Azərbaycan Ordusu cəbhədə Ermənistanın növbəti təxribatlarının qarşısını qətiyyətlə alır və düşmənin hərbi mövqelərinə atəşlər, zərbələr endirir. Ordumuz, eyni zamanda, əks-həmlə əməliyyatı ilə işğal altında olan bir sıra kəndlərimizi, yüksəklikləri azad edib. Azərbaycan əsgərinin bu uğuru bütün xalqımız kimi, cəbhə zonasında yaşayan sakinlərdə də böyük ruh yüksəkliyi yaradıb.
Elə bu səbəbdən də təmas xəttində yaşayan sakinlər düşmən tərəfinin mülki əhalini hədəf almasına baxmayaraq, öz yurdlarını tərk etmirlər. Tərtərdə də Ermənistan silahlı qüvvələrinin mülki evləri atəşə tutmasına baxmayaraq, bir tərtərli belə evini tərk etməyib.
Qeyd edək ki, düşmən atəşi nəticəsində Tərtərdə qaz, su, işıq və digər kommunikasiya xətlərinə ziyan dəyib, düşmən atəşi yaşayış evlərində yanğınlara səbəb olub. Dəymiş ziyan aradan qaldırılıb və yanğınlar söndürülüb.
Baş Prokurorluğun mətbuat xidmətinin yaydığı məlumatda bildirilir ki, sentyabrın 28-də, səhər saat 07 radələrindən başlayaraq düşmən qüvvələri tərəfindən Tərtər rayonunun mərkəzi, o cümlədən, əhalinin sıx yaşadığı kəndlər ağır artilleriyadan intensiv atəşə tutulub. Düşmənin ağır artilleriyadan intensiv atəşi nəticəsində rayonun əsas strateji körpüsünə və Polis Şöbəsinə zərbələr endirilib.
Onu da qeyd edək ki, digər rayonlardan Tərtərə dəstək üçün xeyli sayda insan gəlib. Rayon sakinləri öz ev-eşiklərini tərk etməyəcəklərini açıq şəkildə bəyan edirlər.
“Düşmən yaşayış məntəqələrini atəşə tutur, lakin bu, təmas xəttində yaşayanları əsla qorxutmur, çünki onlar öz torpaqlarındadır və ordumuza güvənirlər”
Sosial sahə üzrə ekspert İlqar Hüseynli qeyd etdi ki, Azərbaycan Ordusu irəliləyir, uğurlu hərbi əməliyyatlar keçirir. Biz torpaqlarımızı işğaldan azad edəcəyik: “Düşmənin cəbhəyanı kəndləri atəşə tutmasına baxmayaraq, əhalinin əhval-ruhiyyəsi yüksəkdir. Çünki Azərbaycanın güclü ordusu, qətiyyətli Ali Baş Komandanı var. Məlumdur ki, düşmən yaşayış məntəqələrini atəşə tutur. Lakin bu, təmas xəttində yaşayanları əsla qorxutmur. Çünki onlar öz torpaqlarındadır və ordumuza güvənirlər”.
Həmsöhbətimiz onu da əlavə etdi ki, Azərbaycan Ordusunun peşəkar və qətiyyətli davranışı ermənilərin niyyətini puç etdi. Ermənilər bilməlidirlər ki, işğalda olan torpaqlarımız kənd-kənd azad olunacaq.
Günel CƏLİLOVA
