Baş Prokurorluq və Dövlət Təhlükəsizliyi Xidməti (DTX) birgə məlumat yayıb. Məlumatda bildirilir ki, avqustun 23-də saat 06 radələrində cəbhənin Goranboy rayonu istiqamətində Ermənistan silahlı qüvvələrinin diversiya-kəşfiyyat qrupunun komandiri, baş leytenant, 1989-cu il təvəllüdlü Qurgen Alaverdyan Azərbaycan ordusu tərəfindən həyata keçirilmiş tədbirlər nəticəsində müəyyən edilərək saxlanıb.
Qurgen Alaverdyanın Ermənistan Silahlı Qüvvələrinin apardığı təcavüzkar müharibələr nəticəsində işğal edilmiş Kəlbəcər rayonu ərazisində qanunsuz olaraq yaradılmış silahlı birləşmələrin tərkibində iştirak edərək Azərbaycan Respublikasının hərbi qulluqçularına, müəssisələrə, idarələrə, təşkilatlara və ya ayrı-ayrı şəxslərə basqın etməsinə, habelə onlara qarşı zorakılıq hərəkətləri etməsinə, insanların həlak olması, onların sağlamlığına zərər vurulması, əhəmiyyətli əmlak ziyanının vurulması və ya başqa ictimai təhlükəli nəticələrin baş verməsinə yönələn hərəkətlər törətməsinə, eləcə də, qanunsuz olaraq odlu silah, onun komplekt hissələrini və döyüş sursatı əldə edib saxlaması, daşıması və gəzdirməsinə, habelə Ermənistan Respublikası xüsusi xidmət orqanlarının tapşırığı ilə 23 avqust 2020-ci il tarixdə ölkəmizin təhlükəsizliyi zərərinə istifadə olunması məqsədilə dövlət sirri təşkil edən məlumatları toplamaq və Ermənistan Respublikasına ötürmək məqsədilə casusluq etməklə dövlət sərhədini qanunsuz olaraq keçməsinə əsaslı şübhələr müəyyən edilib. Faktla bağlı Azərbaycan Respublikasının Baş Prokuroru tərəfindən Cinayət Məcəlləsinin 100.2 (təcavüzkar müharibəni aparma), 276 (casusluq), 279.1 (qanunvericiliklə nəzərdə tutulmayan silahlı birləşmələri və ya qrupları yaratma), 228.1 (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) və 318.1-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanıb. Törədilmiş cinayət hadisəsinin xarakter və mürəkkəbliyi nəzərə alınmaqla Baş prokuror tərəfindən cinayət işi üzrə istintaqın aparılması Baş Prokurorluğun İstintaq idarəsinə tapşırılıb və hazırda iş üzrə zəruri və intensiv istintaq hərəkətləri və əməliyyat-axtarış tədbirləri davam etdirilir. Qeyd edək ki, erməni tərəfi kəşfiyyatçının bu məqsədlərə xidmət etmədiyinə dair ortaya dəlillər qoymağa çalışır. Ancaq bunlar çox gülünc görünür. Çünki bundan əvvəl də Ermənistanın hazırladığı kəşfiyyatçıların eyni məqsədlərlə təmas xəttini pozması halları müşahidə edilib. Həmin faktlardan bəzilərini təqdim edirik.
Hazırda məhkum həyatı yaşayan Baqdasaryan Arsen Eduardoviç – 23.04.1993-cü il tarixdə Azərbaycan Respublikasının Xankəndi şəhərində anadan olmuş, orta-ixtisas təhsilli, subay, milliyətcə erməni, Azərbaycan Respublikasının vətəndaşı, Azərbaycan Respublikası, Xankəndi şəhəri, Baqramyan küçəsi döngə 1, ev 17 ünvanında qeydiyyatda olmaqla həmin ünvanda yaşayıb.
Ermənistanda xüsusi təlim keçən Arsen Baqdasaryan Azərbaycan Respublikasının Ermənistan Respublikası tərəfindən işğal altında saxlanılan Ağdərə rayonu ərazisində yerləşdirilən Ermənistan silahlı qüvvələrinin tərkib hissəsi olan 49971 saylı hərbi hissədə müqavilə əsasında baş çavuş hərbi rütbəsində kəşfiyyat bölüyünün tağım komandiri vəzifəsində fəaliyyət göstərdiyi zaman hərbi hissə komandirindən (adı və soyadı bəllidir) Azərbaycan Respublikasının vətəndaşlarını milli ədavət və düşmənçilik niyyəti ilə qəsdən öldürmək, Azərbaycanın müdafiə qabiliyyətini zəiflətmək məqsədilə Silahlı Qüvvələrimizin müdafiə mövqelərinə tərəf keçib səngərlərdə partlayışlar törətmək üçün mina basdırılması barədə göstərişlər alıb. Arsen Baqdasaryan bu məqsədlə cinayətkar birliyin digər üzvləri ilə birlikdə (onların adları və soyadları istintaqa bəllidir) 2014-cü il dekabrın 26-da saat 15 radələrində qoşunların təmas xəttini gizli şəkildə keçərək Azərbaycan Silahlı Qüvvələrinin müdafiə mövqelərində özləri ilə götürdükləri 7 ədəd "fuqas" tipli piyada əleyhinə minadan 3 ədədini Azərbaycan hərbi qulluqçularının daha çox gedib-gəldiyi səngər yollarında yerləşdirdikdən sonra geri qayıtmaq istəyərkən tutulub. Cinayət törətməsinə əsaslı şübhələr olduğundan, Arsen Baqdasaryan barəsində Bakı Hərbi Məhkəməsi tərəfindən həbs qətimkan tədbiri seçilib.
A.Baqdasaryan Azərbaycan Respublikasının ərazi toxunulmazlığı və müdafiə qabiliyyəti zərərinə olaraq qəsdən düşmən tərəfinə keçməklə və Azərbaycan Respublikasına qarşı düşmənçilik fəaliyyəti aparmaqda xarici dövlətə kömək etməklə dövlətə xəyanət edib, həmin cinayətkar birliyin tərkib hissəsi olan struktur bölmədə Azərbaycan Respublikası Silahlı Qüvvələrinin müdafiə mövqelərinə basqın edib, bu məqsədlə odlu silah və döyüş sursatını qaçaqmalçılıq yolu ilə Azərbaycan Respublikasının ərazisinə keçirməyə, həmin silah-sursatdan istifadə etməklə ictimai təhlükəsizliyi pozmağa, əhali arasında vahimə yaratmaq məqsədilə partlayışlar törətməklə insanların həlak olmasına nail olmağa cəhd edib.
Gəncə Ağır Cinayətlər Məhkəməsinin 05.05.2015-ci il tarixli hökmü ilə cəzasını ciddi rejimli cəzaçəkmə müəssisəsində çəkməklə 15 il müddətinə azadlıqdan məhrum edilən A.Baqdasaryan 24.22.2018-ci il tarixdən müvafiq cəzaçəkmə müəssisəsində cəza çəkir.
Digər bir fakta diqqət edək: məhkum Ğazaryan Karen Armenoviç – 12.01.1984-cü il tarixdə Ermənistan Respublikasının Noyemberyan şəhərində anadan olub, ali təhsilli, subay, milliyətcə erməni, Ermənistan Respublikasının vətəndaşı, Ermənistan Respublikası Tavuş vilayəti, Noyemberyan rayonu, Berdevan kəndi, 28-ci küçə, ev 17 ünvanında qeydiyyatda olmaqla həmin ünvanda yaşayıb.
Ğazaryan Karen 2018-ci il iyulun 15-i səhər saatlarında Azərbaycan-Ermənistan dövlət sərhədinin Qazax rayonu istiqamətində düşmənin kəşfiyyat-diversiya qrupu ilə qoşunların təmas xəttini keçməyə cəhd göstərib. Azərbaycan Ordusunun bölmələrinin sayıqlığı nəticəsində düşmənin təxribat cəhdinin qarşısı alınıb və itkilər verərək geri çəkilməyə məcbur edilən qrupun bir üzvü - Ğazaryan Karen saxlanıb.
K.Ğazaryan qabaqcadan əlbir olan bir qrup şəxs halında tamah məqsədilə, sifarişlə iki və daha çox şəxsi terrorçuluqla və milli ədavət, düşmənçilik niyyəti ilə qəsdən öldürməyə cəhd göstərib, bu məqsədlə odlu silah və döyüş sursatını qaçaqmalçılıq yolu ilə Azərbaycan Respublikasının ərazisinə keçirməyə, həmin silah-sursatdan istifadə etməklə ictimai təhlükəsizliyi pozmağa, əhali arasında vahimə yaratmaq məqsədilə partlayışlar törətməklə insanların həlak olmasına nail olmağa cəhd edib, habelə casusluq törədib.
Gəncə Ağır Cinayətlər Məhkəməsinin 27.02.2019-cu il tarixli hökmü ilə cəzasını ciddi rejimli cəzaçəkmə müəssisəsində çəkməklə 20 il müddətinə azadlıqdan məhrum edilib. K.Ğazaryan 27.03.2019-cu il tarixdən müvafiq cəzaçəkmə müəssisəsində cəza çəkir.
Bütün bu faktlar Ermənistanın təcavüzkar siyasətini, sülh danışıqlarına sadiq olmadığını sübut edirmi?
Azərbaycanlı Əsir və Girovlarla bağlı Məlumat Mərkəzinin koordinatoru Əhməd Şahidov “Bakı-Xəbər”ə açıqlamasında bildirdi ki, Dağlıq Qarabağ münaqişəsi çərçivəsində Ermənistan tərəfi tez-tez pozucu diversiya aktları törədir:“Bu da Ermənistanın əsl mahiyyəti olan pozuculuq, işğalçılıq niyyətindən irəli gəlir. Xüsusən də son illər bu daha intensiv hal alıb. Ermənistanın bu istiqamətdəki addımlarının mühüm səbəblərindən biri 2016 və sonrakı illərdə Azərbaycanın cəbhə xəttində qazandığı hərbi uğurları ilə bağlıdır. Erməni tərəfi açıq savaşda bizə zərbə vura bilmədiyi üçün, çalışır ki, belə diversiya addımları ilə bizə ziyan vursun. Lakin görünən budur ki, onların bu addımlarının qarşısı ciddi şəkildə alınır. Bir çox hallarda isə onların kəşfiyyatçıları canlı olaraq ələ keçirilir. Bu, Azərbaycan üçün çox önəmlidir. Bilirsiniz ki, girovlarımızla bağlı 7 ildir narazılıq davam edir. Bizim iki mülki girovumuz Ermənistan tərəfdən qanunsuz olaraq saxlanılır. Erməni diversantların canlı ələ keçirilməsi bizim ordumuzun yüksək hazırlığından xəbər verir. Bu, diversantların bizim mülki vətəndaşlarımızla dəyişdirilməsinə şans yaradır. Son əsir alınan diversantdan əlavə də hazırda Azərbaycan tərəfinin əlində erməni diversantları var. İstənilən halda, onların sayının çoxluğu bizim üçün əlavə şanslar yaradır. Məsələnin digər tərəfi isə Ermənistanın çirkin niyyətlərilə bağlıdır. Təbiidir ki, Ermənistan bunu etiraf etmək istəməz. Onlar deyir ki, güya kəşfiyyatçı səhv nəticəsində yolu keçib. Bizim rəsmi qurumların yaydığı fotolardan da görünür ki, onun niyyəti diversiya olub. Belə faktlar Ermənistanın sülh danışıqlarına sadiq olmadığını və bundan sonra da olmaq istəmədiyini şərtləndirir. Düşmənin əsl mahiyyətini ifşa etmək baxımından da bu yaxşı faktdır”.
Bütün istiqamətlər üzrə təhlil etdikdə, erməni diversantın ələ keçməsi Azərbaycan üçün böyük önəm kəsb edir.
Məhəmmədəli QƏRİBLİ
