Putin Rusiya vətəndaşlığını almağı asanlaşdırdı. Belə ki, Rusiya Prezidenti Vladimir Putin vətəndaşlara mövcud vətəndaşlığından imtina etmədən Rusiya vətəndaşlığını verməyə imkan verən bir qanun imzalayıb. Bundan əvvəl Rusiya vətəndaşlığını əldə etmək üçün başqa bir ölkənin vətəndaşlığından imtina etmək tələb olunurdu.
Qanun, eyni zamanda, Rusiya Federasiyasının ərazisində üç il qalmaq və postsovet məkanından insanlar üçün qanuni bir maliyyə mənbəyinin mövcudluğunu təsdiqləmək tələbini də istisna edir. Rusiyada yaşamaq şərtilə Rusiya Federasiyası vətəndaşları ilə evlənən və ortaq övladı olan əcnəbilər, habelə valideynlərindən ən azı biri Rusiyada yaşayan Rusiya Federasiyasının vətəndaşı olan əcnəbilər üçün də bu tələblər istisna edilir. Artıq vətəndaşlıq almaq üçün sadələşdirilmiş prosedur Ukrayna, Moldova, Belarus, Qırğızıstan və Qazaxıstan sakinlərinə etibarlı yaşayış icazəsilə, lakin Rusiya Federasiyasında müəyyən edilmiş yaşayış müddətinə əməl etmədən tətbiq ediləcək. Həm də bir ildən üç ilədək Rusiya vətəndaşlığını almaq üçün Rusiyada yaşayan və 1 iyul 2002-ci ildən sonra Rusiya Federasiyasının təhsil və ya elmi təşkilatlarında əsas akkreditasiya ilə təhsil almış əcnəbilər və vətəndaşlığı olmayan şəxslər üçün müraciət edilərkən iş müddətinin artırılması tələbi azalır. Qanun dərc edildikdən 90 gün sonra qüvvəyə minəcək.
Burada diqqətçəkən məqam odur ki, vətəndaşlıq almaq üçün sadələşdirilmiş prosedur Ermənistana şamil edilməyəcək. Hansı ki, siyahıda Avrasiya İqtisadi İttifaqında təmsil olunan 3 ölkənin adı var.
Maraqlıdır, Ermənistan vətəndaşlarının bu siyahıdan kənarda qalmasını ekspertlər necə dəyərləndirirlər?
“Məhz Putinin məlum qərarının Ermənistana şamil olunmaması...”
Məsələyə münasibət bildirən politoloq Məhəmməd Əsədullazadə buna bir neçə aspektdən yanaşdı: “Burada Rusiya-Ermənistan əlaqələrinin inkişafından söhbət gedə bilməz. Sadəcə, bu ölkədə Rusiyanın hərbi bazası olduğu üçün, Ermənistanı öz geosiyasi məqsədləri naminə nəzarətində saxlayır. Ermənistan Rusiya üçün heç bir siyasi əhəmiyyəti olmayan ölkədir. Məhz Putinin məlum qərarının Ermənistana şamil olunmaması bu ölkənin Rusiya üçün gələcək perspektivdə xüsusi əhəmiyyət kəsb etmədiyinin bariz nümunəsədir. Hesab edirəm ki, Avrasiya İttifaqı çərçivəsində Ermənistana bu hüquq tanınmadı. Deməli, Rusiyanın başlıca vəzifəsi Ermənistandan yalnız öz hərbi məqsədləri üçün istifadə etməkdir. Ermənistan, sadəcə, Rusiyanın 102-ci bazasının ərazisi və poliqonu rolundadır. Ona göərə də Rusiya Ermənistanı bu qədər əhəmiyyətsiz ölkə kimi görür. Əslində, bundan nəticə çıxaran olan ölkə Ermənistan olmalıdır. Nikol Paşinyan bilməlidir ki, Rusiya bu ölkəni qəbul etmir. O üzdən, Qarabağ məsələsində Rusiyadan uzaqlaşıb, praqmatik qərarlar qəbul edib, öz işğalçı mahiyyətini kənara qoyub Azərbaycanla razılığa gəlməlidir. İşğal faktoru Ermənistanı bir ölkə kimi Rusiya üçün tam bir poliqon vəziyyətinə gətirib. Hesab edirəm ki, Rusiyanın bu qərarı Ermənistana bir daha yerini göstərmək üçün əsl bir fürsət oldu”.
Vidadi ORDAHALLI
