Təcavüzkar Ermənistanın hərbi-siyasi rəhbərliyi sentyabrın 27-dən başlayaraq təxribatçı əməllərini davam etdirərək, Cenevrə Konvensiyası ilə üzərinə düşən öhdəliklərini kobud şəkildə pozur, Azərbaycanın dinc əhalisinin sıx yaşadığı əraziləri ağır silahlardan atəşə tutaraq, o cümlədən, mülki şəxslərə qarşı müxtəlif cinayətlər törədir.
Ermənistanın dinc sakinləri - uşaqlar, qadınlar və ahılları qətlə yetirməsinin hərbi cinayət olduğu heç kimə sirr deyil. Belə ki, sentyabrın 27-dən Ermənistan silahlı qüvvələrinin yaşayış məntəqələrimizi atəşə tutması nəticəsində Naftalan şəhərində bütöv bir ailə həlak olub. Bu təcavüz nəticəsində həlak olanlardan ikisi məktəblidir. Məlumat üçün bildirək ki, 2007-ci il təvəllüdlü Şəhriyar Qurbanov və onun əmisi qızı, 2006-cı il təvəllüdlü Fidan Qurbanova Z.Rüstəmov adına Qaşaltı Qaraqoyunlu kənd tam orta məktəbinin şagirdləri idi.
Sentyabrın 28-də, saat 18 radələrində Cəbrayıl rayonu, Cocuq Mərcanlı kənd sakini, 2006-cı il təvəllüdlü Həziyev Hilal İlqar oğlu kənd ərazisində qoyun otararkən erməni silahlı qüvvələrinin açdığı atəş nəticəsində baş nahiyəsindən qəlpə yarası xəsarəti alaraq xəstəxanaya yerləşdirilib.
Fakta görə Cəbrayıl Rayon Prokurorluğunda Azərbaycan Respublikası Cinayət Məcəlləsinin 100.2 (təcavüzkar müharibəni aparma), 120.2.1 (cinayətkar birlik–təşkilat tərəfindən qəsdən adam öldürməyə cəhd), 120.2.4 (xüsusi amansızlıqla və ya ümumi təhlükəli üsulla qəsdən adam öldürməyə cəhd), 120.2.12 (milli, irqi, dini ədavət və ya düşmənçilik niyyətilə qəsdən adam öldürməyə cəhd) maddələri ilə cinayət işi başlanıb.
Qeyd edək ki, silahlı münaqişələr zamanı uşaqların zərər çəkməməsi üçün uşaq hüquqlarının müdafiəsi barədə hələ 1924-cü ildə Millətlər Cəmiyyəti tərəfindən Uşaq hüquqları haqqında Cenevrə Bəyannaməsi, BMT yaradılandan sonra, 1948-ci ildə Baş Məclis tərəfindən İnsan Hüquqları Haqqında Ümumi Bəyannamə, 1959-cu ildə isə Uşaq hüquqları Bəyannaməsi qəbul edilib. 1949-cu il 12 avqust tarixli IV Cenevrə Konvensiyası və 1977-ci il Beynəlxalq silahlı münaqişə qurbanlarının müdafiəsinə dair Cenevrə Konvensiyalarına I əlavə protokol mülki əhalinin, o cümlədən, uşaqların mühafizəsi haqqındadır. 1954-cü ildə uşaqların müdafiəsi üçün BMT-nin Uşaq Fondu (UNİSEF) yaradılıb, 1989-cu il noyabrın 20-də BMT Uşaq Hüquqları Konvensiyasını qəbul edib. BMT Baş Məclisi 2000-ci il yanvarın 26-da Uşaq hüquqları haqqında Konvensiyaya Uşaqların silahlı münaqişələrə cəlb edilməsinə dair Fakültativ Protokol daxil edib. Eyni zamanda, 1998-ci ildən etibarən BMT Baş katibinin uşaqlar və silahlı münaqişələr üzrə ilk xüsusi nümayəndəsi öz işinə başlayıb.
Danılmaz faktdır ki, erməni terrorunun özünəməxsus xüsusiyyətlərindən biri də müxtəlif vasitələrlə azyaşlı uşaqlara qarşı terror aktı həyata keçirməkdir. 1994-cü ildə uşaq oyuncağına partlayıcı maddə quraşdıraraq, Tovuz rayonu ərazisindən axan çaya buraxmaqla ermənilər iki uşağın ölümü ilə nəticələnən terror aktı törətdilər.
2011-ci ildə erməni terrorçular partlayıcı maddənin yerləşdirildiyi uşaq oyuncağından yenə istifadə etdilər. 1998-ci il təvəllüdlü Şahmalıyeva Aygün Zirəddin qızı həlak oldu, anası, 1979-cu il təvəllüdlü Şahmalıyeva Elnarə Məmmədtağı qızı ağır bədən xəsarəti aldı.
2017-ci ildə erməni terrorçularının açdığı atəş nəticəsində 2015-ci il təvəllüdlü, 2 yaşlı Zəhra Quliyeva və nənəsi, 1967-ci il təvəllüdlü Sahibə Quliyeva qətlə yetirildi. 2016-cı ilin Aprel döyüşləri zamanı erməni hərbi birləşmələri ikisi uşaq olmaqla 6 mülki şəxsi qətlə yetirib, 26 mülki şəxsi yaralayıblar.
Bu ilin iyul ayında ermənilərin Tovuz istiqamətində törətdikləri növbəti təxribat hücumu nəticəsində 1944-cü il təvəllüdlü Əziz Əzizov həlak olub.
Bütün bunlara baxmayaraq, münaqişələr zamanı uşaqların təhlükəsizliyi ilə bağlı çox ciddi problemlər var. Dünyada müharibələrdən zərər görən uşaqlar arasında Azərbaycan uşaqları xüsusi yer tutur.
“Ermənilər hər zaman qadın və uşaqları hədəfə alıblar, bu gün də eyni əməllərindən əl çəkmirlər”
Sentyabrın 27-də, saat 06:00 radələrində Ermənistan silahlı qüvvələri növbəti genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutdu. Ermənistan bu dəfə də mənfur və çirkin ənənəsinə sadiq qalaraq mülki Azərbaycan əhalisini atəşə tutdu. Rəsmi məlumata əsasən, uşaq, qadın, qoca olmaqla, mülki vətəndaşlarımız erməni təxribatı nəticəsində həlak olub. Bu bir daha Ermənistan hakimiyyətinin faşist xislətini və cinayətkar mahiyyətini ortaya qoyur. Onlar hər zaman qadın və uşaqları hədəf alıblar. Öncəki hadisələrdə də ermənilər uşaqları hədəfə alırdılar. Bu gün də eyni əməllərindən əl çəkmirlər”.
Xanım millət vəkili son olaraq vurğuladı ki, ordumuzda və cəmiyyətimizdə böyük ruh yüksəkliyi və döyüş əzmi var, xalqımız Ali Baş Komandan, Prezident İlham Əliyevin ətrafında sıx birləşib və qələbənin yaxında olduğuna inanır.
Günel CƏLİLOVA
