Ermənistanda könüllü xalq ordusu yaradılması barədə müzakirələr başlayıb. Erməni KİV-inin yaydığı məlumata görə, bu haqda Ermənistan Müdafiə Nazirliyinin mətbuat katibi Şuşan Stepanyan öz “Facebook” səhifəsində bildirib.
Məlumatda deyilir: “Könüllü xalq qoşunları yaratma ehtiyacı potensial düşmənə layiqli bir cavab vermə ehtiyacından qaynaqlanır. Xalq ordusu yaradılması layihəsi ictimaiyyətin müzakirəsinə təqdim edilib. “Müdafiə haqqında” qanuna müvafiq dəyişikliklər edilib. Hazır qanun layihəsində qeyd olunduğu kimi, milis silahlı hücum və ya hərbi əməliyyat zamanı Ermənistanın hərbi müdafiəsində vətəndaşların könüllü iştirakı sistemidir. Xalq ordusu inzibati bölgüyə görə ərazi prinsipi əsasında fəaliyyət göstərəcək, briqada və batalyonlara bölünmüş hərbi birləşmələrdən ibarət olacaq. Xalq ordusunun ümumi rəhbərliyi yeni yaradılan milis qərargahının köməyi ilə Ermənistan Silahlı Qüvvələrinin Baş Qərargah rəisi tərəfindən həyata keçirilir”. Ermənistanın hazırkı məqamda belə bir addımı atması onların gerçək ordusunda olan acınacaqlı vəziyyətdən xəbər verir. Ermənistan ordusundakı real vəziyyətin katastrofik olduğu məlumdur, ancaq belə bir addımın atılması ordunun yalnız quru addan ibarət olduğunu üzə çıxarır. Ermənistanın belə addımı atmasının kökündə daha hansı amillər dura bilər?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ermənistan silahlı qüvvələrində vəziyyətin hansı səviyyədə acınacaqlı olduğunu təsəvvür etmək üçün elə onların özlərinin yaydıqları məlumatlara diqqət etmək lazımdır:“Bu özünü 2016-cı il Aprel döyüşlərindən sonra daha qabarıq şəkildə göstərdi. Həmin dövrdən başlayaraq, ordudakı zabit-əsgər münasibətlərinin hansı səviyyədə acınacaqlı olduğu üzə çıxdı. Bundan sonra orduya çağırılan çağırışçılarla bağlı ciddi problemlər yarandı. Ermənistan vətəndaşları öz övladlarını həqiqi hərbi xidmətə belə göndərmək istəmirdi. Bu gün sayı 100 minlərlə olan Ermənistan vətəndaşları əmək miqrantı kimi ölkə hüdudlarından kənarda işləyir. Onların arasında hərbi xidmətdən yayınmaq üçün fərarilik edən gənclər də az deyil. Mövcud vəziyyət Ermənistan rəhbərliyini düşünməyə vadar edir. Çıxış yolu kimi təbliğatın başqa formasını seçməyi uyğun bildilər. Artıq Ermənistan rəhbərliyi anlayır ki, həqiqi hərbi xidmətlə bağl tələb onlardakı silahlı qüvvələrin komplektləşməsini təmin etmir. Bu səbəbdən də Ermənistanda “xalq ordusu” adlı bir formatın reallaşdırılmasına dair bir niyyət ortaya atıldı. Artıq onlar qanunvericilik bazasını belə buna uyğunlaşdırırlar. Məqsəd dünyada yaşayan ermənilərin də hərbi xidmətə cəlb edilməsilə bağlıdır. Hesab edirəm ki, bu, “xalq ordusu” adı ilə muzdlulardan ibarət hərbi birləşmələrin yaradılmasına xidmət edir. Bunun başlıca səbəbi çağırışçıların Ermənistan ordusunda xidmət etmək istəməməsilə bağlıdır. Bu uğurlu layihə deyil. Ermənistanın bu niyyəti də fiaskoya uğrayacaq. Çünki ölkədə vətənpərvərlik hissləri çox aşağı səviyyədədir. Erməni anaları mitinq edib deyirlər ki, övladlarının başqa ərazilərdə ölməsini istəmirlər. Pulla kimlərisə prosesə cəlb etmək də asan deyil. Erməni gənc fikirləşir ki, həyatını risqə atıb pul almaqdansa, gedib başqa ölkənin bazarında alver etsə daha yaxşı olar. Hətta informasiyalar var ki, onlar sıravi əsgər kimi xidmət keçməyə də muzdlular axtarırlar. Bununla bağlı Ermənistanın Müdafiə nazirliyi tərəfindən rəsmi müraciət də olmuşdu. Bu bir da sübut edir ki, Ermənistan ənənəvi ordu formatındakı istəklərini həyata keçirə bilmir. Belə olan halda, digər formatlar da uğursuz olacaq”.
Bu həm də kriminal qrupların əlində müəyyən gücün olmasını təmin edə bilər. Ermənistan düşdüyü vəziyyətdən çıxış yolları tapa bilmədiyi üçün belə qeyri-adekvat addımlar atır.
Məhəmmədəli QƏRİBLİ
