Məlum olduğu kimi, artıq bir neçə gündür ölkə gündəmini AMEA-nın prezidenti Ramiz Mehdiyevin karantin günlərində öz nəvəsinə etdiyi toy və onun ətrafında yaşananlar zəbt edib. Cəmiyyətin ən müxtəlif təbəqələrində təmsil olunan şəxslər bir sıra vəzifəli adamların da həmin toyda iştirakına etirazlarını bildirir.
Ramiz Mehdiyevin özünün də ünvanına sərt tənqidlər səsləndirilir. Bu hadisə Ramiz Mehdiyevin kürəkəni, sabiq millət vəkili İlham Əliyevin və onun qudasının 15 sutkalıq inzibati həbsi ilə nəticələnib. Toyda iştirak edən YAP icra katibinin müavini Siyavuş Novruzov isə partiyada tutduğu vəzifədən istefa verib. Edilən tənqidlərin fonunda Ramiz Mehdiyev də baş verənləri sükutla qarşılamır. Qısa müddət ərzində onun iki məqalə ilə çıxış etdiyi məlum olub. Həmin yazıların baş verənlərə cavab xarakteri daşıdığı üzə çıxır. Ən maraqlısı isə budur ki, Ramiz Mehdiyev hər iki məqaləni AMEA-ya məxsus olan rəsmi sayt vasitəsilə yayıb. Bu addımına görə də Ramiz Mehdiyev ciddi tənqid hədəfinə gəlib. Hesab edilir ki, Ramiz Mehdiyevin dövlət qurumunun rəsmi saytını şəxsi məqsədləri naminə istifadə edərək açıqlama verməsi çox biabırçı haldır. Arqument bundan ibarətdir ki, bu sayt dövlətin elmi-texniki siyasətini həyata keçirir və dövlət hesabına maliyyələşir, amma AMEA rəhbəri ondan şəxsi məqsədləri üçün istifadə edir. Ramiz Mehdiyevin özünə və ailəsinə aid olan məsələni AMEA-nın rəsmi saytı vasitəsilə ictimailəşdirməsi nə dərəcədə doğrudur? Media eksperti Azər Həsrət “Bakı-Xəbər”ə açıqlamasında bildirdi ki, hər bir şəxsin ona yönələn fikirlərə cavab vermək hüququ var:“Bu addımı heç kim mübahisələndirmir. Lakin özünü ifadə etmək üçün seçilən platform ilə bağlı mübahisə etmək mümkündür. Söhbət Ramiz Mehdiyevdən gedirsə, onun tutduğu AMEA-nın prezidenti postuna aid olan olan fikirləri həmin sayt vasitəsilə işıqlandırıla bilər. Bununla bağlı ona irad tutula bilməz. Ancaq akademikin öz ailəsi ilə bağlı məsələləri AMEA-nın rəsmi saytı üzərindən cəmiyyətə təqdim etməsi, yumşaq desək, etik deyil. Çünki AMEA bir dövlət təsisatıdır. Buna görə də, kimsə ondan şəxsi məqsədlər üçün istifadə edə bilməz. Onun ailəsinə aid olan məsələni belə platform üzərindən yayımlaması həm də kobud qanun pozuntusudur. Uzun illər dövlət postunda işləmiş şəxsin davranışı ilə üst-üstə düşmür. Sıradan bir vətəndaş belə səhvə yol verə bilər. Akademik Ramiz Mehdiyev bu yanlışı düzəltməlidir. O öz açıqlamalarını AMEA-nın saytından sildirməlidir. Əgər hansısa məsələyə münasibət bildirmək və ya barəsində səslənən fikirlərə cavab vermək istəyirsə, bunun üçün kifayət qədər başqa vasitələr var. O öz fikirlərini social media üzərindən də yaya bilər. Bu üsulla da cəmiyyətə xitab edə bilər. Bu mərhələdən sonra Ramiz Mehdiyev AMEA-dan da uzaqlaşsa, ən doğru addımı atmış olacaq. Elə bir mərhələyə gəlib çatmışıq ki, onunla bağlı xoş olmayan müzakirələr gedir. Bu da illərlə dövlətin rəsmi qurumlarında çalışmış adam üçün xoş sonluq sayıla bilməz. Meydandan çəkilmək zamanı gəlib çatıbdır”.
Doğrudan da belə məsələlərdən kifayət qədər məlumatı olan Ramiz Mehdiyevin müraciət üçün niyə məhz həmin platformanı seçməsi çox maraqlıdır. Texnologiyaların inkişaf etdiyi indiki məqamda istənilən fikri söyləmək və onu ictimailəşdirmək üçün kifayət qədər alternativ variantlar mövcuddur.
Məhəmmədəli QƏRİBLİ
