Ermənistanda bütün sahələr üzrə yaşanan tənəzzül bu ölkənin ordusunda da acınacaqlı durumun yaranması ilə müşayiət olunur. Orduda korrupsiya, rüşvətxorluq, özbaşnalıq geniş vüsət alıb. Ümumiyyətlə, cəmiyyətdə olan neqativ tendensiyalar ordunu da bürüyüb. Erməni ordusu maddi-texniki, şəxsi heyətlə təminat baxımından əvvəlki dövrlərlə müqayisədə indi daha ciddi çətinliklər yaşayır.
Düşmən ölkədə belə bir fikir hakimdir ki, orduda zabitlər əsgərlərə vətənin müdafiəçiləri kimi deyil, şəxsi varlanmalarını təmin edən mənbə kimi baxırlar. O da vurğulanır ki, Ermənistan Müdafiə Nazirliyi heç də bütün insidentlər haqda məlumat vermir, bəzi hadisələr gizli saxlanır.
Bu arada Ermənistanın “İrates” nəşri yazır ki, Qurgen Alaverdyanın əsir düşməsindən sonra Qarabağda və Azərbaycanla həmsərhəd ərazilərdə ciddi çaşqınlıq hökm sürür. Xüsusən də hərbçilərin diversiya əmrlərinə tabe olmadığı, pul qarşılığında döyüş mövqeyinə çıxmaqdan yayınmağa çalışdıqları qeyd edilir: “Panika, xüsusən, Qarabağda xidmətə məcbur edilən çağırışçı hərbçilər arasında müşahidə olunur. Onlar hərc-mərcliyin, özbaşnalığın, “dedovşina” və rüşvətxorluğun hakim olduğu Qarabağda yerləşən hərbi hissələrdə xidmətdən çəkinirlər. Digər tərəfdən, erməni sosial şəbəkələrində müşahidə olunur ki, əsir düşmüş hərbçilərə, o cümlədən, Qurgen Alaverdyanın taleyinə rəsmi İrəvanın biganəliyi ruh düşkünlüyünə, inamsızlığa yol açıb”. Bu bir daha Ermənistan ordusunun qorxaqlığını ortaya qoyur.
“Bundan sonra Qarabağda yerləşən işğalçı ordu daxilində başıpozuqluq bir az da artacaq”
Məsələyə münasibət bildirən ehtiyatda olan polkovnik-leytenat, hərbi ekspert İbrahim Rüstəmlinin fikrincə, əslində, belə halın baş verəcəyi gözlənilən idi: “Birinci Qarabağ müharibəsindən sonra ermənilər öz orduları barədə elə bir mif yaratdılar ki, guya bunların ordusundan güclü ordu yoxdur. 2016-cı ilin Aprel döyüşlərindən sonra bu mif sürətlə dağılmağa başladı. Ondan sonrakı dövrdə baş verən təxribatlar yavaş-yavaş erməni ordusunun qorxaqlığını üzə çıxardı. Onsuz da Ermənistan ordusunda xidmətdən müxtəlif yollarla yayınma, fərarilik və digər bu kimi problemlər mövcud idi. Xüsusən də Ermənistanda əsgər anaları övladlarının Qarabağda xidmət etməsini istəmir və dəfələrlə bununla bağlı etiraz aksiyaları keçiriblər. Çünki onları Qarabağa heç bir mənəvi tel bağlamır. Ancaq görünən odur ki, erməni diversantın ələ keçməsindən sonra düşmən ordusunda panika bir az da geniş miqyas almağa başlayıb. Yaranan situasiya onu göstərir ki, Ermənistan ordusunda güclü mənəvi aşınma var.
Zatən, o da hər kəsə məlumdur ki, Qarabağ və ətraf rayonlar təkcə ermənilərin gücü hesabına işğal olunmayıb. Prezident İlham Əliyev çıxışlarının birində qeyd etdi ki, hünəriniz varsa, Azərbaycanla təkbətək döyüşün. Bu, ölkə başçısı tərəfindən verilən çox ciddi siyasi mesaj idi. Hesab edirəm ki, bundan sonra Qarabağda yerləşən işğalçı ordu daxilində başıpozuqluq bir az da artacaq. Bütün bunlar həm də Azərbaycan Ordusunun qüdrətindən xəbər verir. Ordumuzun qüdrətli olması təkcə malik olduğu müasir silahlarla ölçülmür. Silahlı Qüvvələrimizin gücünü, qüdrətini göstərən ən əsas cəhət odur ki, ordumuz o torpaqlara mənəvi cəhətdən bağlıdır. Bu, çox vacib məqamdır”.
Hərbi ekspertin fikrincə, qarşıdakı dövrdə Ermənistan ordusunda başıpozuqluğun daha da artacağı gözlənir.
Vidadi ORDAHALLI
