Samir Adıgözəlli: “Deyilən Azərbaycan əraziləri ilə bağlı ermənilərin hər zaman təxribatı olub”
Son vaxtlar Ermənistanın Azərbaycandakı stabilliyi pozmaq üçün etnik qruplar amilindən istifadə etməyə çalışdığı nəzərə çarpır. Guya Azərbaycanda müxtəlif etnik qrupların, hüquqlarının pozulduğu, onların “assimilyasiyaya məruz qaldığı” barədə təbliğat aparan ermənilərin bu məqsədlə kürd kartını xüsusilə qabartdıqları görünür.
Məhz bu mövzu ilə bağlı bugünlərdə qəzetimizə açıqlama verən kürd dilində çap olunan “Diplomat” qəzetinin baş redaktoru, kürd əsilli Azərbaycan vətəndaşı Tahir Süleyman maraqlı bir məlumat verib. Onun sözlərinə görə, ermənilər bu kartdan başqa istiqamətdə də istifadə edirlər: “Suriyadan kürd dilini bilən kürdləri gətirib işğal altında olan Kəlbəcər, Laçın, Zəngilanda yerləşdirirlər. Onlara saxta pasportlar verirlər ki, güya tarixən həmin ərazilərdə yaşayıblar. Bu, əhalinin sayını süni şəkildə artırmağa hesablanıb. Ermənilər yezidi kürdlərlə Rusiyanın müxtəlif əyalətlərində və Qazaxıstanda təbliğat aparırlar ki, güya kürdlərə muxtariyyət veriblər. Bunu deyəndə işğal altındakı ərazilərdəki Qubadlı, Laçın, Kəlbəcər rayonlarını nəzərdə tuturlar. Qazaxıstan və Başqırdıstanda kürdlərin evlərinə hücumlar oldu ki, hardan gəlibsinizsə, ora da gedin. Bunun arxasında erməni əlinin olmasına şübhə yoxdur. Hər iki xalqın ziyalıları bu məsələdə həssaslıq nümayiş etdirməlidir. Biz imkan verməməliyik ki, düşmən bizi bir-birimizlə üz-üzə qoysun”.
Göründüyü kimi, artıq ermənilərin Rusiya və Qazaxıstanda kürd kartından istifadə etməsinə dair faktlar var. Hətta bu istiqamətdə yalançı “muxtariyyət” nağılı da uydurublar.
İctimai Siyasi Proseslər Beynəlxalq Araşdırmalar Mərkəzinin rəhbəri Samir Adıgözəlli “Bakı-Xəbər”ə açıqlamasında bildirdi ki, ermənilər daima etnik faktoru qabartmağa çalışıblar: “Bu məsələdə onlar bəzi dəstəyi Rusiyadan alır. Bundan əvvəl talış kartını daha çox qabardırdılar. Rusiyada yaşayan bəzi talışlar üçün, hətta İrəvanda Azərbaycan dilində yayımlanan “talış televiziyası” da açıblar. Həmin “televiziya”nı izlədikdə məlum olur ki, Ermənistan xüsusi xidmət orqanları talış əsilli vətəndaşların “ovunu” əsasən Rusiyada təşkil edir. Sonra onları Ermənistana köçürüb ordan istiqamətləndirirlər. Talış separatçılarının “lideri” sayılan Əlikram Hümbətovun da tez-tez Ermənistana səfər etdiyi məlumdur. Azərbaycan xüsusi xidmət orqanlarının Rusiyada həbs etdiyi Fəxrəddin Abboszadə də ölkəmizə qarşı analoji təxribatlarla məşğul olub. İndi də kürd kartından istifadə edirlər. Onlar bilirlər ki, Azərbaycanın daxilindəki kürdlərin heç bir problemi yoxdur. Ermənistan vətəndaşı olan kürdlərin hamısı azərbaycanlılarla birlikdə deportasiyaya məruz qalıb. Belə toplumdan hansısa mənada istifadə etmək onlar üçün asan deyil. Bu səbəbdən də ölkənin xaricindəki kürdləri prosesə qoşmaq istəyirlər. Suriya və digər Yaxın Şərq ölkələrindən kürdləri işğal altındakı ərazilərə gətirib suni məskunlaşma apardıqlarına dair faktlar mövcuddur. Onlara hətta köhnə sənədlər də verilir ki, güya həmin ərazinin yerli əhalisi olublar. MDB məkanında kürdlərin kompakt yaşadığı yerlərdə də analoji təbliğat aparılır. Oradakı kürdlərə şirin vədlər verilir ki, işğal altındakı ərazilərə köçsünlər. Tarixi Azərbaycan ərazilərində onlara saxta muxtariyyət vədi də verilir. Deyilən Azərbaycan əraziləri ilə bağlı ermənilərin hər zaman təxribatı olub. Hətta “Qırmızı Kürdüstan” deyilən ideya da ortaya atılıb. Zamanında bunlar fayda vermədiyi üçün ermənilıər yeni planı işə salıblar. Onlar bilir ki, ölkədəki demoqrafik vəziyyət acınacaqlıdır və get-gedə də pisləşir. Bu baxımdan da belə təxribatlara əl atırlar. Bizim səfirliklər və diaspor təşkilatlarının bu istiqamətdə fəal olması lazımdır ki, ermənilərin təxribatı tam ifşa edilsin”.
Ermənilərin bu planının baş tutması mümkün deyil. Çünki dilənçilik ucbatından ölkəni tərk edən kürdlərin təkrarən həmin ərazilərə qayıdacağı inandırıcı görünmür.
Məhəmmdəli QƏRİBLİ
