24/10/2020 19:11
728 x 90

Paşinyanda psixoloji əyintilərin araşdırılması üzrə siyasi kampaniya başladı...

Əli Orucov: “Bununla bağlı Ermənistanda ciddi siyasi qalmaqalın yaranacağı ehtimalı böyükdür”

img

Erməni mediası yazır ki, müxalifət içində Paşinyanın psixi problemlərinin olması ilə bağlı fikirlər artır. "Adekvad" partiyası Paşinyanın səhhətini yoxlamaq üçün qanunvericilik təşəbbüsü ilə çıxış edib.

"Çiçəklənən Ermənistan" partiyasının lideri Qaqik Çarukyan bildirib ki, bu cür insanlar dövlətin və Ermənistan vətəndaşlarının təhlükəsizliyinə təhdiddir: “Düşünürəm ki, Konstitusiyada ciddi psixi problemləri olan insanların ölkənin və Ermənistan vətəndaşlarının təhlükəsizliyini təhdid altına qoyaraq, yüksək siyasi vəzifələr tutmaq hüququnu qadağan edən maddə salmağın vaxtı gəlib”.

Onu da qeyd edək ki, bundan öncə Ermənistanın Baş naziri Nikol Paşinyan şəxsi “Facebook” səhifəsində respublikanın Təhsil, Elm, Mədəniyyət və İdman naziri ilə razılaşmamağın çətin olduğunu yazmışdı: “Əvvəlcə xarici qadınları kilsəni görməyə dəvət edirsən. Sonra bir polis çavuşu olaraq kilsə ərazisində qonaqlara təcavüz edib onları qarət edirsən. Daha sonra isə artıq milli dəyərlərin və milli kimliyin qorunması ilə məşğul olursunuz. Həqiqətən, "millətin rifahı naminə" fəaliyyətlərdir”.

Paşinyan bu statusu Təhsil naziri Arutyunyanın parlamentdə çıxışı zamanı Çarukyanın ünvanına səsləndirdiyi “gənc yaşlarında təcavüzə görə ittiham olunub” sözlərinə dəstək məqsədilə yazıb.

Bütövlükdə, Ermənistan cəmiyyətində Paşinyanın psixi problemlərinin olması ilə bağlı fikirlər yeni deyil. Bu məsələ əsasən 2019-cu ilin əvvəllərindən gündəmə gəlib. Bununla bağlı müxtəlif fikirlər səslənir. Hətta bir ara belə bir sənəd ortaya çıxdı ki, Paşinyan Rusiya xəstəxanalarının birində 90-cı illərin əvvəllərində müalicə alıb. Deyilənlərə görə, Paşinyanın hərbi xidmətdə olmamasının səbəbi məhz bununla bağlıdır. Görünür, vəziyyət o həddə gəlib çatıb ki, artıq müxalifət ciddi şəkildə bu məsələnin üstünə getməyi qərarlaşdırıb.

  • “...Paşinyanın istefası ilə nəticələnə bilər”

Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun fikrincə, müxalifətin Paşinyanın psixi məsələsini gündəmə gətirməsi ona ciddi siqnaldır: “Əslində, bununla bağlı şübhələrin müəyyən əsası var. Ən azından, ona görə ki, Paşinyanın qeyri-ordinar siyasi fəaliyyəti, heç bir çərçivəyə sığmayan açıqlamaları, ictimai yerlərdə bəzi hallarda özünü apara bilməməsi və s. bu qənaətə gəlməyə əsas verir. Çünki o, bəzən həqiqətən özünü elə aparır ki, istər-istəməz, onun psixi durumunun yerində olmaması təəssüratı yaranır. Digər tərəfdən, nəzərə almaq lazımdır ki, sözügedən məsələ ilə bağlı Ermənistanda bəzi iddialar var. O baxımdan müxalifətin bunu ortaya atması heç də təsadüfi deyil. Hesab edirəm ki, bununla bağlı Ermənistanda ciddi siyasi qalmaqalın yaranacağı ehtimalı böyükdür. Ölkədəki siyasi narazılıqların inkişaf istiqamətindən asılı olaraq, bu, Paşinyanın istefası ilə nəticələnə bilər”.

Siyasi ekspertin fikrincə, nəzərə alsaq ki, Ermənistanda sosial-iqtisadi və pandemiya ilə bağlı ciddi problemlər var, o zaman bundan Paşinyana qarşı bir vasitə kimi istifadə olunması ehtimalı böyükdür.

Vidadi ORDAHALLI

Son xəbərlər