Azərbaycanda baş verən son siyasi proseslərə erməni mediası xüsusi yer ayırır. Müxalifyönümlü fəallara Ali Məhkəmənin bəraət və maddi təzminat verməsi də onların diqqət mərkəzindədir.
Görünən budur ki, erməni təbliğat maşını ReAl sədri İlqar Məmmədov ətrafında baş verənləri öz maraqları üçün interpretasiya edir. Onlar Azərbaycanın bəzi millət vəkillərinin xarici işlər naziri Elmar Məmmədyarov haqda səsləndirdiyi tənqidi fikirlərlə də bağlı müəyyən “nəticəyə” gəliblər. Həmin ölkənin tanınmış siyasi saytları, güya Azərbaycan hakimiyyətinin bu istiqamətdə xüsusi planının olduğuna işarə edir və yeni xarici işlər nazirinin ReAl sədri İlqar Məmmədovun təyin olunacağını qeyd edirlər. İlk baxışdan bu inandırıcı və məntiqi sayılmır. Çünki XİN rəhbəri kimi konfidensiallıq tələb edən vəzifəyə müxalif partiya sədrinin təyinatına hakimiyyətin gedəcəyi çox risqli addım sayıla bilər. Düzdür, son zamanlar Azərbaycanın siyasi sistemində islahatların getdiyinin şahidi oluruq. Bu özünü parlament idarəçiliyində, siyasi partiyaların qeydiyyatında və müxalif fəallara verilən bəraət hökmlərində göstərir. Ancaq bu heç də o anlama gəlmir ki, hakimiyyət müxalifətlə vacib nazir portfellərini də bölüşməyə hazırdır. Hələlik belə zərurət üfüqdə də görünmədiyi üçün, maraqlıdır, erməni mediasının İlqar Məmmədovun üzərindən belə dezinformasiyaları tirajlamaqda hansı maraqları ola bilər?
Əhəd Məmmədli: “Nəzərə almalıyıq ki, onlar bizimlə həm də informasiya mübarizəsi aparırlar”
Müxalifyönümlü Ağ Partiyanın funksioneri, politoloq Əhəd Məmmədli “Bakı-Xəbər”ə açıqlamasında bildirdi ki, ermənilərin yaydığı bu versiyanı tamamilə absurd sayır:“Bu xəbərin heç bir məntiqi əsası yoxdur. Hakimiyyətin xarici işlər naziri kimi önəmli bir postu müxalifətə güzəştə gedəcəyi inandırıcı sayılmır. İslahatlar fonunda hansısa müxalifətçinin bəzi vəzifələrə təyin oluna biləcəyi inandırıcı sayıla bilər. Biz bunu Rusiya praktikasında görmüşük. Dmitriy Medvedyevin prezidentliyi dönəmində Kirov vilayətinin qubernatoru postuna bir müxalifət liderini təyin etmişdilər. Bizdə müəyyən icra qurumlarına müxalifətçilərin təyin olunması baş tuta bilər, amma XİN rəhbəri səviyyəsində belə dəyişiklik qətiyyən inandırıcı deyil. Elmar Məmmədyarovun siyasətindən mən də razı deyiləm və daim onu tənqid etmişəm. Hesab edirəm ki, onun yerinə daha “dişli” adam gəlməlidir. Hətta müxəlifətdən ora kiminsə təyin olunacağını təxmin etsək, bu, İlqar Məmmədov olmamalıdır. Erməni mediası Azərbaycan siyasətini yaxından izləyir. Yaxşı olardı ki, Azərbaycan mediası da sizin kimi olsun və erməni mediasını yaxından izləsin. Bunun Ermənistanda hansı yönümlü media tərəfindən yayılması da maraqlıdır. Ola bilsin ki, İlqar Məmmədovun Qərblə yaxınlığını əsas gətirərək, Ermənistandakı qərbyönümlü media bu mövzunu qabardır. Başqa bir niyyətləri isə Azərbaycanla bağlı maksimum dezinformasiyanın dövriyyəyə buraxılması ola bilər. Nəzərə almalıyıq ki, onlar bizimlə həm də informasiya mübarizəsi aparırlar”.
Məhəmmədəli QƏRİBLİ
