Məlum olduğu kimi, aprel ayının 23-də Ali Məhkəmənin Plenumunda ReAL Partiyasının sədri İlqar Məmmədovun, eləcə də hüquq müdafiəçisi Rəsul Cəfərovun barəsində olan hökmlə bağlı işə baxılıb. Hər iki məsələ üzrə şəxslər barəsindəki cinayət işinə bəraətverici əsaslarla xitam verilib.
Qeyd edək ki, bu şəxslərin həbsi daim beynəlxalq təşkilatlar, xüsusilə də Avropa Şurası tərəfindən siyasiləşdirilib. Onların həbsi ilə bağlı beynəlxalq təşkilatlar tərəfindən Azərbaycanın ünvanına tənqidlər səsləndirilib. Ancaq maraqlıdır ki, Azərbaycan məhkəməsi tərəfindən onlara verilən bəraət və maddi təzminatla bağlı biz sözügedən beynəlxalq təşkilatların operativ reaksiyalarının şahidi olmadıq. Bunu ikili standartın növbəti təzahürü saymaq olarmı?
Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, burada təəccüblü nəsə görmür: “Biz artıq beynəlxalq qurumların qeyri-obyektiv yanaşmasını dəfələrlə müşahidə etmişik. Avropa Şurası və digər qurumlar bu iki şəxsi və başqalarını siyasi məhbus sayırdılar. Halbuki, Azərbaycan tərəfi kiminsə siyasi əqidəsinə görə təqib edilmədiyini dəfələrlə bəyan edib. ReAL Partiyasının sədri İlqar Məmmədov və hüquq müdafiəçisi Rəsul Cəfərov barəsində cinayət işinə bəraətverici əsaslarla xitam verilməsi Azərbaycanda heç bir vətəndaşa qarşı siyasi əqidəsinə görə ayrıseçkiliyin olmadığını bir daha sübut edir. Bu, ölkəmizdə hüququn aliliyinin təzahürüdür. Qeyd edim ki, İlqar Məmmədov və Rəsul Cəfərov ilə yanaşı, bir neçə başqa şəxsin məsələsi də Avropa Şurasında uzun illərdir müzakirə obyekti kimi diqqətdədir. Avropa İnsan Haqları Məhkəməsi bununla bağlı bir neçə dəfə qərar qəbul edib. Nazirlər Komitəsinin pandemiyaya qədər baş tutan sonuncu, yanvar sessiyasında bu məsələ yenidən gündəmə gətirilmişdi. İlqar Məmmədova və Rəsul Cəfərova dair işlə bağlı bəraətverici əsaslarla xitam, eləcə də onlara kompensasiya ödənilməsinə dair qərarın verilməsi insan haqlarına münasibətin əyani sübutudur. Təəssüflə qeyd etməliyəm ki, bu cür məsələlərdən daim Azərbaycan dövlətinə qarşı təzyiq vasitəsi kimi istifadə ediblər. Maraqlıdır ki, biz analoji canlanmanı, səs-küyü indiki halda müşahidə etmirik. Bununla Azərbaycanın siyasətinə müdaxilə etmək niyyətində olanlar hansı dərəcədə qərəzli olduqlarını bir daha nümayiş etdirdilər. Bir daha sübut olundu ki, Azərbaycanda insan haqlarına, siyasi rəqiblərə olan münasibət Avropanın bəzi ölkələri üçün də örnək ola bilər”.
Məhəmmədəli QƏRİBLİ
