24/10/2020 19:26
728 x 90

Azərbaycan - etnik-dini dözümsüzlüyün mövcud olmadığı yeganə ölkə...

Giya Paçxataşvili: “Milli, dini dözümsüzlük, ksenofobiya kimi bəşəriyyəti məhvə sürükləyən aqressiv nümunələr Azərbaycanda nə dünən olub, nə də bu gün var”

img

Çoxmillətli, çoxkonfessiyalı dövlət olan Azərbaycanda tarixən milli, dini zəmində heç bir problem yaşanmayıb. Dövlətimizə və xalqımıza xas olan və əsrlərdən bəri davam etdirilən tolerantlıq ənənələri bu gün də özünü nümunəvi şəkildə göstərir. Bu istiqamətdə mövcud olan sağlam mühit, ab-hava Azərbaycanda bütün xalqların və dinlərin nümayəndələrinin mehribanlıq, əmin-amanlıq şəraitində bir ailə kimi yaşamasına şərait yaradıb.

Bizim ölkədə heç bir milli, dini ayrıseçkiliyə yol verilməyib. Burada bütün xalqlar və dinlərin təmsilçiləri dinc şəkildə yaşayır, öz dinlərini, dillərini, adət-ənənələrini, mədəniyyətlərini yaşadırlar. Çoxmillətli, çox konfessiyalı dövlət olan Azərbaycan etnik-dini dözümsüzlüyün, ksenofobiyanın və antisemitizmin mövcud olmadığı nadir məkanlardan biridir. Azərbaycan bu gün bütün dünyada tolerantlıq sahəsində örnək dövlətlərin ön sırasında dayanır.

Təsadüfi deyil ki, Prezident İlham Əliyev öz çıxışlarında hər zaman ölkəmizdə mövcud olan tolerantlığı, burada yaşayan xalqların qardaşlıq şəraitində səmimi bir ailə kimi yaşadığını qürurla qeyd edir.

Bildirək ki, Prezident İlham Əliyev sentyabrın 16-da yəhudi xalqının yeni il bayramı – Roş-Ha-Şana münasibətilə Azərbaycanın yəhudi icmasına ünvanladığı təbrikində də bu amilə xüsusi diqqət çəkib. Dövlət başçısı təbrikdə zəngin tarixi-mədəni irsə və çoxəsrlik tolerantlıq ənənələrinə malik Azərbaycanda tarix boyu yəhudilərin digər xalqların və dinlərin nümayəndələri ilə sülh, əmin-amanlıq, qarşılıqlı hörmət və etimad şəraitində yaşadıqlarını bildirib. Prezident vurğulayıb ki, Azərbaycan etnik-dini dözümsüzlüyün, ksenofobiyanın və antisemitizmin mövcud olmadığı nadir məkanlardan biridir.

Ekspertlər hesab edirlər ki, Azərbaycan etnik-dini dözümsüzlüyün, ksenofobiyanın və antisemitizmin mövcud olmadığı nadir ölkələrdən biri kimi dünya ölkələrinə bir nümunədir. Ölkəmizdə mövcud olan tolerantlığın Avropanın özünü “demokratik” adlandıran bir sıra ölkələri üçün də bu məsələdə böyük nümunə olduğunu qeyd edən ekspertlər hesab edirlər ki, bu amil ölkəmizdə yaşayan müxtəlif xalqların icmaları tərəfindən də hər zaman təqdir edilir.

Gürcü əsilli tanınmış şair-tərcüməçi Giya Paçxataşvili “Bakı-Xəbər”ə bildirdi ki, Azərbaycanda tarixən birgəyaşayışa, yüksək dözümlülük mühitinə, multikultural dəyərlərə xüsusi əhəmiyyət verilib. O qeyd etdi ki, ölkəmizdə bütün xalqların nümayəndələri kimi, gürcülər də daim rahatlıq və əmin-amanlıq içində olub, Azərbaycan xalqları ilə problemsiz iç-içə yaşayıb. “Bu gün çox ölkə özünü “tolerant” adlandıra bilər, amma bu, sözdə yox, əməldə ifadə olunmalıdır. Azərbaycanda tarixi uzun əsrlərlə ölçülən, kökü lap uzaqlara gedib çıxan tolerantlıq ənənələri mövcuddur. Tarixən Azərbaycanda heç bir milli-dini, irqi zəmində toqquşma, problem olmayıb, indi də yoxdur. Bu da Azərbaycan dövlətinin, ölkə başçısının həyata keçirdiyi düzgün siyasətlə bağlıdır. Reallıq budur ki, Azərbaycan etnik-dini dözümsüzlüyün, ksenofobiyanın və antisemitizmin mövcud olmadığı nadir məkanlardan biridir və bu özü də bir örnəkdir.

Azərbaycanda multikulturalizm və tolerantlıq çox yüksək səviyyədədir. Ölkəmizdə nə milli, nə dini zəmində qarşıdurma heç vaxt olmayıb və olmayacaq, dinc yanaşı yaşamaq, mehribanlıq bizim həyat tərzimizdir. Bu bizim qanımızdadır, canımızdadır. Yenə də qeyd edirəm ki, ölkəmizdə müxtəlif konfessiyaların və millətlərin nümayəndələri bir ailə kimi yaşayır. Bu gün dünyada qəddarlıq və nifrət müşahidə edirik, faşizmə meyllilik hiss edirik. Uzağa getməyək, bədnam qonşumuz Ermənistanda başqa xalqların, dinlərin nümayəndələrinə rast gəlmək mümkün deyil. Ermənistanda başqa dinin, xalqın nümayəndələrinə münasibət çox mənfidir. Bu gün Ermənistan monoetnik dövlət kimi bölgə üçün çox mənfi bir nümunədir. Milli, dini dözümsüzlük, ksenofobiya kimi bəşəriyyəti məhvə sürükləyən aqressiv nümunələr Azərbaycanda nə dünən olub, nə də bu gün var” - deyə G.Paçxataşvili qeyd etdi.

İradə SARIYEVA

Son xəbərlər