bununla Ermənistana qarşı iqtisadi və siyasi təzyiqlərə rəvac vermiş oldu. İndi də eyni mövqedədir”. Saakaşvili beynəlxalq arenada Azərbaycanın maraqlarını müdafiə edən çıxışları ilə diqqət çəkmişdi. Hələ 2019-cu ilin avqustunda jurnaslistlərə açıqlamasında “Qarabağ Azərbaycandır” deyərək Ermənistan baş naziri Nikol Paşinyanın başlatdığı polemikaya öz münasibətini göstərmişdi. Bu cəsarətli mövqedən sonra Ermənistanın hakim dairələri və mətbuatında ona düşmən münasibət daha da güclənib. Elə indinin özündə də bu yanaşma Ermənistan tərəfindən davam etdirilir. Saakaşvili isə, bunlara rəğmən, Azərbaycanı Gürcüstanın əsas strateji müttəfiqi adlandırır.
Daha bir maraqlı məqam Tiflisdə ermənilərin “Ayartun” adlı mədəniyyət, maarifləndirmə və gənclər mərkəzinin Gürcüstanda fəaliyyət istiqamətlərinə uyğun olmayan və ölkə qanunvericiliyinə zidd fəaliyyət göstərməsidir. Mərkəzin rəsmi “Facebook” səhifəsində erməni əsilli faşist Qaregin Njdenin fotoşəkli yerləşdirilib. Fotoya faşist cəlladının “Əgər millət orduya çevrilirsə, onu diz çökdürmək mümkün deyil” sözləri də əlavə olunub. Səhifədə, həmçinin, erməni dilində Ermənistan ordusuna bir neçə dəstək şüarı da yer alıb. “Ayartun” artıq uzun illərdir Ermənistanın işğalçılıq siyasətini təbliğ edərək təcavüzkar dövlətin Gürcüstanda təbliğat mərkəzinə çevrilib. Azərbaycan kimi işğaldan əziyyət çəkən Gürcüstanın aidiyyəti dövlət qurumlarının mədəniyyət mərkəzi adlandırılan bu təşkilatın qanunsuz fəaliyyətinə müvafiq reaksiya verməsi artıq zərurətə çevrilir.
Qeyd edək ki, Gürcüstanda faşizmin təbliğatı 2011-ci ildən qanunla qadağan edilib.
Nahid SALAYEV
