Rauf Zeyni: “...öz əsgərinin, zabitinin, vətəndaşının taleyinə biganədir, laqeyddir”
Saxtakarlıqla və erməni xalqına yalan vədlər verərək hakimiyyətə gələn Nikol Paşinyan öz qeyri-ciddi davranışları, sərsəm açıqlamaları ilə özünü hər gün ifşa edir. Başı korrupsiyaya, Azərbaycan torpaqlarına qarşı təcavüz planlarına qarışan erməni Baş nazirin nə ölkəsinin içindən, nə də çölündən xəbəri var.
Erməni mətbuatının yazdığına görə, Azərbaycana əsir düşən Narek Sardaryanın həyat yoldaşı Zəngəzur mahalının (indiki Syunik) Xndzoresk kəndində Ermənistanın Baş naziri Nikol Paşinyana müraciət edib. “Mən Narek Sardaryanın həyat yoldaşıyam, hansı məlumatların olduğunu soruşmaq istərdim. Narek haqqında heç bir məlumatım yoxdur” deyib.
Buna cavab olaraq N.Paşinyan çox şey deyə bilmədiyini söyləyib: “Təəssüf ki, o, dostlarının yanına getməyib, düşmənin əlindədir. Nə edə biləcəyimizi başa düşməliyik”.
Öz növbəsində, Ermənistan Müdafiə naziri David Tonoyan deyib: “Yolda danışacağıq, mən burada olacağam”.
“Ermənistan Milli Təhlükəsizlik Xidmətinin verdiyi məlumata görə, bu il iyulun 8-də Syunik vilayətinin Nerkin Xndzoresk kəndində mal-qara otaran 1990-cı il təvəllüdlü Narek Sardaryan Naxçıvan Muxtar Vilayətinə bitişik Gorayk kəndinin inzibati ərazisindəki otlaq yerində itib. Gedən mal-qaranı axtararkən onun Naxçıvan ərazisinə keçdiyi təsbit edilib” - deyə erməni mediası yazır.
- “Halbuki, həmin diversant da, başqa diversantlar da erməni Baş nazirin tapşırığı ilə kəşfiyyat məqsədilə ölkəmizə göndəriliblər”
Paşinyanın əsir erməni diversantın ailəsinə ondan xəbərsiz olduğunu deməsini şərh edən Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə bildirdi ki, bu, Paşinyanın öz əsgərinə, ölkəsinin vətəndaşına laqeyd münasibətinin göstəricisidir. R.Zeyninin fikrincə, Paşinyanı rəhbərlik etdiyi ölkənin vətəndaşlarının taleyi narahat etmir, o bununla onlara sahib durmadığını sübut edir. Müsahibimizin sözlərinə görə, əslində, Paşinyanın hər şeydən xəbəri var, amma o özünü məqsədli şəkildə xəbərsiz kimi göstərir: “Paşinyanın özünü əsir erməni əsgərinin taleyindən xəbərsiz kimi aparması ona sərf edir. Ona görə də öz siyasətini elə qurur ki, guya Narek Sardaryandan xəbərsizdir. Halbuki, həmin diversant da, başqa diversantlar da erməni Baş nazirin tapşırığı ilə kəşfiyyat məqsədilə ölkəmizə göndəriliblər. Onların məqsədi ölkəmizdə təxribat törətməkdir. Əlbəttə ki, Paşinyan ölkəsini yalanla idarə edir, bu səpkili tapşırıqları yerinə yetirir. Bu səbəbdən də, o, erməni diversantdan xəbərsiz olduğunu deyir. O, bununla ictimai rəyi öz xeyrinə saxlamaqla camaata demək istəyir ki, heç bir erməni əsgəri, zabiti, vətəndaşı əsir düşməyib. Paşinyanın əsir diversantan xəbəri olmadığını onun ailəsinə deməsi o məqsəd daşıyır ki, insanları öz ətrafında saxlasın. Bu da bir erməni siyasətidir ki, bizim əsgərimiz, zabitimiz əsir düşsə də, “biz onun haqqında məlumatsızıq” deyirik. Paşinyanın N.Sardaryanın ailəsinə “ondan xəbərim yoxdur” cavabını verməsi onu göstərir ki, o bir Baş nazir kimi öz əsgərinin, zabitinin, vətəndaşının taleyinə biganədir, laqeyddir. Bu da Paşinyanın riyakarlığından irəli gəlir. Ermənistan riyakarlıq, yalan üzərində qurulan bir dövlətdir və Ermənistan hakimiyyəti də yalan və riyakarlıq üzərində hökm sürür. Ona görə də Paşinyan riyakarlıqdan kənara çıxsa, hakimiyyəti dağılar” - deyə R.Zeyni qeyd etdi.
R.Zeyninin fikrincə, Paşinyanı hazırda erməni xalqı yox, öz şəxsi maraqları düşündürür.
İradə SARIYEVA
