Ötən ay Ermənistan-Azərbaycan sərhədinin Tovuz rayonu istiqamətində baş verən təxribata ordumuzun layiqli cavab zərbəsi düşmən ölkə daxilində böyük rezonans doğurdu. İlk növbədə o baxımdan ki, Azərbaycan ordusu düşmənin xeyli sayda canlı qüvvə və texnikasını məhv etdi. Elə bu da Nikol Paşinyan iqtidarı üçün yeni problemə çevrilib, ölkədə ondan narazılığı daha da artırıb.
Yaranmış vəziyyətdə Paşinyan üçün əsas çıxış yollarından biri yenə cəbhədə təxribat törətməklə diqqəti bura yönəltməkdir. Avqustun 23-də cəbhənin Goranboy rayonu istiqamətində Ermənistan silahlı qüvvələrinin diversiya-kəşfiyyat qrupunun təxribat törətmək cəhdi də bundan irəli gəlir. Xatırladaq ki, cəbhənin bu istiqamətində yerləşən Azərbaycan ordusunun bölmələri tərəfindən görülən qəti tədbirlər nəticəsində düşmən itki verərək geri çəkilməyə məcbur edilib. Döyüş zamanı erməni diversiya qrupunun komandiri, baş leytenant Qurgen Alberyan əsir götürülüb. Aydındır ki, diversiya-kəşfiyyat qrupunun məhv edilməsi və qrupun komandirinin əsir götürülməsi bir daha Azərbaycan ordusunun güclü və qüdrətli, ayıq-sayıq olmasından xəbər verir. Bu, Tovuz hadisələri zamanı olduğu kimi, Azərbaycan ordusunun növbəti uğuru da sayıla bilər. Qeyd edək ki, bu gün təmas xəttində olan bütün bölmələrimiz ən müasir müşahidə vasitələri ilə təchiz edilib. Həmin vasitələr Azərbaycan ordusunun bölmələrinə Ermənistan silahlı qüvvələrinin bütün hərəkətlərini müşahidə etməyə və qabaqlayıcı tədbirlər görərək düşmənin aktivliyinin qarşısını əvvəlcədən almağa imkan verir.
Digər tərəfdən xatırladaq ki, avqustun 23-də - təxribata cəhd edildiyi gün Ermənistanın müdafiə naziri David Tonoyan “Armiya-2020” hərbi-texniki forumda iştirak etmək üçün Moskvaya səfər etdi. Tonoyanın Moskva səfəri zamanı belə bir hücumun edilməsi yenidən Kremlin diqqətini bu məsələyə yönəltmək, eyni zamanda Dağlıq Qarabağ münaqişəsinin həlli ilə bağlı dalana dirənmiş danışıqları daha da çıxılmaz vəziyyətə salmaq cəhdi idi. Lakin Azərbaycan hərbçilərinin ayıq-sayıqlığı, peşəkarlığı nəticəsində düşmənin bu hücumunun və planlarının qarşısı alındı. Ermənistan əsir götürülən Qurgen Alberyanın diversiya qrupunun rəhbəri olduğunu da təkzib etməyə çalışır. İddia edir ki, erməni baş leytenant mövqeləri yoxlamaq üçün gedəndə hava şəraitinin pis olmasına görə azaraq Azərbaycan tərəfində keçib. Lakin faktlar ortadadır. Diversiya-kəşfiyyat qrupunun komandirinin üzərindən götürülən hərbi ləvazimatlar və şəxsi əşyalar, eləcə də Ermənistan tərəfinin əsirin dəyişdirilməsi üçün Beynəlxalq Qızıl Xaç Komitəsinə müraciət etməsi Alberyanın işğalçı ölkə üçün adi hərbçi olmadığını sübut edir.
Ümumiyyətlə isə məlum həqiqətdir ki, Ermənistan davamlı şəkildə Azərbaycana qarşı dəfələrlə belə təxribat həyata keçirməyə çalışıb, amma hər dəfə də uğursuzluğa məhkum olub. Məhkum Baqdasaryan Arsen Eduardoviç, Qazaryan Karen Armenoviç olaylarını xatırlamaq kifayətdir. Onların da Azərbaycana qarşı diversiya hərəkətlərinin qarşısı ordumuz tərəfindən vaxtında alınıb. Düşmənin növbəti belə cəhdi də iflasa uğradı. Bunlar isə Ermənistanda hakimiyətdən narazılığı tətikləyən ciddi faktorlardər. Eyni zamanda, baş verənlər Ermənistanın Azərbaycan qarşısında gücsüzlüyünün də birbaşa təsdiqidir.
Tahir TAĞIYEV
