Xəbər verdiyimiz kimi, avqustun 23-də saat 05:45 radələrində cəbhənin Goranboy rayonu istiqamətində Ermənistan silahlı qüvvələrinin diversiya-kəşfiyyat qrupu təxribat törətməyə cəhd göstərib. Cəbhənin bu istiqamətdə yerləşən Azərbaycan Ordusunun bölmələri tərəfindən görülən qəti tədbirlər nəticəsində düşmən itki verərək geri çəkilməyə məcbur edilib. Döyüş zamanı erməni diversiya qrupunun komandiri, baş leytenant Qurgen Alaverdyan əsir götürülüb.
Təxribatçı erməni komandir video-açıqlama ilə çıxış edib və Ermənistanın bütün yalanlarını ifşa edib:
“2020-ci ilin iyul ayında hərbi hissənin komandiri polkovnik Vazgen Vartanyan mənimlə birgə bir neçə kəşfiyyatçını yanına çağırıb, yuxarı komandanlığın göstərişi ilə yaxın vaxtlarda Azərbaycan Silahlı Qüvvələrinin Goranboy rayonundakı təmas xəttində döyüş mövqelərində diversiya törədilməsi, yəni qumbara və avtomatlardan istifadə edərək Azərbaycan hərbçilərinin mümkün qədər çox sayda məhv edilməsi, eləcə də bir hərbçinin əsir götürülməsi istiqamətində əməliyyat keçirilməsi üçün hazırlıq görməyimizi tapşırdı. Bundan sonra təxminən 20 gün xüsusi təlim keçdik, ərazini daha dəqiq öyrəndik və əlverişli hava şəraitinin olmasını gözlədik. Avqustun 23-ü saat 02:30 radələrində mənim rəhbərliyim altında diversiya qrupu dumanlı havadan istifadə edərək əvvəlcədən planlaşdırılmış marşrutla Azərbaycan Silahlı Qüvvələrinin Goranboy rayonundakı mövqeləri istiqamətində hərəkət etdik. Biz Azərbaycan Silahlı Qüvvələrinin Goranboy rayonundakı döyüş postunun ərazisinə daxil olmaq istəyərkən “həyəcan” siqnalı verildi və aşkar olunduğumuzu anlayaraq geri qayıtmaq məcburiyyətində qaldıq. Qrup üzvləri qaçmağa müvəffəq olsa da, mən hava dumanlı olduğundan istiqaməti müəyyən edə bilmədim və əsir götürüldüm”.
Q.Alaverdyan qeyd edib ki, Azərbaycanın işğal altında olan ərazilərində xidmətini davam etdirmək istəməyib: “Lakin hərbi qulluqçu kimi məcburiyyət qarşısında bu ərazidə xidmətə cəlb edilmişəm. Törətdiyim əmələ görə peşmanlıq hissi keçirməklə yanaşı, mənim kimi Erməni Silahlı Qüvvələrinin tərkibində xidmət edən bir çox hərbi qulluqçuların məcburi olaraq Azərbaycanın işğal altında olan ərazilərində xidmətə göndərildiyini bildirmək istəyirəm. Əsir götürüldükdən sonra, təsəvvürlərimin tam əksinə olaraq, mənə qarşı heç bir qeyri-insanı davranış, işgəncə, təzyiq olmayıb. Eyni zamanda, qidalanmağım və saxlanma şəraitimlə bağlı heç bir şikayətim yoxdur. Mən Azərbaycan Respublikasında qalmaq istəyirəm və bu dövlətə xidmət etmək niyyətindəyəm. Mən həmçinin başa düşdüm ki, erməni ordusunun Azərbaycan Silahlı Qüvvələrinə qalib gəlmək şansı yoxdur”.
Erməni tərəfi iddia edirdi ki, diversant hava şəraiti ilə əlaqədar azaraq təmas xəttini keçib. Ancaq onun özü təmas xəttini diversiya məqsədilə keçdiyini təsdiqləyir. Onun həm də “Azərbaycanda qalmaq istəyirəm” bəyanatı Ermənistanın yalanlarını tam ifşası sayıla bilərmi?
Hərbi-siyasi ekspert, ehtiyatda olan polkovnik-leytenat İbrahim Rüstəmli “Bakı-Xəbər”ə açıqlamasında bildirdi ki, Ermənistan uzun müddətdir cəbhənin bütün istiqamətlərindən təxribat xarakterli əməllərini təkrar edir: “Bu hadisə də həmin əməllərin davamıdır. Əminliklə deyə bilərik ki, onların təxribatları bundan sonra da davam edəcək. Çünki həmin ölkənin mahiyyəti bundan ibarətdir. Düşmənə heç vaxt etibar etmək olmaz. Bu hadisə həm də Azərbaycan Ordusunun ayıqlığını sübut etdi. Gördük ki, Azərbaycan əsgərləri və zabitləri düşmənin istənilən təxribatının qarşısını almağa qadirdi. Əsir götürülən zabitlə bağlı Ermənistan əvvəl tamamailə gülməli bir mövqe tutdu. Əvvəl dedilər ki, onların ümumiyyətlə belə zabiti yoxdur. Ermənistanın bu davranışlarının tərkibində bir informasiya təxribatı var. Düşmən öz təxribatını hətta bu anda da davam etdirir. Onun kamera qarşısında görüntüsündən göründü ki, diversanta qarşı hər hansı zorakılıq tətbiq edilməyib. Ermənistan tərəfi isə indi artıq sahib çıxdıqları zabitinə qarşı qeyr-insani rəftarın olduğunu bəyan edir. Bütün bunlar erməni yalanlarını ifşa edir. Bu təxribatın qarşısı alınmasaydı çox ciddi itkilər verə bilərdik. Həmin əsirin yağlı dilinə də inanmamalıyıq. Çünki bir çox ermənilər burda başqa cür, Ermənistana dönəndə isə fərqli bəyanatlar veriblər. Biz ona düşmən diversantı, Ermənistanın siyasətinə isə təxribat kimi baxmalıyıq. Əminəm ki, ölkənin əlaqədar qurumları bu halları nəzarətdə saxlayır. İstər ölkənin informasiya, istərsə də hərbi təhlükəsizliyi baxımından bu hallarla bağlı müvafiq tədbirlər görülməlidir. Ermənistanın diversiya məqsədli əməllərini sübut edən başqa faktlar da var. Hazırda Azərbaycanda məhkum olunan onların bir neçə diversantı var”.
Beləliklə, Ermənistan bu hərəkətləri ilə özünü növbəti dəfə həm hərbi, həm də informasiya müstəvisində ifşa etdi.
Məhəmmədəli QƏRİBLİ
