Ermənistanın Qavar rayonundə baş vermiş son olay Nikol Paşinyan iqtidarı üçün ciddi zərbə olmaqla yanaşı, ölkədə kriminal mühitin əhəmiyyətli dərəcədə pisləşdiyini üzə çaxarıb. Baş verənlərlə bağlı artıq hakimiyyət sərt tənqid obyektinə çevrilib. “Armenianreport” portalı bu xüsusda yazır:“Təəssüf ki, Ermənistanda insanların bir-birini öldürməsi artıq normaya çevrilir. Bu o zaman baş verir ki, insanlar polisə, ədalət məhkəməsinə inanmır. Qavarda baş verənlər insanların artıq kriminal mühitlə barışdığını göstərir. Olaylar həm də hakimiyyətin ölkəni idarə etmək bacarığında olmadığını ortaya qoydu. Paşinyan diqqəti sadəcə əvvəlki hakimiyyətlə mübarizəyə yönəltdi və Ermənistanda nəzarəti itirdi. Ona görə də Ermənistanda insanların bir-birini öldürməsi artıq adi normaya çevrilir”.
Xatırladaq ki, Qavar rayonunda qeydə alınan silahlı insident nəticəsində 4 nəfər öldürülüb, daha 4 nəfər yaralanıb. Bildirilir ki, Qavar şəhəri və Noratus kəndinin gənc sakinləri naməlum səbəbdən mübahisə ediblər, daha sonra söhbətə böyüklər qarışıb. Nəticədə baş vermiş atışmada hərbi müstəntiq Zorik Paronikyan və onun dostu Vahe Avetisyan qətlə yetirilib. Məlumata görə, atışmada öldürülən hərbi polisin müstəntiqinin qohumları və Avetisyanın qardaşının başçılığı altında olan dəstə xəstəxanaya gələrək silahlı insident zamanı yaralanan və Qavardan olan iki şəxsin boğazını kəsməklə onları qətlə yetiriblər. Qeyd edilir ki, xəstəxanada öldürülən şəxslər Armen və Xaçik adlı qardaşlardır. Məlumata görə, rayonda nəzarətdən çıxmış vəziyyəti idarə etmək üçün hadisə yerinə Qavar polisinin rəisi Arman Sarkisyan gəlib. Amma xəstəxanada vəziyyət elə gərginləşib ki, hətta müstəntiqlər ora daxil ola bilməyiblər. “Armlur.am”ın məlumatına görə, dəmir alətlərlə silahlanmış bir qrup şəxs polis əməkdaşlarının olduğu xəstəxanaya soxulub. Onlar xəstəxananın əmlakını dağıtmağa başlayıblar, bundan sonra polis kordonunu yararaq palataya giriblər və yaralıların boğazını kəsiblər. Dəstə üzvləri bundan sonra xəstəxananı tərk ediblər. Yerli qubernator Qnel Sanosyan isə bildirib ki, xəstəxanaya 500-ə yaxın insan soxulub. Sayt daha sonra yazır:“Hadisə zamanı Ermənistanın polis rəisi Arman Sarkisyan polislərlə birlikdə xəstəxanada olub. Lakin Sarkisyanın xəstəxanada olmadığını qəbul etsək belə, ona xəstəxanaya daxil olmaq və insanları “kəsmək” haqqında dərhal məruzə etməyiblər? Həmin vaxt o niyə vəziyyəti nəzarət altına götürmək üçün “yeni hadisə yerinə” tələsməyib? Kimdən çəkinib və ya qorxub? Bundan əlavə, polis qüvvələri xəstəxananın ərazisinə nəzarət edirdisə, niyə xəstəxanaya daxil olan noratusluların girişinin qarşısını almaq üçün heç olmasa havaya atəş açmayıblar? Olaylarda polisin də əlinin olması artıq istisna deyil”.
Ermənistan Milli Təhlükəsizlik Xidmətinin keçmiş direktoru Artur Vanetsyan baş verənləri belə şərh edir:“Ermənistanın baş naziri Nikol Paşinyanın səriştəsiz rəhbərliyi nəticəsində polis hüquq-mühafizə orqanı kimi hazırkı şəraitdə mövcud deyil. Qavarda baş vermiş hadisələr bu həqiqəti tamamilə təsdiqləyir”. Erməni hüquq müdafiəçisi Arsen Babayan isə bildirir:“Ermənistan hakimiyyətinin artıq sonu yaxınlaşır. Bunun yeganə günahkarı onlar özləridir. Baş nazirin birbaşa tabeliyində olan Ermənistan polis rəisinin nəzərindəki polis kordonu dağıdılır, xəstəxanaya soxulurlar və yaralıların boğazlarını gözlərinin önündə kəsirlər. Baş nazirin sözçüsü cəmiyyətə yanlış məlumat verir. Nikol Paşinyan isə öz "yaradıcılığında" Ermənistan Milli Təhlükəsizlik Xidmətinin keçmiş direktoru Artur Vanetsyanın adını çəkməyə çalışır".
Bütün bunlar fonunda ölkənin diqqətini daha bir hadisə cəlb edib. Belə ki, bu olayın ardınca Ermənistanda bir qrup maskalı şəxs Noratus kəndində evlərə hücum edib. Bildirilir ki, 30 nəfərdən artıq maskalı şəxs əvvəl Qriqor Mnoyan adlı sakinin evinə hücum edib, onu və anasını döyüb, 6 aylıq hamilə həyat yoldaşına isə təzyiq göstəriblər. Daha sonra onlar kimləsə telefonla danışaraq yanlış ünvana gəldiklərini deyiblər. Ardınca digər kənd sakinlərinin evlərinə basqın ediblər. Hadisənin motivləri məlum deyil. Amma erməni mediası bunlar fonunda ölkədə kriminal idarəçiliyin artıq ön plana çıxdığını bildirir. Qeyd olunur ki, elə bu səbəbdən Ermənistan parlamentinin vitse-spikeri Alen Simonyan müxalif bloqqer Artur Danielyanla söhbətini hüquq yox, kriminal aləmə xas üslubda həll edir. Belə ki, Alen Simonyanla “Adekvad” ictimai-siyasi təşkilatının üzvləri arasında dava olub. “Adekvad” üzvlərindən Konstantin Ter-Nakalyan təşkilatın rəhbəri Artur Danielyanın burnu əzilmiş haldakı şəklini sosial şəbəkədə yerləşdirərək ona Simonyanın hücum etdiyini yazıb. Qeyd edək ki, baş nazir Nikol Paşinyanın siyasətinə qarşı çıxan “Adekvad” ölkənin Soros Fondu tərəfindən idarə olunduğunu bildirir. “Armenianreport” portalı yazır ki, bütün bunlar hüquqi dövlətin yoxluğunun göstəricisidir:“Zəif hakimiyyət dövlətçiliyi də zəiflədib. Özü də kritik nöqtəyə qədər zəiflədib. Ermənistan bir dövlət kimi məhv olur. Bundan sonra da küçə qanunlarının ön planda yer alması artıq qaçılmaz sayılır. Hakimiyyət bunu önləmək iqtidarında deyil”.
Nahid SALAYEV
