Son dövrlər bəzi rayon icra başçılarının öz fəaliyyətlərində yol verdikləri qanun pozuntuları, rüşvətxorluq, mənimsəmə və sair kimi hallarla bağlı aidiyyəti orqanlar ifşaedici faktlar üzə çıxarıb və nəticədə bir neçə icra başçısı həbs edilib.
“...Digər vacib vəzifələrdən biri korrupsiyaya və rüşvətxorluğa qarşı mübarizədir. Hesab edirəm ki, prokurorluq orqanları bu istiqamətdə daha fəal iş aparmalıdırlar. Bu xoşagəlməz hallara qarşı Azərbaycanda çox ciddi mübarizə aparılır. Mən bu məsələ ilə bağlı dəfələrlə öz fikirlərimi bildirmişdim. Bütün dövlət məmurlarını xəbərdar etmişdim və hətta demişdim ki, əgər hansısa dövlət məmuru öz işində düzəlişlər edə bilmirsə, yaxud da ki, istəmirsə, qoy özü könüllü şəkildə dövlət işindən istefa versin”. Bu fikirləri Prezidenti İlham Əliyev mayın 1-də Azərbaycan Respublikasının Baş prokuroru Kamran Əliyevi videoformatda qəbul edərkən həbs olunan icra başçılarının naqis əməlləri haqqında danışarkən bildirib.
Prezident, eyni zamanda, qeyd edib ki, bəzi dövlət məmurları onun sözlərindən nəticə çıxarmaq əvəzinə, neqativ əməllərini davam etdiriblər: “Amma əfsuslar ki, mənim sözlərim bəziləri üçün dərs olmadı və bunun nəticəsində indi Dövlət Təhlükəsizliyi Xidməti bir neçə əməliyyat keçirərək rüşvətxorları, yüksək vəzifə sahiblərini ifşa etdi və onlar artıq cinayət məsuliyyətinə cəlb edilmişlər. Ağstafa, Biləsuvar, Yevlax, Neftçala rayonlarının icra başçıları həbs edilmişdir, ictimaiyyətə bu məsələ ilə bağlı ətraflı məlumat verilmişdir və bundan sonra da ətraflı məlumat veriləcəkdir.
Eyni zamanda, bu yaxınlarda Binəqədi qəsəbə bələdiyyəsinin sədri saxta icazə sənədi satmaqda ittiham olunub və əşyayi-dəlillə saxlanılıb. İsmayıllı rayonunun şəhər üzrə icra nümayəndəsi yardımın mənimsənilməsi ilə məşğul olmuş, kasıb adamlara göndərilən yardımı özünə götürmüşdür. Həbs edilmiş icra başçılarının istintaqı gedir. Ancaq bu gün nümayiş etdirilən videokadrlar onu göstərir ki, rüşvətxorluq bu adamlar üçün əsas prinsip olmuşdur. Yəni bütün aidiyyəti qurumlar, bir qayda olaraq, hər ay icra başçılarına və icra hakimiyyətinin digər nümayəndələrinə rüşvət verməli olmuşlar. Əfsuslar olsun ki, belə xoşagəlməz hallar digər rayonlarda da vardır. Bu haqda məlumat var və bir daha demək istəyirəm ki, heç kim məsuliyyətdən boyun qaçıra bilməyəcək. Heç kim qanundan üstün deyil və əgər kim fikirləşir ki, onun yaxınları, tanışları, qohumları, yüksək vəzifəli dostları ona kömək edəcəklər, səhv edir. Qanun qarşısında hamı bərabərdir, Azərbaycan cəmiyyətində korrupsiya və rüşvətxorluq olmamalıdır. Hər halda biz çalışmalıyıq ki, korrupsiya və rüşvətxorluq üçün meydanı həm inzibati yollarla, həm də institusional üsullarla daraldaq. Eyni zamanda, cəza tədbirləri də tətbiq olunur və tətbiq ediləcəkdir”.
“Görülən işlər də sübut edir ki, cənab Prezidentin etimadından sui-istifadə etmək mümkün deyil”
Məsələyə şərh verən “Xalq cəbhəsi” qəzetinin baş redaktoru, tanınmış siyasi analitik Elçin Mirzəbəyli baki-xeber.com-a bildirdi ki, ölkə başçısının nitqində yer alan bir sıra məsələlərə xüsusi diqqət çəkmək lazımdır. “Hesab edirəm ki, icra başçıları, eləcə də digər dövlət qulluqçuları ilə bağlı konkret şərtlər üzrə indiki şəraitdə münasibət bildirmək doğru deyil. Çünki Azərbaycan Prezidenti hər kəs üçün prioritet hesab olunacaq, yol xəritəsi funksiyası daşıyacaq çox mühüm istiqamətlərə diqqət çəkdi. Prinsip etibarilə hüquq-mühafizə orqanlarında islahatların dərinləşməli və qanunun aliliyinin təmin edilməli olduğunu xüsusi olaraq vurğuladı. Bu təkcə hüquq-mühafizə orqanlarına aid olan məsələ deyil, eyni zamanda, bütün dövlət qulluqçularına, vətəndaşlara aid olan məsələdir. Qanunun aliliyinin təmin edilməsi məsələsində bir tərəf yoxdur, burada müxtəlif tərəflər var. Birbaşa qanunun icrasına nəzarət edən tərəflər, eyni zamanda da qanunun hüquqi bazasını formalaşdıran qanunverici orqan var. Onun əsasında fəaliyyət göstərən və qanunun aliliyinin təmin edilməsinə nəzarətedici funksiya daşıyan qurumlar mövcuddur. Həmçinin də dövlət qulluqçuları var ki, icra başçıları da bura aiddir. Onlar fəaliyyətlərini məhz qanunun aliliyi üzərində qurmalıdırlar. Eyni zamanda, vətəndaşlar da məhz bu prinsiplər üzərində hərəkət etməlidirlər. Biz Azərbayancanda cənab Prezidentin də apardığı islahatlar nəticəsində ortaya çıxacaq tamamilə yenilənmiş bir Azərbaycan görmək istəyiriksə o zaman prioritet qanunun aliliyinin təmin edilməsi olmalıdır. Həmçinin, cənab Prezident qeyd etdi ki, heç kim toxunulmaz deyil, hər kəs özünün konkret cinayət əməlinə görə məsuliyyət daşıyacaq. Təəssüflər olsun, ard-arda baş verən son həbslər də sübuta yetirdi ki, bundan əvvəl həyata keçirilən hüquqi tədbirlər bəzi icra başçılarına, bəzi məmurlara təsir göstərməyib, onlar yenə də öz cinayətkar əməllərini təkrar edirlər. Belələri Azərbaycan Prezidentinin etimadından sui-istifadə etməyə çalışırlar. Amma, eyni zamanda, görülən işlər də sübut edir ki, cənab Prezidentin etimadından sui-istifadə etmək mümkün deyil. Çünki hər kəs gec və ya tez özünün konkret cinayət əməlinə görə cəzasını alacaq”.
E.Mirzəbəylinin sözlərinə görə, Prezident İlham Əliyev yeni Baş prokuroru videoformatda qəbul edərkən burada daha mühüm bir məsələyə də toxunub. O bildirdi ki, bu həm hüquq-mühafizə orqanlarına, həm də bütövlükdə cəmiyyətə ünvanlanan bir mesaj idi. “Məsələ nədir? Hüquq-mühafizə orqanları elə çalışmalıdırlar ki, həm dövlət, həm vətəndaşlar onların işindən razı qalsın, eyni zamanda, dövlətin maraqları və qanunun aliliyi təmin olunsun. Burada qızıl orta prinsipindən söhbət gedir. Bu prinsipə əməl etmək üçün isə yalnız qanunla hərəkət etmək lazımdır. Həm hüquq-mühafizə orqanlarının təmsilçisi, həm dövlət qulluqçusu insan amilini mütləq nəzərə almalıdır. Azərbaycan Prezidenti dəfələrlə bəyan edib ki, Azərbaycanda dövlə siyasətinin təməlində insan amili dayanır. Vətəndaşları əsassız şəkildə incitmək, yaxud onların təşəbbüslərinin qarşısını almaq, sahibkarlara və digər özəl sektorda çalışan insanlara müxtəlif maneələr yaratmaq, əslində, son nəticədə cəmiyyətimizin inkişafına mane olan faktorlardır. Bu konkret bir neçə şəxsin varlanmasına gətirib çıxarırsa, nəticə etibarilə onun zərbəsi cəmiyyətin iqtisadi inkişafına, etimadlı münasibətlərin formalaşmasına dəyir. Məmur başa düşməlidir ki, o, Azərbaycan dövlətini təmsil edir və onun davranışları vətəndaşlar tərəfindən məhz dövlətin, yaxud hakimiyyətin onlara olan münasibəti kimi qəbul olunur. Belə halda, şübhəsiz ki, bu şəxslər təkcə cinayət əməllərinə yol vermirlər, həm də Azərbaycan dövlətçiliyini gözdən salmağa cəhd edirlər. Bu cəhdlər icra başçılarının və digər məmurların törətdikləri cinayət əməllərindən dəfələrlə ağır və böyük cinayətdir. Bu aspektdən düşünürəm ki, hər kəs həyata keçirilən bu tədbirlərdən nəticə çıxarmalıdır və öz fəaliyyətini qanunun aliliyinə, Azərbaycan Prezidentinin dövlət qulluqçuları qarşısında qoyduğu vəzifələrə uyğun şəkildə həyata keçirməlidir” - deyə E.Mirzəbəyli qeyd etdi.
İradə SARIYEVA
