Azərbaycan Xarici işlər naziri Elmar Məmmədyarovun erməni həmkarı ilə aprelin 21-də keçirdiyi videokonfransdan sonra ABŞ-dakı bəzi nəşrlər iddia etməyə başlayıblar ki, münaqişə bölgəsində tamamilə fərqli mənzərə yaranıb, yəni “hərbi toqquşmaların sayında azalma yaşanıb”. Ancaq bunun heç də belə olmadığını müşahidə edirik. Çünki pandemiya dönəmində Ermənistan tərəfinin dəfələrlə atəşkəsi kobud şəkildə pozduğunun şahidi oluruq.
Eyni zamanda, Ermənistan bu müddət ərzində baş tutan danışıqlar prosesində qeyri konstruktivlik kimi inadlı mövqeyini davam etdirir ki, bu da gərginliyin artmasına xidmət edir. ABŞ nəşrlərinin pandemiya dönəmində Dağlıq Qarabağ münaqişəsi ilə bağlı verdiyi təsnifatlanmaya ekspertlərin yanaşması necədir?
Rəşad Bayramov: “Bütün bunlar bir daha sübut edir ki, istər ABŞ, istərsə də münaqişənin həllində iştirak edən digər dövlətlər və qurumlar öz fəaliyyətlərində səmimi deyillər”
Azərbaycan Milli İstiqlal Partiyası Siyasi Şurasının üzvü, politoloq Rəşad Bayramov “Bakı-Xəbər”ə bildirdi ki, haqqında danışdığınız yazı ilə tanışdır:“Orada iddia olunur ki, ötən ay atəşkəs rejiminin pozulması nəticəsində 3 əsgər və 1 mülki vətəndaş yaralanıb və güya bunların da hamısı erməni olub, lakin ölüm halı qeyd alınmayıb:“Halbuki, keçmişdə tərəflər bu aylarda daha çox itki verirdilər”. Yazıda, həmçinin, Beynəlxalq Böhran Qrupunun hesabatına da istinad olunur. Beynəlxalq Böhran Qrupu da ötən illərin yaz fəsli ilə müqayisədə 2020-ci ilin bu dövründə hərbi toqquşmaların sayının azaldığını bildirib. Hətta hesabatda o da etiraf olunur ki, vəziyyətin belə sakit olacağını onlar da proqnazlaşdırıblar. Göründüyü kimi, istər ABŞ nəşrlərində gedən yazılarda, istərsə də Beynəlxalq Böhran Qrupunun hesabatında bir dəfə də olsun Ermənistanın destruktiv mövqeyi, atəşkəs rejimini dəfələrlə pozması, eləcə də mülki əhalini hədəf alması ilə bağlı bircə kəlmə fikir işlədilmir. Ermənistan və Azərbaycan xarici işlər nazirləri arasında aprelin 21-də keçirilən videokonfrans barədə statistik məlumat verən nəşrlər, nədənsə, Ermənistan XİN rəhbəri Mnatsakanyanın son bəyanatı haqqında, eləcə də separatçı rejimin pandemiya dövründə Dağlıq Qarabağda “seçki” keçirməsi haqqında danışmamağa üstünlük verirlər. Halbuki, Dağlıq Qarabağda keçirilən “seçki”, demək olar ki, bütün beynəlxalq təşkilatlar və aparıcı dövlətlər tərəfindən kəskin olaraq pislənib və bu cür davranışın danışıqlar prosesinə mənfi təsir etdiyi vurğulanıb. Bütün bunlar bir daha sübut edir ki, istər ABŞ, istərsə də münaqişənin həllində iştirak edən digər dövlətlər və qurumlar öz fəaliyyətlərində səmimi deyillər. Əks halda bu gün Azərbaycan-Ermənistan cəbhəsində “vəziyyətin belə sakit olacağını biz də proqnazlaşdırmırdıq” deyən nəşrlər və ekspertlər reallığı əks etdirən həqiqətləri ortaya qoyar və ermənilərin qeyri-kostruktiv mövqeyinin münaqişənin həllinə imkan vermədiyini vurğulayardılar. Atəşkəsin pozulması ilə bağlı statistikaya nəzər yetirsəniz bunun daha çox qarşı tərəfdən edildiyinin şahidi olarsınız. ABŞ nəşrləri məsuliyyəti tərəflər arasında bərabərləşdirməklə qeyri-obyektivliyə yol verirlər”.
Məhəmmədəli QƏRİBLİ
