Tofiq Yaqublunun işini siyasiləşdirmək istəyənlər tam uğursuzluğa düçar oldular

Tarix: 18.09.2020 / 19:12
Bölmə: Siyasət

Sentyabrın 18-də Bakı Apelyasiya Məhkəməsində 4 il 3 ay müddətinə azadlıqdan məhrum edilməsi barədə hökmə etiraz olaraq aclıq aksiyası keçirən Tofiq Yaqublunun məhkəməsi keçirilib. Hakim Elmar Rəhimovun qərarı ilə T.Yaqublunun vəkilinin vəsatəti təmin edilib və T.Yaqublu ev dustaqlığına buraxılıb. Məhkəmənin qərarı ilə ev dustaqlığına buraxılan siyasətçi Tofiq Yaqublu aclıq aksiyasını dayandırıb. Bu barədə onun yaxınları sosial şəbəkədə məlumat yayıb. Çox maraqlıdır ki, humanizm prinsiplərinə əsaslanaraq Tofiq Yaqublu ilə bağlı yüngül qərarın verilməsini radikal müxalifət və xaricdəki 5-ci kolonun nümayəndələri özlərinin “qələbə”si kimi yozmağa cəhdlər edirlər.

Bundan sui-sitifadə edərək müxtəlif qanunsuz çağırışlar səsləndirilməsi bir daha göstərir ki, heç bir fəaliyyəti olmayan, işi-gücü sosial şəbəkələrdə qeybət, dedi-qodu yaymaq olanlar üçün insan həyatının heç bir dəyəri yoxdur. Hətta Tofiq Yaqublunun ailə üzvləri belə ondan aclığı dayandırmağı tələb etmirdi. Qızı Nigar Həzi atasına aclığı dayandırmaq, bununla da səhhətini daha da pisləşdirməmək kimi tövsiyələr vermək əvəzinə, əksinə, atasını aclığı ölümü bahasına olsa belə davam etdirməyə çağırırdı. Əslində burda təəccüblü nəsə yoxdur. Neftin qiymətinin aşağı düşməsinə, iqtisadiyyatın geriləməsinə sevinənlər, insanların sosial durumunun ağırlaşmasını istəyənlər, koronavirus pandemiyasının geniş yayılmasını arzulayanlardən bundan artıq münasibət gözləmək mümkün deyil. T.Yaqublu ilə bağlı qəbul olunmuş yeni qərar heç kimə dövlətlə şantaj dili ilə danışmağa əsas vermir. Təcrübə göstərir ki, təzyiq, şantaj və bu kimi yollarla Azərbaycan dövlətinə, hakimiyyətə, məhkəməyə təsir etmək mümkün deyil.

Gəlin, Tofiq Yaqublu ilə bağlı baş verən prosesin əsl mahiyyətinə fikir verək. Əslində, törətdiyi cinayət əməli məhkəmədə sübuta yetirilən və 4.3 il müddətinə azadlıqdan məhrum olunan Tofiq Yaqublu haqqında qərarın dəyişdirilməsi Azərbaycan dövlətinin humanizm prinsiplərinə əsaslanan siyasətinin əyani təzahürü sayıla bilər. Bəllidir ki, ziyalılar, tanınmış ictimaiyyət nümayəndələri T.Yaqublu barəsində verilmiş hökmün dəyişdirilməsi ilə bağlı müraciət ediblər (Zeynəb Xanlarova, Anar, Çingiz Abdullayev və s.) Fakt budur ki, Tofiq Yaqublu təcridxanada olduğu dövrdə qanunvericiliyə uyğun olaraq maddi-məişət şəraiti ilə təmin olunub, onun hüquqları məhdudlaşdırılmayıb, ailə üzvləri və vəkilləri ilə mütəmadi görüşüb və telefon vasitəsilə əlaqə saxlayıb. T.Yaqublu İnsan Hüquqları üzrə Müvəkkil tərəfindən və Ombudsmanın Milli Preventiv Qrupunun həkim üzvünün iştirakı ilə qəbul edilib və onunla səhhətində problem yaşamaması üçün qida qəbulunu bərpa etməsi ilə bağlı söhbətlər aparılaraq müvafiq tövsiyələr verilib. Beynəlxalq Qızıl Xaç Komitəsinin ölkəmizdəki Ofisinin nümayəndələrinin onunla görüşünə şərait yaradılıb;

Səhhətinin daim həkim nəzarətində saxlanması üçün o, istintaq təcridxanasının tibb məntəqəsinə yerləşdirilib, səhhəti sabit olub. Eyni zamanda, özünün xahişi ilə tanıdığı mülki sektorun həkimi Adil Qeybullaya müayinəsi, müalicəsi və sağlıq durumuna nəzarət edə bilməsi üçün orada lazımi şərait yaradılıb. Hətta T.Yaqublunun sağlıq durumunda problem yaranmaması üçün önun özünün və həkimi Adil Qeybullanın təklifi ilə professorun işlədiyi “City Hospital”da müalicəsi davam etdirilib. Bu müddət ərzində TƏBİB-in rəsmi şəxsləri və həkimləri, Penitensiar xidmətin əməkdaşları xəstəxanada T.Yaqublunun yanında olublar və onun səhhətini nəzarətdə saxlayıblar.

Maraqlıdır ki, T.Yaqublunun həkimi Adil Qeybulla həmin qərarı humanist addım kimi qiymətləndirdi və yaranmış vəziyyəti kampaniyaya çevirərək T.Yaqublunun həyatı bahasına öz çirkin niyyətlərini həyata keçirmək istəyənlərin bu antiinsani davranışını qınadı: “Bəzi İnternet televiziyalar, xüsusilə də Amerikada oturanlar, görünür, bu prosesin uzanmağında maraqlıdırlar. Maraqlıdırlar ki, bu proses uzansın, T.Yaqublu aclığı davam etdirsin, komaya düşsün, ağır vəziyyətə düşsün, onlar da bundan istifadə etsinlər, Bu açıq-aydın hiss olunur”.

Tofiq Yaqublu barəsində çıxarılan qərarı “Bakı-Xəbər”ə şərh edən vəkil Mehman Muradlı bu məsələdə siyasi manipulyasiyaların edilməsinin yersiz olduğunu bildirdi: “Məhkəmə T.Yaqublunun sağlıq durumunda ciddi problem yaranmasına yol verməmək üçün onun barəsində çıxarılmış qərarı dəyişdirdi. Bu, Azərbaycan dövlətinin növbəti humanist addımı, insan həyatını ən ali dəyər kimi qiymətləndirməsinin ən bariz nümunələrindən biridir. Bu cür qərarlar məhkəmələr tərəfindən mütəmadi olaraq verilir. Buna alternativ, daha yüngül cəza növünün tətbiqi deyirlər. Sadəcə, Tofiq Yaqublu tanınmış adam olduğu üçün onun məsələsi bir qədər geniş müzakirələrə səbəb olub. Azərbaycan dövləti heç vaxt şantaj qarşısında qərar qəbul etmir. Dövlət belə amillərdən qorxub-çəkinsəydi, gərək cinayət edən heç kimi həbs edib cəzaya məhkum etməyəydi”.

Belə hallardan siyasi məqsədlər üçün istifadə etmək isə doğrudan da yolverilməzdir.

Məhəmmədəli QƏRİBLİ