Prezident İlham Əliyev aprelin 28-də Avropa Yenidənqurma və İnkişaf Bankının prezidentinin təşəbbüsü ilə keçirilən videokonfransda deyib ki, biz koronavirusla mübarizə sahəsində ilk gündən real vəziyyətə əsaslanan tədbirlər görməyə başladıq: “Vəziyyətin düzgün dəyərləndirilməsi və bu böhranla məşğul olunması üçün səmərəli komandanın yaradılması bizim üçün çox vacib idi.
Azərbaycana bu virus qonşuluqdan gəldi və bunun qarşısını almaq üçün biz müvafiq addımlar atdıq və qonşu dövlətlərlə razılıq və birgə qərar əsasında sərhədlərimizi bağladıq”. Dövlət başçısı bildirib: "Hesab edirəm ki, biz bu qərarı vaxtında və digər ölkələrin bənzər qərarlarından tez verdik və beləliklə zaman udmuş olduq. Biz görürük ki, bu virusla mübarizədə ən vacib məsələ vaxtdır, çünki heç bir ölkənin səhiyyə sistemi bu qədər böyük sayda yoluxmuş insanların müalicəsinə hazır deyil. Bu səbəbdən vaxtın qazanılması, səhiyyə sistemimizin hazırlanması, mütəxəssis və həkimlərimizin səfərbər edilməsi və düzgün idarəçiliyin qurulması əsas hədəflərimiz oldu. Daha sonra biz virusun ölkə ərazisində yayılmasının şahidi olduq və mart ayından etibarən məhdudlaşdırıcı tədbirlər həyata keçirməyə başladıq. Biz Ümumdünya Səhiyyə Təşkilatı ilə daimi təmasdayıq və bu təmaslar davam edir. Biz vəziyyətin dəyərləndirilməsi üçün ölkəyə mütəxəssislərdən ibarət heyətin göndərilməsi ilə bağlı Ümumdünya Səhiyyə Təşkilatına müraciət etdik və onlar bunu etdilər və daha sonra bəyanatla çıxış etdilər ki, Azərbaycan zəruri tədbirləri görür. Onlar da öz növbələrində müəyyən tövsiyələrini verdilər. Daha sonra Ümumdünya Səhiyyə Təşkilatı bəyanat yayaraq Azərbaycanı koronavirusla mübarizə sahəsində nümunə kimi göstərmişdir. Vaxtaşırı sərtləşdirdiyimiz məhdudlaşdırıcı tədbirlərin müsbət nəticəsi olmuşdur və artıq iki həftədir ki, bizdə müsbət dinamika var. Yəni sağalanların sayı yoluxanların sayından artıqdır. Ölüm faizinin nisbətən aşağı olması onu göstərir ki, işlər müsbət istiqamətdə aparılır. Dünəndən biz məhdudlaşdırıcı tədbirləri yumşaltmağa başlamışıq. İqtisadiyyatımıza təsirə gəldikdə, əlbəttə, təsir mənfi olacaqdır. Bizim ilin əvvəlində müsbət perspektivlərimiz var idi. Hələ də ilin ilk rübünə nəzərə salsaq, artım 1 faizdir, qeyri-neft sektorunda artım 3 faiz təşkil edir, qeyri-enerji sahəsində artım isə 23 faizdir".
Prezidentin bu çıxışında diqqət çəkən məqamlardan biri də pandemiya ilə mübarizədə əldə edilən qənaətbəxş nəticəyə vaxtında yaradılan səmərəli komandanın köməyi ilə nail olmaqla bağlıdır. Bu səmərəli komanda Azərbaycana virusa qarşı mübarizədə nə verə bildi? “Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, ölkə rəhbərliyinin iki il əvvəl başlatdığı islahat paketi özünü bütün sahələrdə göstərməyə başlayıb:“Azərbaycanın idarəetmə sistemində ciddi izam-intizam mövcuddur. Biz bunu digər məsələlərlə də bağlı görmüşük. Pandemiya dönəmində biz daha nizam-intizamlı davrandıq. Dərhal Operativ Qərərgah yaradıldı. Bu problemlə yaxından məşğul olacaq komanda formalaşdı. Bunun əhəmiyyəti ondan ibarət idi ki, hər kəs həmin komandanın daxilində hansı işi görəcəyini bilirdi. Bu da iş əmsalını yüksəldirdi. Bunun üçün baza rolunu isə bizim dövlət qurumlarının zamanında modernləşməsi oldu. Bizim əldə etdiyimiz nəticələr göz qabağındadır. Başlıca prinsip gözlənilməz vəziyyətə dövlət qurumlarının hazır olmasından ibarət olub. Cənab Prezidentin özünün rəhbərliyi ilə həyata keçirilən prosesdən biz yaxşı nəticələrlə çıxmaq ərəfəsindəyik. Təsadüfi deyil ki, bizim bu sahədə gördüyümüz işləri dünyanın ən nüfuzlu təşkilatları da təqdir edir. Pandemiya ilə bağlı formalaşan çevik komandanın iş əmsalı yüksək dəyərləndirilə bilər. Hətta dünyanın ən inkişaf etmiş ölkələri belə bu prosesdən böyük itki ilə çıxdılar. Artıq sübut olunur ki, Azərbaycanda istənilən gözlənilməz situasiya ilə bağlı dövlətin güclü immuniteti formalaşıb. Biz heç kimdən borc istəmədən, daxili imkanlarımız hesabına bu böyük bəla ilə mübarizəni apara bildiksə, deməli, ən başlıcası, işin təşkili düzgün olub. Çox da arxayınlaşmamalıyıq. Çünki pandemiya hələ tam bitməyib. Səbrlə dövlətin elan etdiyi proqrama uyğun şəkildə davranmalıyıq ki, virusin yenidən yayılma dalğası ilə üzləşməyək. Əminəm ki, ölkəmizin bu təcrübəsindən digər dövlətlər də yararlanacaq”.
Məhəmmədəli QƏRİBLİ
