Dünya mediasının gündəmində yenə əsas yer alan mövzulardan biri də Ermənistan təxribatlarından sonra cəbhədə ordumuzun düşmənə qarşı başladığı əks hücumdur. Ermənistan bu xüsusda dünya ictimaiyyətini Azərbaycan əleyhinə yönəltməyə çalışsa da, artıq əks effektlə üzləşib. Bunu rus hərbi ekspert İqor Korotçenko “Moskva-Bakı” portalına açıqlamasında da təsdiq edir.
Hərbi ekspertin sözlərinə görə, Azərbaycan bu gün beynəlxalq hüquq normalarına, özünümüdafiə hüququna müvafiq surətdə hərəkət edir. O qeyd edib ki, erməni ordusu Azərbaycanın işğal olunmuş ərazilərində hərbi təxribatlar həyata keçirir və Azərbaycan beynəlxalq hüquq normaları baxımından cavab əməliyyatları üçün bütün hüquqlara malikdir: “Mən dəfələrlə demişəm ki, Dağlıq Qarabağ münaqişəsinin nizamlanmaması regionda gələcəkdə böyük müharibəyə əsasdır. Üstəlik, Ermənistan tərəfindən şüurlu hərəkətlərin olmamasını da nəzərə almaq lazımdır. Biz daim İrəvanın hərbi təxribatlarını, qorxunc informasiya yaymaqla məşğul olduğunu görürük. Nikol Paşinyanın səbatsız siyasi vəziyyəti hərbi təxribat yolunu onun üçün salamat qalmağın yeganə variantı edir. Nikol Paşinyan Qarabağ istiqamətində təxribatla əhalinin diqqətini daxili siyasət sahəsində uğursuzluqdan, ölkədə fəlakətli iqtisadi vəziyyətdən, koronavirusla mübarizədə iflasa uğramaqdan yayındırmağa çalışır. Bunların hesabını ondan soruşmasınlar deyə o, qəsdən hərbi münaqişə törədir və Azərbaycanı təqsirləndirir. Paşinyanın hərəkətlərinin məntiqi, bax budur, bu, siyasi fırıldaqçının və hakimiyyət xatirinə hər cür təxribata, o cümlədən hərbi təxribatlara hazır olan insanın hərəkətlərinin məntiqi nəticəsidir”.
Korotçenko ordumuzun gücü qarşısında Ermənistanın aciz olduğunu da bildirir: “Bu gün Azərbaycan işğal edilmiş Füzuli və Cəbrayıl rayonlarında özünün 7 kəndini döyüş nəticəsində geri alıb, strateji yüksəkliklərini qaytarıb. Bu nədən xəbər verir? Bu, Azərbaycan Silahlı Qüvvələrinin qüdrətinə görə regionda ən yaxşı ordu olmasını bir daha sübut edir. Azərbaycan ordusu yaxşı motivasiya olunub, axı, onun hərbi qulluqçuları haqq işi uğrunda vuruşurlar, onlar öz Vətənlərinin işğal olunmuş ərazilərini geri qaytarırlar. Bu səbəbdən onlar yüksək vətənpərvərlik ruhu ilə seçilirlər. Erməni hərbi qulluqçuları isə, hətta nə uğrunda vuruşduqlarını bilmirlər – onlar özlərinin olmayan ərazilər uğrunda vuruşurlar. Azərbaycan ordusu səriştəlilik səviyyəsinə, Silahlı Qüvvələrin texniki təchizatına, azərbaycanlı komanda kadrlarının səviyyəsinə, generalların, zabitlərin hazırlığına görə yalnız əla qiymətə layiqdir”. Ekspertin sözlərinə görə, Azərbaycan öz ərazilərinin erməni tapdağı altında olduğu şəraitdə milli maraqlarını müdafiə edir. Belə şəraitdə bundan sonrakı təmkinlilik mövqeyi sadəcə mümkün deyildi, Azərbaycan cavab verməli idi: “Tam qətiyyətlə bircə onu deyə bilərəm ki, Azərbaycan beynəlxalq hüquq normalarına, özünümüdafiə hüququna müvafiq surətdə hərəkət edir. O, on illər ərzində erməni işğalçılarının tutduğu Azərbaycan kəndlərini azad edir”.
Ekspertlər hesab edir ki, indiki halda iqtisadi imkanlarını, daxili siyasi vəziyyətini analiz etdikdə birmənalı şəkildə Ermənistanın müharibə edəcək gücdə olmadığı üzə çıxır. Düşmənin ordusunun şəxsi heyətinin sayını, texniki imkanlarını Azərbaycan ordusu ilə müqayisə edəndə, işğalçı ölkənin yenidən müharibəyə başlamasının daha ağır nəticələrə gətirib çıxarması qaçılmaz görünür. Azərbaycan ordusunun qüdrətini isə indiki hərbi əməliyyatlar da sübut edir. Ermənistan tərəfinin təxribatlarının qarşısı uğurlu əks-hücum əməliyyatları ilə alınır. Bu isə o deməkdir ki, ordumuz işğal altında olan torpaqlarımızı azad etməyə, düşmənin bütün strateji hədəflərini məhv etməyə qadirdir. Hərbi potensialımızın təkmilləşdirilməsinin nəticəsidir ki, Azərbaycan ordusu adını dünya miqyasında güclülər sırasına daxil edib. Beynəlxalq hərbi ekspertlərin də etiraf etdiyi kimi, müdafiə qüdrəti artan Azərbaycan ordusu yeni hərbi əməliyyatların gedişində işğal altındakı bütün ərazilərini tam azad etməyə qadirdir. Rusiya Siyasi Tədqiqatlar İnstitutunun direktor müavini Darya Qrevtsova da məsələyə eyni prizmadan yanaşır. O qeyd edib ki, Azərbaycan Prezidenti İlham Əliyev BMT-nin iclasında beynəlxalq ictimaiyyəti Ermənistanın davranışına və Azərbaycanın işğal edilmiş ərazilərinin dinc yolla, danışıqlar vasitəsilə azad edilməsini nəzərdə tutan BMT qətnamələrini yerinə yetirməkdən inadla imtina etməsinə diqqət yetirməyə nahaqdan səsləmirdi: “Beynəlxalq təşkilatların fəaliyyətsizliyi ona gətirib çıxardı ki, sərhəddə növbəti təxribatların gedişində sentyabrın 27-də hərbi əməliyyatlar başlandı. Azərbaycan daim sülh danışıqlarında təkid edə bilməz, xüsusən ona görə ki, onun vətəndaşları – hərbçilər və dinc əhali həlak olur. Digər tərəfdən, Azərbaycan ordusunun hərbi-texniki təchizatı erməni silahlı qüvvələrini əhəmiyyətli dərəcədə üstələyir. Prezident İlham Əliyevin fəaliyyəti Azərbaycan cəmiyyətində yüksək dəstəklənir. Türkiyənin dəstəyi də Azərbaycan ordusunun mənəvi ruhunu xeyli möhkəmləndirir. Türkiyənin bir çox KİV-i bu günlərdə Azərbaycana dəstək manşetləri ilə dərc edilib”. Qrevtsova əminliyini bildirib ki, Azərbaycan ordusunun üstünlüyü Ermənistanı sülh müqaviləsi imzalamağa və sərhədlərin blokadadan çıxarılması və demilitarizasiyası qarşılığında Dağlıq Qarabağ ətrafındakı 7 rayonu Azərbaycana qaytarmağa məcbur edəcək: “Dağlıq Qarabağ ərazisinin taleyini isə növbəti mərhələdə həll etmək olar. Bu barədə bir neçə il bundan əvvəl Rusiyanın vasitəçiliyi ilə işlənib hazırlanmış “Kazan formulu”nda deyilir. Əks halda Azərbaycan bu torpaqları güc tətbiq etməklə qaytaracaq, lakin böyük itkilər olacaq. Dünya ictimaiyyətinin, beynəlxalq təşkilatların vəzifəsi İrəvana təzyiq göstərməkdir ki, o, sülh sazişini imzalasın”.
Nahid SALAYEV
