Səhiyyə naziri Oqtay Şirəliyev son müsahibəsində deyib ki, türkdilli dövlətlərin səhiyyə nazirlikləri arasında yeni qurum yaradılacaq.
Nazir baş tutan türkdilli dövlətlərin səhiyyə nazirlərinin görüşü haqqında məlumat verərkən bildirib ki, bu görüşdəki müzakirələr böyük əhəmiyyətə malikdir:"Bildiyiniz kimi, Prezident İlham Əliyevin təşəbbüsü ilə aprelin 10-da Türk Şurasının videokonfrans vasitəsilə fövqəladə Zirvə görüşü keçirilib. Zirvə görüşü koronavirus pandemiyası ilə mübarizə mövzusuna həsr olunub. Bu görüşdə Prezident İlham Əliyevin təklifi idi ki, həmin ölkələrin səhiyyə nazirləri də videokonfransla görüşərək pandemiya ilə bağlı öz fikirlərini bölüşsünlər. Çox qısa vaxtda ölkələrlə əlaqə saxlanıldı və bu fikir həmin ölkələr tərəfindən də məmnuniyyətlə dəstəkləndi. Bu gün görüş baş tutdu. Görüşdə Türkdilli dövlətlərin səhiyyə rəhbərləri ilə yanaşı, Ümumdünya Səhiyyə Təşkilatının (ÜST) Avropa Regional Bürosunun direktoru Hans Klüqe də iştirak edib. O, Azərbaycanda dəfələrlə olub və vurğulayıb ki, Azərbaycan Prezidentinin səhiyyəyə olan dəstəyinin şahidi olub. Bu dəstəyin nəticəsində səhiyyənin burada gözəl infrastrukturu var, eyni zamanda güclü, çevikdir". Nazir bildirib ki, cənab Prezidentin səhiyyə nazirlikləri arasında bir ekspert qurumu yaradılması ilə bağlı təklifi olmuşdu:“Bütün infeksiyalara qarşı ümumi strategiya yaradılsın, bütün əsas məlumatlar, epidemioloji nəzarət, profilaktika, yeni müalicə üsulları və s. müzakirə edilsin. Bütün iştirakçilar bu təklifi dəstəklədi və tərəflərin ekspertlərindən ibarət Birgə İşçi Qrupunun yaradılması qərara alındı".
Göründüyü kimi, türkdilli ölkələrin səhiyyələri arasında Birgə İşçi Qrupun yaradılması ilə bağlı qərar qəbul edilib. Bunun pandemiya və postpandemiya dönəmi üçün nə kimi əhəmiyyəti olacaq? Milli QHT Forumunun prezidenti Rauf Zeyni “Bakı-Xəbər”ə açıqlamasında bildirdi ki, yeni yaradalan qurumun ideya müəllifi də cənab İlham Əliyev olub:“Bir daha sübut olundu ki, Azərbaycan bəşəri problemlərlə bağlı yalnız özünü düşünmür. Adətən belə təşəbbüslərlə çox böyük dövlətlər çıxış edir. Ancaq biz müxtəlif istiqamətlər üzrə Azərbaycanın böyük təşəbbüskarlıqlarının şahidi olmuşuq. İş burasındadır ki, bu təşəbbüslər söz olaraq deyilib sonra yaddan çıxmayıb. Hər birinin həyata keçməsi üçün səy göstərilib, vəsait xərclənib. Bu bir daha bizim ölkənin qüdrətindən xəbər verir. Aprelin 10-da Prezident İlham Əliyevin təşəbbüsü ilə Türkdilli Dövlətlərin Əməkdaşlıq Şurasının videokonfrans vasitəsilə fövqəladə Zirvə görüşü keçirildi. Videokonfransa türkdilli dövlət başçıları ilə yanaşı Ümumdünya Səhiyyə Təşkilatının baş direktoru da qatılmışdı. Həmin vaxt ölkə başçısı belə bir təşəbbüsü irəli sürdü. Düşünürəm ki, dövlətlər səviyyəsində atılan bu addımın təcrübə mübadiləsinin aparılması, türkdilli ölkələrin bir-birinə dəstək göstərməsi və xalqlarımız arasında həmrəyliyin möhkəmləndirilməsi baxımından önəmli olacaq. Bununla bir daha sübut olundu ki, indiki ağır şəraitdə də türkdilli ölkələr əlaqəli şəkildə fəaliyyətlərini davam etdirməyə qadirdirlər. Bu qurumun yaradılması digər beynəlxalq təşkilatlara və birliklərə örnək sayıla bilər. Koronavirusla bağlı pandemiya özlərini strateji tərəfdaş adlandıran ölkələr arasında müxtəlif fikir ayrılıqları yaradarkən, qarşılıqlı ittihamlara yol açarkən Türk Şurasının üzvləri əsl əməkdaşlıq və anlaşma nümunəsi göstərirlər və bu əzmlə davam etmək niyyətində olduqları bir daha göründü. Hesab edirəm ki, səhiyyə qurumları arasındakı bu əməkdaşlıq formatı postpandemiya dönəmi üçün də önəmlidir və bunun ölkələrə yalnız faydası dəyəcək”.
Məhəmmədəli QƏRİBLİ
