Ermənistandakı siyasi mübarizənin klanlar arasında getdiyi hamıya məlumdur. Həmin ölkədəki siyasi dairələr bunu nə qədər pərdələməyə çalışsalar da, mümkün olmur. Artıq bu mübarizəyə siyasətçilərin ailə üzvləri də qoşulub.
Erməni KİV-nin verdiyi məlumata görə, həbsdə olan “Qarabağ klanı”nın lideri, Ermənistanın ikinci prezidenti Robert Köçəryanın oğlu Levon Köçəryan Nikol Paşinyanı tənqid və təhqir edən yazı paylaşıb. O, Paşinyana olan nifrətini gizlətməyərək onun nə statusunu, nə də soyadını yazıb. Paşinyanı sadəcə “Amerikanın Nikolu” adlandıran Levon Köçəryan onu “1998-ci ildən əvvəlki status-kvonu bərpa etməkdə” ittiham edib:“Əslində, 1998-ci ildən əvvəl mövcud olan uğursuz status-kvonu bərpa edir. Amerikanın Nikolu 1998-ci ilə qədər mövcud olan status-kvonu bərpa etməklə təhdid edir. Düzdür, o, ailəmiz haqqında boş-boş söhbətlər etdi və ən sevdiyi “mahnı”nı oxudu, amma əslində ifadəsinin fərqli bir mənası var. 1998-ci ildən əvvəl mövcud olan status-kvonun bərpası iqtisadiyyatı məhv etmək və Qarabağ məsələsinin həllində çoxdan imtina edilmiş mərhələli həll variantına qayıtmaq deməkdir”. Köçəryanın oğlunun bu açıqlaması Ermənistandakı siyasi mübarizənin mahiyyəti ilə bağlı daha hansı gerçəkilkləri üzə çıxarmış oldu?
Elşən Mustafayev: “Bu da klanlar arasındakı ziddiyyətin daha açıq müstəviyə qədəm qoyduğuna sübutdur”
Politoloq Elşən Mustafayev qəzetimizə açıqlamasında bildirdi ki, Ermənistanda “küçə demokratiyası”nın qələbəsi ilə hakimiyyətə gəlmiş Nikol Paşinyanın özündən əvvəl 20 il hakimiyyətdə olmuş “Qarabağ klanı”na qarşı apardığı total mübarizə işğalçı ölkədə siyasi mübarizəni getdikcə daha da dərinləşdirib:“Azərbaycanın işğal olunmuş ərazilərinin dağlıq hissəsində yaradılmış oyuncaq-separatçı rejimin rəhbərliyinə də Paşinyana nisbətən yaxın olan adamın seçilməsi bu qarşıdurmanı son həddə çatdırıb. Paşinyan hakimiyyəti “DQR” pezidentliyinə öz adamını yerləşdirməklə Dağlıq Qarabağda mövcudluğunu davam etdirən “Köçəryan-Sarkisyan klanı”nın son qalasını da özünə tabe etməyi bacardı. “Qarabağ klanı” isə son “seçkidə” öz namizədinin qələbəsinə Ermənistanda hakimiyyətə qayıtmağın son şansı kimi baxırdı. Çünki bundan əvvəlki əslən Qarabağdan olan prezidentlərin Ermənistanda hakimiyyət tramplinə yüksəlməsinin startı da məhz separatçılara rəhbərlikdən sonra baş tutub. Paşinyanla bundan əvvəlki separatçı, qondarma Dağlıq Qarabağ rejimi arasındakı böhranın əsas səbəbi separatçıların “Qarabağ klanı” ilə bağlı olması idi. Dağlıq Qarabağdakı separatçı rejim, gizli olsa da, müxalifətdə olan Sarkisyan-Köçəryan klanını müdafiə edirdi. Bu da qətiyyən Paşinyan hökumətini razı sala bilməzdi. Bilirsiniz ki, Dağlıq Qarabağ məsələsi bu gün də Ermənistan ictimaiyyəti üçün həssas mövzu olaraq qalır. Millətçilik xəstəliyi bütün erməni cəmiyyətinə sirayət etdiyindən, yenə də Dağlıq Qarabağdan siyasi kart olaraq siyasi mübarizədə istifadə edirlər. Ona görə də, Paşinyan bu klanı tam olaraq siyasi səhnədən silməyi düşünür. Paşinyan separatçı rejimin dəyişdirilməsinə nail olmaqla təkcə Ermənistanda deyil, həm də Dağlıq Qarabağda möhkəmlənmiş oldu. Görürsünüz ki, Köçəryanın oğlunun müraciətində də məhz Qarabağ məsələsinə Paşinyanın yanaşmasının səhv olduğu qeyd edilir. O, atasının haqsız yerə həbs edildiyinə eham vurmur, əsasən siyasi münaqişənin həllində olan nöqsanlara diqqəti yönəldir. Bu da klanlar arasındakı ziddiyyətin daha açıq müstəviyə qədəm qoyduğuna sübutdur. Müraciətin təhqir tonunda olması bunu söyləməyə əsas verir”.
Məhəmmədəli QƏRİBLİ
