Hazırkı ictimai-siyasi durumla bağlı Vətəndaş Cəmiyyəti nümayəndələri Azərbaycan xalqına onlayn müraciət ediblər.
Müraciəti onlayn şəkildə “Azadlıq Hərəkatçıları” İctimai Birliyinin sədri Təhmasib Novruzov, “Müharibə Veteranı Qadınlarına Sosial Yardım” İctimai Birliyinin sədri Radə Abbas, “Azərbaycan Vətən Müharibəsi Veteranları” İctimai Birliyinin sədri Füzuli Rzaquliyev, “Hüquqi və Demokratik İslahatlar Mərkəzi"nin sədri İlham Əliyev, “Erməni Təcavüzünün Tanıdılması” İctimai Birliyinin sədri Səriyyə Müslümqızı, “Sosial Rifah və Tədqiqatlar” İctimai Birliyinin sədri Əkrəm Bəydəmirli, Bakı Qazilər Birliyinin sədri Fuad Rzayev, “Regional Gender Mərkəzi” İctimai Birliyinin sədri Şərqiyyə Dadaşova, “Vətən Uğrunda Şəhid Anaları və Milli Qəhramanlar” İctimai Birliyinin sədri, şəhid anası Zərifə Əsgərova, “Miqrasiya Proseslərinin Tədqiqi” İctimai Birliyinin sədri, fəlsəfə elmləri doktoru Fəridə Vəliyeva, “İsmayıllı Yazarları” Ədəbi İctimai Birliyinin sədri, Əməkdar jurnalist Şahməmməd Soltanov, “Vətəndaşların Maariflənməsinə Ziyalıların Dəstəyi” İctimai Birliyinin sədri Famil Əzizov, ”İraq-Azərbaycan Mədəni Əlaqələri” İctimai Birliyinin sədri Tahirə Məmmədova, ”Demokratik Cəmiyyət və Qadın Hüquqları” İctimai Birliyinin sədri Mehriban Abdullayeva, “Mərhəmət” Kimsəsizlərə Yardım İctimai Birliyinin sədri İradə Polad, “Tərəqqi Sosial İnkişaf” İctimai Birliyinin sədri Telman Dadaşov, Xan Şuşinski Fondunun sədri Bəyimxanım Verdiyeva (Cavanşirova) imzalayıblar.
Müraciəti onlayn imzalayan QHT rəhbərləri qeyd edirlər ki, “COVID-19” adlanan, bütün dünyanı cənginə alan ümumbəşəri bəlanın tüğyan etdiyi bir zamanda müstəqil Azərbaycanın bu günü və gələcəyi ilə bağlı vətəndaşlara müraciət etməyi Vətəndaş Cəmiyyətinin nümayəndələri olaraq özlərinə borc biliblər. QHT rəhbərləri qeyd edirlər ki, həm ölkə daxilində, həm də ölkədən xaricdə bəzi qüvvələr tərəfindən dünyanın yeni düzənə girməsi ərəfəsində sərgilənən antimilli və antidövlət fəaliyyət onları belə bir müraciətlə çıxış etməyə vadar edib. “Sapı özümüzdən olub, dəstəyi anti-Azərbaycan qüvvələrin əlində olan bu ünsürlər, hətta koronovirusun tüğyan etdiyi günlərdə belə, nəinki fəaliyyətlərini təxirə salmamış, əksinə, bu məqamdan da öz iyrənc məqsədləri naminə yararlanmaq istəklərini ortaya qoymuşlar. Azərbaycan iqtidarının pandemiyadan sui-istifadə etdiyini, əsassız olaraq karantin tətbiq edildiyini iddia edən həmin ünsürlər bu gün nümunə göstərdikləri Avropa ölkələrində məhz vaxtında önləyici tədbirlərin görülməməsi ucbatından yaranmış durumla bağlı bir kəlmə də olsun danışmırlar. Belə çıxır ki, Azərbaycan hakimiyyəti də həmin ölkələr kimi gözləmə mövqeyi tutmalı imiş ki, nəticədə əhali gözəgörünməz bəlanın ağuşunda çapalamaq zorunda qalsın. Azərbaycan hakimiyyətinin az zaman daxilində bütün qüvvələri səfərbər edərək, ən zəruri addımlar atmaqla, inkişaf etmiş dünya dövlətlərindən fərqli olaraq, pandemiyanın genişlənməsinin qarşısını almasını təqdir etmək əvəzinə, bütün bunların “sui-istifadə” adlandırılması, ən azı şərəfsizlik və vicdansızlıqdır. ABŞ-da, Avropanın ən inkişaf etmiş ölkələrində insanlara ödənilən yardımın həcmini Azərbaycanda ödənilən yardımla uğursuz müqayisə isə onların nə qədər səbatsız olduqlarının təsdiqidir” - deyə müraciətdə qeyd edilir.
Müraciətdə qeyd edilir ki, həmin qüvvələr Azərbaycan dövlətinin, başda Prezident İlham Əliyev olmaqla, indiki iqtidarın yeni koronovirusun yayılmağa başladığı ilkin dövrdən mərhələlərlə həyata keçirdiyi düşünülmüş tədbirlər, atılan addımlar və bunun nəticəsində ölkəmizdə bu bəlanın geniş vüsət almasının qarşısının alınması, eyni zamanda, pandemiya ilə əlaqədar cəmiyyətin bütün təbəqələrinə dəymiş maddi zərərin dövlət hesabına odənilməsi, zərərin minimuma endirilməsinə yönəlik səriştəli idarəetmə və bu məqsədlər üçün dövlət büdcəsindən milyardlarla vəsaitin ayrılması haqqında bir kəlmə də olsun danışmırlar.
“...Odur ki, indiki məqamda, koronovirus təhlükəsindən xilas olmaq üçün göstərdiyimiz çaba ilə yanaşı, hər bir Azərbaycan vətəndaşını antimilli şəbəkənin cəmiyyətə ayaq açmaması, gerçəklərin sadə əhaliyə izah edilməsi və onlarda mənəvi baxımdan daha yetkin mövqe formalaşması məqsədilə lazımi addımlar atmağa çağırırıq” - deyə QHT sədrlərinin onlayn imzaladığı müraciətdə deyilir.
Xəbər xidməti
