Ermənistanın xarici işlər naziri Zöhrab Mnasakanyan Rusiyanın xarici işlər naziri Sergey Lavrovun Dağlıq Qarabağ münaqişəsinin nizama salınması ilə bağlı son bəyanatını şərh edərkən lüzumsuz ifadələr işlədib. Bildirib ki, “hər iki erməni tərəfi” onları qane etməyən razılaşmada iştirak etməyəcək. Ermənistan baş diplomatının tez-tez “erməni tərəflərindən heç biri" ifadəsini işlətməsi hansı məqsədi güdür? Danışıqlar prosesində neçə erməni tərəfi var?
Siyasi elmlər doktoru Hatəm Cabbarlı “Bakı-Xəbər”ə bildirdi ki, Lavrov son açıqlamasında Dağlıq Qarabağ münaqişəsinin həlli məsələsinə də toxunub:
“Danışıqlar prosesində Azərbaycanın bir tərəf-müqabili var, o da Ermənistandır”
“Onun sözlərinə görə, BMT Təhlükəsizlik Şurasının məlum qətnamələri hərbi əməliyyatın qızğın zamanında qəbul edilib. Həmçinin qeyd edib ki, həmin qətnamələrdə Azərbaycanın ərazi bütövlüyü tanınıb. Lavrov demək istəyib ki, BMT qətnamələrinin başlıca istiqaməti atəşkəsə nail olmaq istiqamətində olub. Lavrovun bu yöndə açıqlamasını bugünlərdə Putinin SSRİ-ni bərpa etməyin zəruriliyi ilə bağlı işlətdiyi fikirlər kontekstində də dəyərləndirə bilərik. Sadəcə regionda deyil, dünyada ciddi proseslər gedir. Putin siyasi mühəndis rolunda çıxış etməyə başlayıb. Dünyanın qurulmasında Rusiyanın rolunun nədən ibarət olduğunu demək istəyir. Rusiyanın özü də çətin dönəmini yaşayır. Neftin qiymətinin kəskin enişi ilə həmin ölkənin postpandemiya dönəmində öz ayaqları üstündə dura bilməsi hələ şübhəlidir. Böhrandan çıxa bilsə, Rusiyanın dominantlığı arta bilər. Sergey Lavrovun həssas məqamda belə bir bəyanatla çıxış etməsi Azərbaycanın maraqlarına cavab verir. Bu səbəbdən də Mnasakanyan militarist bəyanatlar səsləndirməyə məcbur olub. Onun verdiyi bəyanatda iki erməni dövlətindən bəhs edilir. Ermənilərin son 30 illik münaqişə tarixində iki baxışı formalaşıb. Biri qondarma rejimin Ermənistana birləşdirilməsi, digəri isə qondarma rejimin “müstəqilliyini” dünya biriliyinə tanıtmaq. Erməni diplomatiyası bu iki amildən hər dəfə müxtəlif vasitələrlə istifadə edir. Maraqlarına cavab verəndə “DQR”-in Ermənistana birləşməsindən danışırlar. Başqa kontekst tələb olunda isə “DQR”in müstəqilliyindən danışırlar. Son açıqlamasında Mnasakanyan ikinci üsulu seçib. Birmənalı şəkildə deyə bilərik ki, danışıqlar prosesində iki erməni tərəfi yoxdur. Dağlıq Qarabağın erməni və azərbaycanlı icmaları var ki, onların da hansısa prosesə cəlbi birlikdə baş tuta bilər. Paşinyan da bu məsələni dəfələrlə qabardıb, ancaq formatın dəyişilməsinin mümkünsüzlüyü, hətta beynəlxalq qurumlar tərəfindən də bəyan olunub. Danışıqlar prosesində Azərbaycanın bir tərəf-müqabili var, o da Ermənistandır. Azərbaycanın torpaqlarını Ermənistan işğal edib. Bu baxımdan da biz haqlı olaraq müzakirəni Ermənistanla aparırıq. Lavrovun bəyanatı Ermənistanda isterikaya səbəb olub. Bu özünü ən bariz şəkildə Mnasakanyanın bəyanatlarında göstərir. Ermənistan nə qədər çalışsa da, ikinci erməni tərəfini prosesə cəlb edə bilməz. Rusiyanın açıq məzmunlu bəyanatı Ermənistanı ciddi narahat edirsə, deməli, qarşıda fərqli proseslər gedə bilər”.
Məhəmmədəli QƏRİBLİ
