Son vaxtlar istər Ermənistan, istərsə də separatçı “DQR”-i təmsil edən şəxslərin dilindən sülh danışıqlarının mahiyyətilə uyğun gəlməyən ifadələri tez-tez eşidirik. Artıq vəziyyət o həddə çatıb ki, bu adamlar nəinki torpaqları azad etmək barədə danışmır, əksinə, yeni ərazilərin işğalı ilə bağlı açıq müzakirələr keçirirlər.
Bununla yanaşı, ermənilər işğal altındakı Azərbaycan ərazilərində süni məskunlaşdırma siyasətini davam etdirir. Erməni mediasında yayımlanan süjetlərin birində yaxınlarda Livandan Qarabağın Şuşa şəhərinə köçürülmüş erməni ailəsi haqqında video təqdim olunub.
Bütün bunların ardınca separatçıların “rəhbəri” Araik Arutyunyan özünün sosial şəbəkə hesabında Ağdamın onların doğma torpağı olduğunu bildirib:
“Ağdamdakı bu bağım cənnət çiçəklənməsi ilə yalnız mənim bu torpaqda apardığım uzun illik mübarizənin nəticəsinə deyil, həm də hökumətin dəstəyi ilə bütün Ağdamı böyük bir çiçəklənən bağa çevirməli olan bir çox soydaşımızın nümunəsinə dəlalət edir. 1997-ci ildə o dövrün rəsmiləri Dağlıq Qarabağ münaqişəsinin ərazi güzəştləri yolu ilə həll olunmasını müzakirə edərkən öz cüzi mal-mülkümü bir bankda girov qoyaraq Ağdamda bağçılıqla məşğul olmağa başlayan az sayda ermənilərdən biri də mən oldum. Bir dəfə demişəm, yenə təkrar edirəm, bu, müharibənin ağrı-acısını yaşamış 24 yaşlı bir gəncin bənzərsiz bir reaksiyası idi…”
Göründüyü kimi, separatçıların rəhbəri bununla növbəti avatürasını bəyan edib və bəlli olub ki, onların işğal altındakı rayonları qaytarmağa qəti niyyətləri yoxdur. Separatçıların bu ritorikasından hansı nəticəni hasil edə bilərik?
Politoloq Elşən Mustafayev “Bakı-Xəbər”ə açıqlamasında bildirdi ki, bu məsələyə ilkin olaraq ATƏT-in Minsk Qrupunun həmsədrləri reaksiya verməlidir: “Son vaxtlar intensivləşən bu tip bəyanatlarla mesaj verirlər ki, onların torpaq qaytarmaq fikirləri yoxdur. Biz Araik Arutunyanı rəsmi adam kimi qəbul etmirik və onun dedikləri bizim üçün hər hansı bir mahiyyət kəsb etmir. Amma bundan bir nəticələr çıxarmamız da lazımdır. Araik Arutunyan İrəvanın icazəsi olmadan belə danışa bilməz. O, həm də Paşinyanın sözünü ictimaiyyətə çatdırır. Deməli, onların ritorikası niyyətlərinin göstəricisidir. Son vaxtlar biz həm Ermənistan, həm də separatçıların ritorikasından sülh danışıqlarının mahiyyətinə uyğun olmayan bəyanatlar eşidirik. Ən maraqlısı isə budur ki, bu sərsəm yanaşmalara vasitəçilərdin heç bir reaksiyası müşahidə edilmir. Ermənistan tərəfinin son addımları bu ölkənin Dağlıq Qarabağ münaqişəsinin sülh yolu ilə həllində hələ də maraqlı tərəf olmadığını nümayiş etdirməkdə, məsələnin hərbi çözümünü alternativsiz varianta çevirməkdədir. İrəvanın, onun nəzarətində olan Qarabağdakı separatçı rejim təmsilçilərinin açıqlamaları savaşı artıq qaçılmaz reallığa çevirməkdədir. Ermənistan rəhbərliyinin açıqlamaları onların Azərbaycanın hərbi, diplomatik müstəvidə endirdiyi zərbələr fonunda ciddi çaşqınlıq içində olduğunu göstərir. Elə buna görə İrəvan rəsmilərinin hərəkətini, açıqlamalarını hansısa məntiqlə izah etmək mümkün deyil. Məsələn, Ermənistanın özünə də yaxşı məlumdur ki, Azərbaycan hərbi sahədə də bu ölkədən dəfələrlə güclüdür. Tovuz istiqamətində törətdikləri təxribata cavab olaraq Azərbaycanın endirdiyi hərbi zərbələr bunu əyani surətdə təsdiqləmiş oldu. Üzləşdiyi böyük itkilərdən dərs çıxarmaq əvəzinə, Ermənistan rəhbərliyi daxili auditoriyanı sakitləşdirmək üçün sərsəm mövqe sərgiləyir. Məsələn, Dağlıq Qarabağdakı qondarma rejimin başçısı, terrorçu Araik Arutunyan Gəncəni vurmaqla bağlı sərsəm fikirlər irəli sürüb. İndi də belə fikirlər səsləndirməsi onu deməyə əsas verir ki, dərslərini verməyin tam zamanı yetişib”.
Baş verən məqamlar onu göstərir ki, artıq Ermənistanla diplomatik danışıqlar aparmağın heç bir anlamı yoxdur. Bu səbəbdən yaxın tezlikdə yeni Qarabağ savaşı tamamilə gözlənilən sayılır.
Məhəmmədəli QƏRİBLİ
